'സർക്കാർ പരാജയപ്പെട്ടിടത്തെല്ലാം യുഡിഎഫിന് ബദൽ പദ്ധതി'; ഭാവി കേരളം എങ്ങനെയായിരിക്കുമെന്ന് ജനങ്ങൾക്ക് മുന്നിൽ വെക്കുമെന്ന് വി ഡി സതീശൻ

കാസർകോട്: (KasargodVartha) സംസ്ഥാനം നേരിടുന്ന ഗുരുതരമായ സാമ്പത്തിക പ്രതിസന്ധിക്കും ഭരണ പരാജയങ്ങൾക്കും എതിരെ യുഡിഎഫിന്റെ ബദൽ വികസന രേഖ അവതരിപ്പിക്കുന്ന 'പുതുയുഗ യാത്ര'യ്ക്ക് മുന്നോടിയായി പ്രതിപക്ഷ നേതാവ് വി ഡി സതീശൻ നയം വ്യക്തമാക്കി. കുമ്പളയിൽ നിന്ന് ആരംഭിക്കുന്ന യാത്ര മാർച്ച് 7-ന് തിരുവനന്തപുരത്ത് സമാപിക്കും. യാത്രയുടെ 75 ശതമാനം സമയവും 'ഭാവി കേരളം എങ്ങനെയാകണം' എന്ന ചർച്ചയ്ക്കായിരിക്കും മാറ്റിവെക്കുകയെന്ന് അദ്ദേഹം കാസർകോട്ട് വാർത്താ സമ്മേളനത്തിൽ പറഞ്ഞു.

കേരളം വൃദ്ധസദനമാകും

നിലവിലെ സാഹചര്യം തുടർന്നാൽ അഞ്ച് വർഷത്തിനുള്ളിൽ കേരളം ഒരു വൃദ്ധസദനമായി മാറുമെന്ന് വി ഡി സതീശൻ മുന്നറിയിപ്പ് നൽകി. യുവാക്കൾ കൂട്ടത്തോടെ സംസ്ഥാനം വിട്ടുപോവുകയാണ്. സാമ്പത്തികമായി ഇത്രയേറെ തകർന്നടിഞ്ഞ അവസ്ഥ കേരളം ഇതിന് മുമ്പ് കണ്ടിട്ടില്ല. കോടികൾ കടം എടുത്താണ് സർക്കാർ മുന്നോട്ടുപോകുന്നത്. ആരോഗ്യ രംഗം വെന്റിലേറ്ററിലാണെന്നും കാർഷിക മേഖല പൂർണ്ണ തകർച്ചയിലാണെന്നും അദ്ദേഹം കുറ്റപ്പെടുത്തി. എവിടെയെല്ലാമാണ് ഇപ്പോഴത്തെ ഗവൺമെന്റ് പരാജയപ്പെട്ടത്, അവിടെയെല്ലാം യുഡിഎഫിന് ബദൽ പദ്ധതികളുണ്ട്. ഇത് ജനങ്ങൾക്ക് മുന്നിൽ അവതരിപ്പിക്കുമെന്നും അദ്ദേഹം പറഞ്ഞു.

ശബരിമലയും അഴിമതിയും

ശബരിമല വിഷയമടക്കം യാത്രയിൽ പ്രധാന ചർച്ചയാകും. ശബരിമല സ്വർണക്കൊള്ള കേസിൽ തെളിവില്ലാതെ കേസ് അവസാനിപ്പിക്കാനുള്ള നീക്കമുണ്ടെന്ന ആശങ്ക ശക്തമാണ്. ഇതുവരെ അന്വേഷണ സംഘം തൊണ്ടിമുതൽ പോലും ശേഖരിച്ചിട്ടില്ല. പുറത്തിറങ്ങുന്ന പ്രതികൾ തെളിവുകൾ നശിപ്പിക്കാൻ സാധ്യതയുണ്ട്. അടൂർ പ്രകാശിനെ ചോദ്യം ചെയ്താൽ മുഖ്യമന്ത്രിയെയും ചോദ്യം ചെയ്യണം. ദേവസ്വം മന്ത്രി രാജിവെക്കണമെന്നും അദ്ദേഹം ആവശ്യപ്പെട്ടു. രക്തസാക്ഷി ഫണ്ട് അടിച്ചുമാറ്റുന്ന തരത്തിലുള്ള താഴ്ന്ന നിലയിലേക്കാണ് സിപിഎം മാറിയിരിക്കുന്നത്. ദേവസ്വം ബോർഡ് പ്രസിഡന്റായ പത്മകുമാറിനെ സംരക്ഷിക്കുന്നവർ കുഞ്ഞികൃഷ്ണനെ പുറത്താക്കുന്നത് പാർട്ടിയുടെ ഇരട്ടത്താപ്പാണെന്നും സതീശൻ വിമർശിച്ചു.

പരോളും രാഷ്ട്രീയവും

ടിപി കേസ് പ്രതികൾക്ക് മാനദണ്ഡങ്ങൾ പാലിക്കാതെ പരോൾ വാരിക്കോരി നൽകുകയാണ്. തിരഞ്ഞെടുപ്പ് കാലത്ത് ഇത്തരം രാഷ്ട്രീയ ക്രിമിനലുകളെ പുറത്തിറക്കുന്നത് വലിയ അപകടം സൃഷ്ടിക്കും. ജമാഅത്തെ ഇസ്ലാമി പിന്തുണ നൽകിയാൽ അത് സ്വീകരിക്കുമെന്ന് അദ്ദേഹം വ്യക്തമാക്കി. ലീഗ് തകർന്നാൽ ആ സ്ഥാനത്ത് ആരെ ശക്തിപ്പെടുത്തുമെന്ന് എല്ലാവർക്കും അറിയാം, അത് സംഭവിക്കാതിരിക്കാനാണ് പി എം എ സലാമിനെപ്പോലുള്ളവരെ ചേർത്തുപിടിക്കുന്നതെന്നും അദ്ദേഹം പറഞ്ഞു. എൻഎസ്എസ്, എസ്എൻഡിപി നേതാക്കളുടെ വിമർശനം വ്യക്തിപരമാണ്. പ്രായമുള്ളവരാണ് വിമർശിക്കുന്നത്, തിരുത്താനുണ്ടെങ്കിൽ തിരുത്തുമെന്നും അദ്ദേഹം കൂട്ടിച്ചേർത്തു.

100 സീറ്റ്, കോൺഗ്രസ് മുഖ്യമന്ത്രി

അടുത്ത അഞ്ച് വർഷം കേരളത്തിൽ കോൺഗ്രസ് മുഖ്യമന്ത്രിയാകുമെന്നും നൂറിലധികം സീറ്റുകളോടെ ടീം യുഡിഎഫ് അധികാരത്തിലേക്ക് തിരിച്ചുവരുമെന്നും സതീശൻ ആത്മവിശ്വാസം പ്രകടിപ്പിച്ചു. സീറ്റ് വിഭജനം പൂർത്തിയായിട്ടില്ല. കമ്മ്യൂണിസ്റ്റ് ഭരണം അവസാനിക്കുകയാണെന്നും പൗരപ്രമുഖരെയല്ല, സാധാരണക്കാരെയാണ് യാത്രയിലേക്ക് ക്ഷണിച്ചതെന്നും അദ്ദേഹം പറഞ്ഞു.

വാർത്താ സമ്മേളനത്തിൽ മുസ്ലിം ലീഗ് ജനറല്‍ സെക്രട്ടറി പിഎംഎ സലാം, ആര്‍ എസ് പി നേതാവ് എന്‍ കെ പ്രേമചന്ദ്രന്‍ എം പി, കേരള കോണ്‍ഗ്രസ് നേതാവ് മോന്‍സ് ജോസഫ് എംഎല്‍എ, സിഎംപി നേതാവ് സി പി ജോണ്‍, രാജ്‌മോഹന്‍ ഉണ്ണിത്താന്‍ എം പി, എംഎല്‍എമാരായ പി സി വിഷ്ണുനാഥ്, എന്‍എ നെല്ലിക്കുന്ന്, എ.കെ എം അഷറഫ്, അന്‍വര്‍ സാദത്ത്, ഡിസിസി പ്രസിഡണ്ട് പികെ ഫൈസല്‍, മുസ്ലീം ലീഗ് ജില്ലാ പ്രസിഡണ്ട് കല്ലട്ര മാഹിന്‍ ഹാജി, സെക്രട്ടറി എ അബ്ദുള്‍ റഹ്‌മാന്‍, യുഡിഎഫ് കണ്‍വീനര്‍ ഗോവിന്ദന്‍ നായര്‍ തുടങ്ങിയവർ പങ്കെടുത്തു.

വി.ഡി. സതീശന്റെ കാസർകോട്ട് നടന്ന വാർത്താ സമ്മേളനത്തിന്റെ വിശദാംശങ്ങൾ പങ്കുവെക്കൂ. കൂടുതല്‍ വാര്‍ത്തകള്‍ അറിയാൻ വാട്സ്ആപ്പ് ചാനൽ ഫോളോ ചെയ്യൂ.

Article Summary: Opposition Leader V.D. Satheesan announces 'Puthuyuga Yatra' from Kasaragod, presenting UDF's alternative development plans and predicting a win with 100 seats.

#VDSatheesan #UDF #PuthuyugaYatra #KeralaPolitics #Kasaragod #Congress #CPMKerala #Election2026