കേരളത്തിൻ്റെ വികസന സ്വപ്നങ്ങൾക്ക് ബജറ്റിൽ തിരിച്ചടി; ഏഴ് ഹൈസ്പീഡ് റെയിൽ കോറിഡോറുകളിൽ ഒന്നിലും കേരളമില്ല; ജലപാതകളിലും സംസ്ഥാനം തഴയപ്പെട്ടു; പാർലമെൻ്റിൽ എംപിമാരുടെ പ്രതിഷേധം

ന്യൂഡൽഹി: (KasargodVartha) ധനമന്ത്രി നിർമ്മല സീതാരാമൻ മൂന്നാം മോദി സർക്കാരിൻ്റെ മൂന്നാം ബജറ്റ് അവതരിപ്പിക്കുന്നതിനിടെ പാർലമെൻ്റിൽ കേരളത്തിൽ നിന്നുള്ള എംപിമാരുടെ ശക്തമായ പ്രതിഷേധം. ബജറ്റ് പ്രസംഗത്തിനിടെ പ്രതിപക്ഷ നിരയിൽ നിന്നുള്ള എംപിമാർ ‘കേരളം… കേരളം…’ എന്ന് മുദ്രാവാക്യം വിളിച്ചാണ് സംസ്ഥാനത്തെ തഴഞ്ഞതിലുള്ള നിരാശ പ്രകടിപ്പിച്ചത്. രാജ്യത്തെ അതിവേഗ റെയിൽപ്പാത പദ്ധതികളിലും പുതിയ ജലപാതകളിലും കേരളത്തെ പരിഗണിക്കാത്തതാണ് ജനപ്രതിനിധികളെ പ്രകോപിപ്പിച്ചത്.

രാജ്യത്തിൻ്റെ വിവിധ ഭാഗങ്ങളെ ബന്ധിപ്പിക്കുന്ന ഏഴ് അതിവേഗ റെയിൽ കോറിഡോറുകളാണ് ബജറ്റിൽ പ്രഖ്യാപിക്കപ്പെട്ടത്. മുംബൈ-പുണെ, പുണെ-ഹൈദരാബാദ്, ഹൈദരാബാദ്-ബെംഗളൂരു, ഹൈദരാബാദ്-ചെന്നൈ, ചെന്നൈ-ബെംഗളൂരു, ഡൽഹി-വാരാണസി, വാരാണസി-സിലിഗുരി എന്നീ അതിവേഗ റെയിൽവേ ഇടനാഴികൾ വരുമ്പോൾ ദക്ഷിണേന്ത്യയിൽ കേരളം പട്ടികയ്ക്ക് പുറത്തായി. സമാനമായി, അഞ്ച് വർഷത്തിനുള്ളിൽ പ്രവർത്തനസജ്ജമാക്കുന്ന 20 പുതിയ ദേശീയ ജലപാതകളുടെ പ്രഖ്യാപനത്തിലും കേരളത്തിന് വിഹിതമില്ല.

അതേസമയം, കേരളം അടക്കം നാല് സംസ്ഥാനങ്ങളെ ബന്ധിപ്പിച്ചുള്ള റെയർ എർത്ത് കോറിഡോർ (Rare Earth Corridor) പദ്ധതി ബജറ്റിൽ പ്രഖ്യാപിച്ചു. കേരളം, തമിഴ്‌നാട്, ആന്ധ്രാപ്രദേശ്, ഒഡീഷ സംസ്ഥാനങ്ങളിലായി ധാതു ഖനനവും സംസ്കരണവും വർദ്ധിപ്പിക്കാനാണ് ഇന്ത്യ 2.0 സെമികണ്ടക്ടർ മിഷൻ്റെ ഭാഗമായുള്ള ഈ പദ്ധതി ലക്ഷ്യമിടുന്നത്. വിഴിഞ്ഞം — ചവറ റെയർ എർത്ത് കോറിഡോർ പദ്ധതി കഴിഞ്ഞ ദിവസം കേരള ബജറ്റിലും പ്രഖ്യാപിച്ചിരുന്നു.

ഒരു മണിക്കൂർ 26 മിനിറ്റ് നീണ്ടുനിന്ന ബജറ്റ് അവതരണം പൂർത്തിയാകുമ്പോൾ കേരളത്തിന് ലഭിക്കേണ്ടിയിരുന്ന എയിംസ് (AIIMS) പോലുള്ള ദീർഘകാല ആവശ്യങ്ങൾ പരിഗണിക്കപ്പെട്ടില്ല. നാളികേര പ്രോത്സാഹനം, ആയുർവേദ ചികിത്സാ പ്രോത്സാഹനം, കടലാമ സംരക്ഷണ കേന്ദ്രം എന്നിവയ്ക്ക് നാമമാത്രമായ പിന്തുണ ലഭിച്ചതൊഴിച്ചാൽ സംസ്ഥാനത്തെ അടിസ്ഥാന സൗകര്യ വികസനത്തിന് ഊന്നൽ നൽകുന്ന വലിയ പദ്ധതികളൊന്നുമില്ലാതെയാണ് ബജറ്റ് കടന്നുപോയത്. റെയിൽവേ വികസനത്തിലും മറ്റ് സുപ്രധാന മേഖലകളിലും കേരളം തഴയപ്പെട്ടതായാണ് എംപിമാരുടെ ആക്ഷേപം.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക.ഈ വാർത്ത സുഹൃത്തുകൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമൻ്റായി രേഖപ്പെടുത്താനും മറക്കരുത്.

Article Summary: Kerala MPs protested in Parliament during the Union Budget 2026 presentation as the state was excluded from high-speed rail corridors and national waterways.

#Budget2026 #KeralaIgnored #AIIMSKerala #HighSpeedRail #RareEarthCorridor #NirmalaSitharaman #KeralaMPsProtest #CentralBudgetDisappointment