ഉദുമയിൽ സിഎച്ച് കുഞ്ഞമ്പുവിന് വീണ്ടും നറുക്ക് വീണേക്കും; കോൺഗ്രസ് സർവേയിൽ ബിപി പ്രദീപ് കുമാറിന് മുൻതൂക്കം

ഉദുമ: (KasargodVartha) നിയമസഭാ മണ്ഡലത്തിൽ എൽ.ഡി.എഫ് സിറ്റിംഗ് എം.എ.ൽഎയും സി.പി.എം നേതാവുമായ സി.എച്ച്. കുഞ്ഞമ്പു രണ്ടാമതും മത്സരിക്കുമെന്ന് ഏറെക്കുറെ ഉറപ്പായി. 90 ശതമാനത്തിലധികം സാധ്യതയോടെയാണ് കുഞ്ഞമ്പുവിന്റെ സ്ഥാനാർത്ഥിത്വം നിലനിൽക്കുന്നത്.

അതേസമയം, കോൺഗ്രസ് 'എ ക്ലാസ്' മണ്ഡലമായി വിലയിരുത്തപ്പെടുന്ന ഉദുമയിൽ ശക്തമായ തിരിച്ചുവരവിനുള്ള പ്രതീക്ഷയിലാണ് യു.ഡി.എഫ്. എ.ഐ.സി.സി നിർദേശപ്രകാരം തെരഞ്ഞെടുപ്പ് തന്ത്രജ്ഞൻ കനഗേലു നടത്തിയ രണ്ട് സർവേ റിപ്പോർട്ടുകളിലും ഡി.സി.സി വൈസ് പ്രസിഡന്റും കെ.എസ്.യു-യൂത്ത് കോൺഗ്രസ് മുൻ ജില്ലാ പ്രസിഡന്റുമായ ബി.പി. പ്രദീപ് കുമാറിനാണ് മുൻതൂക്കം ലഭിച്ചിരിക്കുന്നത്. സർവേയിൽ എ.ഐ.സി.സിക്ക് നിർദേശിക്കപ്പെട്ട മറ്റൊരു പേര് ഡി.സി.സി മുൻ പ്രസിഡന്റായ ഹക്കീം കുന്നിലിന്റേതാണ്.

കെ.പി.സി.സി പട്ടിക വേറെ

എ.ഐ.സി.സി സർവേയിൽ നിന്ന് വ്യത്യസ്തമായി കെ.പി.സി.സി നേതൃത്വം മുന്നോട്ട് വെച്ചിരിക്കുന്നത് രാജൻ പെരിയ, ധന്യാ സുരേഷ്, ബാലകൃഷ്ണൻ പെരിയ തുടങ്ങിയവരുടെ പേരുകളാണ്.

തദ്ദേശ കണക്കുകളിൽ യു.ഡി.എഫ് ആത്മവിശ്വാസം

കഴിഞ്ഞ നിയമസഭാ തിരഞ്ഞെടുപ്പിൽ 13,322-ത്തിലധികം വോട്ടിന്റെ ഭൂരിപക്ഷത്തിലാണ് സി.എച്ച്. കുഞ്ഞമ്പു വിജയിച്ചത്. എന്നാൽ ഇക്കഴിഞ്ഞ തദ്ദേശ സ്വയംഭരണ തിരഞ്ഞെടുപ്പിലെ ജില്ലാ പഞ്ചായത്ത് ഡിവിഷൻ കണക്കുകൾ പരിശോധിക്കുമ്പോൾ 1,100 വോട്ടിന്റെ ലീഡ് യു.ഡി.എഫിനാണുള്ളത്. ഈ കണക്കുകൾ ഉദുമ ഇത്തവണ പിടിച്ചെടുക്കാമെന്ന കണക്കുകൂട്ടലിലേക്കാണ് കോൺഗ്രസിനെ നയിക്കുന്നത്.

പഞ്ചായത്ത് തലത്തിൽ മാറിയ ചിത്രം

● മുളിയാർ, ദേലംപാടി, ഉദുമ പഞ്ചായത്തുകളിൽ യു.ഡി.എഫ് ഭരണം തിരിച്ചുപിടിച്ചു.

● പള്ളിക്കര പഞ്ചായത്ത് ഭരണം വെറും ഒരു സീറ്റിന്റെ വ്യത്യാസത്തിലാണ് യു.ഡി.എഫിന് നഷ്ടമായത്.

● പുല്ലൂർ–പെരിയ പഞ്ചായത്തിൽ ഭരണനില ഒപ്പത്തിനൊപ്പമാണ്.

● ചെമ്മനാട് പഞ്ചായത്ത് യു.ഡി.എഫിന്റെ കൈവശമാണ്.

● സി.പി.എം ശക്തികേന്ദ്രമായ ബേഡകത്ത് ചരിത്രത്തിൽ ആദ്യമായി രണ്ട് സീറ്റുകൾ നേടി കോൺഗ്രസ് കരുത്ത് കാട്ടിയത് യു.ഡി.എഫ് ക്യാമ്പിന് വലിയ ആത്മവിശ്വാസം നൽകുന്നു.

സി.പി.എമ്മിന് ആശങ്ക; കുഞ്ഞമ്പു തന്നെ ശരണം 

പരമ്പരാഗത വോട്ട് ബാങ്കുകളിൽ കോൺഗ്രസും ബി.ജെ.പിയും ഒരുപോലെ കടന്നുകയറുന്നത് എൽ.ഡി.എഫിനും സി.പി.എമ്മിനും ആശങ്ക സൃഷ്ടിക്കുന്നുണ്ട്. ഈ സാഹചര്യത്തിലാണ് മണ്ഡലത്തിൽ വ്യക്തിപരമായ സ്വാധീനമുള്ള കുഞ്ഞമ്പുവിനെ തന്നെ വീണ്ടും മത്സരിപ്പിക്കാൻ പാർട്ടി ആലോചിക്കുന്നത്.

മന്ത്രിപദവി ഘടകമാകും 

കുഞ്ഞമ്പു വീണ്ടും വിജയിക്കുകയും എൽ.ഡി.എഫ് സംസ്ഥാനത്ത് അധികാരത്തിൽ തുടരുകയും ചെയ്താൽ കാസർകോട് ജില്ലയ്ക്ക് സി.എച്ച്. കുഞ്ഞമ്പുവിലൂടെ മന്ത്രിപദവി ലഭിക്കാമെന്ന പ്രതീക്ഷയും സി.പി.എം ക്യാമ്പ് മുന്നോട്ട് വെക്കുന്നുണ്ട്. മണ്ഡലത്തിൽ നടപ്പിലാക്കിയ വികസന പ്രവർത്തനങ്ങൾ വോട്ട് തിരിച്ചുപിടിക്കാൻ സഹായിക്കുമെന്നും പാർട്ടി കരുതുന്നു.

ത്രികോണ മത്സരം 

ബി.ജെ.പി ഉദുമയിൽ നേരിട്ടുള്ള ജയസാധ്യത ഇല്ലെങ്കിലും, വോട്ട് വിഭജനത്തിൽ നിർണായക സ്വാധീനം ചെലുത്തുന്ന ഘടകമായി തുടരുന്നു. എ. വേലായുധൻ തന്നെയായിരിക്കും ബി.ജെ.പിക്ക് വേണ്ടി ഇറങ്ങുകയെന്ന് കരുതുന്നു. ഇതോടെ ഉദുമയിൽ ഇത്തവണത്തെ തിരഞ്ഞെടുപ്പ് ശക്തമായ ത്രികോണ രാഷ്ട്രീയ പോരാട്ടമായി മാറുമെന്ന് രാഷ്ട്രീയ നിരീക്ഷകർ വിലയിരുത്തുന്നു.

ഈ വാർത്ത സുഹൃത്തുകൾക്കും കുടുംബാംഗങ്ങൾക്കും ഷെയർ ചെയ്യൂ. നിങ്ങളുടെ അഭിപ്രായം കമന്റായി രേഖപ്പെടുത്തൂ.

Article Summary: As the 2026 assembly election approaches, sitting MLA C.H. Kunhambu is likely to be the LDF candidate in Uduma. Meanwhile, an AICC survey favors B.P. Pradeep Kumar for UDF, who are hopeful of a comeback based on recent local body election trends.

#Uduma #KeralaElection2026 #CHKunhambu #BPPradeepKumar #LDF #UDF #KasargodPolitics