യുഡിഎഫില്‍ സീറ്റ് വിഭജനം അവസാന ഘട്ടത്തിലേക്ക്; കാസര്‍കോട് നഗരസഭയിലെ തര്‍ക്കം ലീഗ്-കോണ്‍ഗ്രസ് ചര്‍ച്ചയില്‍

കാസര്‍കോട്: (KasargodVartha) നിയോജക മണ്ഡലത്തിലെ പഞ്ചായത്തുകളിൽ യു ഡി എഫില്‍ സീറ്റ് വീതം വെപ്പ് അവസാനഘട്ടത്തിലേക്ക് കടന്നിരിക്കുകയാണ്. മധൂർ പഞ്ചായത്തിലും കുമ്പഡാജെയിലും സീറ്റ് വിഭജനം പൂർത്തിയായി. അതേസമയം, കാസർകോട് നഗരസഭയിൽ ഒരു സീറ്റിൻ്റെ കാര്യത്തിൽ തർക്കം നിലനിൽക്കുന്നുണ്ട്.

നഗരസഭയിലെ തർക്കം വിദ്യാനഗർ വാർഡിൽ

കാസർകോട് നഗരസഭയിൽ പുതുതായി രൂപീകരിക്കപ്പെട്ട വിദ്യാനഗർ വാർഡ് അനുവദിക്കുന്ന കാര്യത്തിലാണ് നിലവിൽ തർക്കമുള്ളത്. ഈ വാർഡിൽ 250-ഓളം വോട്ട് ലീഗ് ചേർത്തിട്ടുണ്ട്. അതുകൊണ്ടുതന്നെ സീറ്റ് ലീഗിന് വേണമെന്നാണ് മുസ്ലീം ലീഗിൻ്റെ ആവശ്യം. അതേസമയം, തങ്ങൾക്ക് വിജയ സാധ്യതയുള്ള വാർഡ് വിട്ടു കൊടുക്കില്ലെന്ന നിലപാടിലാണ് കോൺഗ്രസ്.

നഗരസഭയിൽ ആകെ 23 സീറ്റിൽ മുസ്ലീം ലീഗും 16 സീറ്റിൽ കോൺഗ്രസും മത്സരിക്കാനാണ് പ്രാഥമിക ധാരണ. വാർഡുകളിലെ സ്ഥാനാർത്ഥികളെ നിശ്ചയിച്ചു തുടങ്ങിയിട്ടുണ്ട്. മുസ്ലീം ലീഗ് മുനിസിപ്പൽ പാർലിമെൻ്ററി ബോർഡ് വാർഡ് കമ്മറ്റികൾ നിർദ്ദേശിക്കുന്ന പേരുകൾക്ക് അംഗീകാരം നൽകിയ ശേഷം ജില്ലാ പാർലിമെൻ്ററി ബോർഡാണ് സ്ഥാനാർത്ഥിത്വം ഔദ്യോഗികമായി പ്രഖ്യാപിക്കുക.

മറ്റ് പഞ്ചായത്തുകളിലെ വിഭജനം പൂർത്തിയായി

മധൂർ പഞ്ചായത്തിൽ ആകെ 24 സീറ്റാണുള്ളത്. ഇതിൽ 14 സീറ്റിൽ ലീഗും 10 സീറ്റിൽ കോൺഗ്രസും മത്സരിക്കും. തർക്കങ്ങളില്ലാതെയാണ് ഇവിടെ സീറ്റ് വിഭജനം പൂർത്തിയാക്കിയത്. നിലവിൽ ലീഗിന് രണ്ടും കോൺഗ്രസിന് ഒരംഗവുമാണ് മധൂരിലുള്ളത്. കാലാകാലങ്ങളായി ബി ജെ പി ഭരിക്കുന്ന ഈ പഞ്ചായത്തിൽ ഇത്തവണ തീ പാറുന്ന മത്സരം കാഴ്ചവെക്കാനാകുമെന്നാണ് യു ഡി എഫ് നേതാക്കൾ അവകാശപ്പെടുന്നത്.

യു ഡി എഫ് ഭരിക്കുന്ന കുമ്പഡാജെ പഞ്ചായത്തിൽ കോൺഗ്രസും ലീഗും ഏഴ് വീതം സീറ്റുകളിലാണ് മത്സരിക്കുന്നത്. യു ഡി എഫ് ഭരിക്കുന്ന ബദിയഡുക്കയിലും സീറ്റ് വിഭജനം ഏറെക്കുറെ പൂർത്തിയായിട്ടുണ്ട്. എന്നാൽ സീറ്റിൻ്റെ കണക്കുകൾ പുറത്ത് വരുന്നതേയുള്ളൂ. ചെങ്കള, മൊഗ്രാൽപുത്തൂർ, കാറഡുക പഞ്ചായത്തുകളിലെ സീറ്റ് വിഭജനവും രണ്ട് ദിവസത്തിനകം പൂർത്തിയാകുമെന്നാണ് വിവരം.

നഗരസഭയിലെ പ്രധാന സ്ഥാനാർത്ഥികൾ

കാസർകോട് നഗരസഭയിലെ നെല്ലിക്കുന്ന് വാർഡിൽ ഐക്യകണ്ഠേന സ്ഥാനാർത്ഥിയെ വാർഡ് കമ്മറ്റി തീരുമാനിച്ചു. എൻ എ നെല്ലിക്കുന്നിൻ്റെ അനുജൻ്റെ ഭാര്യയെ സ്ഥാനാർത്ഥിയാക്കാനാണ് വാർഡ് കമ്മറ്റി തീരുമാനിച്ചിരിക്കുന്നത്. തായലങ്ങാടി വാർഡിൽ മുൻ നഗരസഭാംഗം കൂടിയായ ഷമീന മുജീബ് മത്സരിക്കും.

തെരുവത്ത് വാർഡിൽ യൂത്ത് ലീഗ് നേതാവ് അബ്ദുൽ റഹ്‌മാൻ തൊട്ടാനും സ്ഥാനാർത്ഥിയാകും. മുൻ കൗൺസിലർ കൂടിയായ മുസ്ലീം ലീഗ് വിമതൻ റാഷിദ് പൂരണം ആഴ്ചകൾക്ക് മുമ്പ് സ്ഥാനാർത്ഥി പ്രഖ്യാപനം നടത്തി ശക്തമായ വെല്ലുവിളി ഉയർത്തുന്ന ഫോർട്ട് റോഡ്-ഫിഷ് മാർക്കറ്റ് വാർഡിൽ ജാഫർ കമാലാണ് യു ഡി എഫ് സ്ഥാനാർത്ഥി. ഐക്യകണ്ഠേനയാണ് ഇവരുടെ പേരുകൾ നിർദ്ദേശിക്കപ്പെട്ടത്.

യു ഡി എഫ് സീറ്റ് വിഭജനത്തെക്കുറിച്ചും സ്ഥാനാർത്ഥികളെക്കുറിച്ചും നിങ്ങളുടെ പ്രതികരണം പങ്കുവെക്കുക.

Article Summary: UDF seat division in Kasaragod nears completion; dispute remains over Vydyanagar ward in Kasaragod Municipality.

#UDF #Kasaragod #SeatAllocation #LSG #KeralaPolitics #MuslimLeague