പ്രഖ്യാപനങ്ങളിൽ ഒതുങ്ങി തളങ്കരയുടെ വികസനം: മീൻപിടിത്ത കേന്ദ്രം നിലംപൊത്തുന്നു

കാസർകോട്: (KasargodVartha) മുൻ തുറമുഖ വകുപ്പ് മന്ത്രിയും ജില്ലയുടെ ചുമതലയുമുണ്ടായിരുന്ന അഹമ്മദ് തേവർകോവിൽ പ്രഖ്യാപിച്ച തളങ്കര ഹാർബർ പദ്ധതിയും, ടൂറിസം വകുപ്പിന്റെ സഹകരണത്തോടെ നഗരസഭ ആവിഷ്കരിച്ച ടൂറിസം ഗ്രാമ പദ്ധതിയും കഴിഞ്ഞ രണ്ടു വർഷമായിട്ടും വെളിച്ചം കണ്ടിട്ടില്ല. പ്രാഥമിക പ്രവർത്തനങ്ങൾ പോലും നടക്കാത്തത് പ്രദേശവാസികളിൽ നിരാശയുളവാക്കുന്നു.

നഗരസഭയുടെ പ്രത്യേക താൽപ്പര്യത്തിൽ നടപ്പിലാക്കുമെന്ന് അറിയിച്ചിരുന്ന തളങ്കര ടൂറിസം പദ്ധതിയും ജില്ലയിലെ മറ്റു പദ്ധതികളെപ്പോലെ പ്രഖ്യാപനത്തിൽ ഒതുങ്ങിയെന്നാണ് നാട്ടുകാരുടെ പരാതി.

അതേസമയം, തളങ്കര പുഴയിലെ ജലനിരപ്പ് ഉയരുന്നതും ശക്തമായ മഴയും ഒഴുക്കും കാരണം, മിനി ഹാർബർ എന്ന് വിശേഷിപ്പിക്കുന്ന തളങ്കര മീനിറക്ക് കേന്ദ്രം അപകടാവസ്ഥയിലാണ്. കെട്ടിടം പൂർണ്ണമായും തകർച്ചയിലേക്ക് നീങ്ങുകയാണ്. മീനിറക്കുന്നതിനായി പുഴയോരത്ത് നിർമ്മിച്ച സംവിധാനങ്ങളെല്ലാം തകർച്ച നേരിടുന്നുണ്ട്. 

കോൺക്രീറ്റ് പാലവും കൈവരികളുമെല്ലാം തകർന്ന നിലയിലാണ്. ട്രോളിംഗ് നിരോധനം അവസാനിച്ചാൽ വള്ളങ്ങളിലും തോണികളിലുമായി മീനുകൾ എത്തിച്ചേരുമ്പോൾ, മീനിറക്ക് കേന്ദ്രത്തിന്റെ ഈ അവസ്ഥ മത്സ്യത്തൊഴിലാളികളിൽ വലിയ ആശങ്ക സൃഷ്ടിച്ചിട്ടുണ്ട്.

കെട്ടിടം മൊത്തത്തിൽ തകർച്ചയുടെ വക്കിലാണെന്ന് മത്സ്യത്തൊഴിലാളികൾ പറയുന്നു. പുനർനിർമ്മാണത്തിനോ അറ്റകുറ്റപ്പണികൾക്കോ പോലും അധികൃതർ നടപടി സ്വീകരിക്കുന്നില്ലെന്ന പരാതിയുമുണ്ട്. നഗരസഭയാകട്ടെ, വൻകിട പദ്ധതികൾക്കായി കാത്തിരിക്കുകയാണെന്ന ആക്ഷേപവും ശക്തമാണ്.

കെട്ടിടവും പരിസരവും ജലനിരപ്പ് കാരണം അപകടാവസ്ഥയിലായതോടെ തൊട്ടടുത്ത തീരദേശ പോലീസുകാരും നാട്ടുകാരും ഇവിടേക്കുള്ള ആളുകളുടെ പ്രവേശനം തടഞ്ഞിട്ടുണ്ട്. മത്സ്യത്തൊഴിലാളികൾക്ക് മീനിറക്കാനും, വലകളും മറ്റു മീൻപിടിത്ത ഉപകരണങ്ങൾ സൂക്ഷിക്കാനും, ജോലി കഴിഞ്ഞ് വിശ്രമിക്കാനും ഉപയോഗിച്ചിരുന്ന കെട്ടിടമാണ് കാലപ്പഴക്കം കൊണ്ട് അപകടാവസ്ഥയെ നേരിടുന്നത്.

തളങ്കരയിലെ ഈ വിഷയത്തിൽ നിങ്ങളുടെ അഭിപ്രായം പങ്കുവെക്കുക.
 

Article Summary: Thalankara's harbor and tourism projects stalled, fisheries center collapsing.
 

#Thalankara #Kasargod #DevelopmentStalled #FisheriesCrisis #KeralaNews #LocalProblems