തോൽവി മണത്തു: തേജസ്വി യാദവിനെ മുഖ്യമന്ത്രി സ്ഥാനാർഥിയായി ഉയർത്തിക്കാട്ടി 'ഇന്ത്യ' സഖ്യം

പാട്ന: (KasargodVartha) ഭിന്നതകൾ പരിഹരിച്ച് 'ഇന്ത്യ' സഖ്യം ബിഹാറിൽ ശക്തമായ പോരാട്ടത്തിന് ഒരുങ്ങിയതോടെ മുഖ്യമന്ത്രി ആരാകുമെന്നതിൽ തർക്കങ്ങൾ അവസാനിച്ചു. ആർജെഡിയുടെ തേജസ്വി യാദവ് തന്നെയാണ് ഇന്ത്യ മുന്നണിയുടെ മുഖ്യമന്ത്രി സ്ഥാനാർഥി. നിലവിലെ മുഖ്യമന്ത്രി നിതീഷ് കുമാറിനെ ഉയർത്തിക്കാട്ടാൻ മടിക്കുന്ന എൻഡിഎ ക്യാമ്പിനെ ഈ തീരുമാനം അങ്കലാപ്പിലാക്കിയിരിക്കുകയാണ്.

രാഹുൽ ഗാന്ധിയുടെ നിർദേശപ്രകാരം കഴിഞ്ഞ മൂന്ന് ദിവസങ്ങളിലായി നടന്ന മാരത്തൺ ചർച്ചകൾക്കൊടുവിലാണ് തേജസ്വി യാദവിനെ മുഖ്യമന്ത്രിയായി ഉയർത്തിക്കാട്ടാൻ തീരുമാനമായത്. രാജസ്ഥാൻ മുൻ മുഖ്യമന്ത്രി അശോക് ഗെഹ്ലോട്ടാണ് ചർച്ചകൾക്ക് നേതൃത്വം നൽകിയത്. 

എന്നാൽ, വിവിധ മണ്ഡലങ്ങളിൽ പരസ്പരം ഏറ്റുമുട്ടുന്ന കാര്യത്തിൽ അനിശ്ചിതത്വം തുടരുന്നത് 'ഇന്ത്യ' മുന്നണി ക്യാമ്പിൽ ആശങ്ക ഉണ്ടാക്കുന്നുണ്ട്. എട്ട് മണ്ഡലങ്ങളിലാണ് കോൺഗ്രസും ആർജെഡിയും തമ്മിൽ നേരിട്ട് ഏറ്റുമുട്ടുന്നത്. ഇത് സമീപ മണ്ഡലങ്ങളിലെ ജയപരാജയങ്ങളെ ബാധിച്ചേക്കുമെന്നതാണ് ആശങ്കയ്ക്ക് കാരണം. 

സംസ്ഥാനത്ത് ആർജെഡി 143 സ്ഥാനാർഥികളെ പ്രഖ്യാപിച്ചപ്പോൾ കോൺഗ്രസ് 61 സീറ്റുകളിലാണ് മത്സരിക്കുന്നത്. സീറ്റ് ധാരണ പ്രകാരം 'ഇന്ത്യ' മുന്നണിയുടെ മറ്റ് ഘടകകക്ഷികളായ സിപിഐ ഒൻപത് മണ്ഡലങ്ങളിലും സിപിഎം നാല് സീറ്റിലും മത്സരിക്കും.

ബിഹാർ മുഖ്യമന്ത്രി നിതീഷ് കുമാറിന്റെ ഭരണം ജനങ്ങൾക്കിടയിൽ സ്വീകാര്യതയില്ലെന്നുള്ള വിലയിരുത്തലിലാണ് ബിജെപി അദ്ദേഹത്തെ മുഖ്യമന്ത്രി സ്ഥാനാർഥിയായി ഉയർത്തിക്കാട്ടുന്നതിന് തടസ്സമായി നിൽക്കുന്നത്. എന്നാൽ ജെഡിയു ഇത് അംഗീകരിക്കുന്നില്ല. ഇത് തിരഞ്ഞെടുപ്പിൽ എൻഡിഎയ്ക്ക് ദോഷം ചെയ്യുമെന്നതിൽ ഇരു പാർട്ടികൾക്കും ആശങ്കയുണ്ട്. 

ഇരുവിഭാഗങ്ങൾ തമ്മിൽ തമ്മിലടിയുണ്ടാകുമെന്നും ഭയപ്പെടുന്നു. 101 സീറ്റുകൾ വീതം പങ്കുവെച്ച് സീറ്റ് ധാരണയിൽ ബിജെപിയും ജെഡിയുവും മത്സരിക്കുന്നു. കൂടുതൽ സീറ്റുകളിൽ വിജയിക്കുന്ന എംഎൽഎമാർ ചേർന്ന് മുഖ്യമന്ത്രിയെ തീരുമാനിക്കുമെന്നാണ് കേന്ദ്ര ആഭ്യന്തരമന്ത്രി അമിത് ഷാ പറയുന്നത്. 

ഭരണവിരുദ്ധ വികാരം നിലനിൽക്കുന്ന സംസ്ഥാനത്ത് നിതീഷ് കുമാറിന്റെ ജെഡിയുവിന് ഇത്തവണ കൂടുതൽ സീറ്റുകളിൽ വിജയസാധ്യത ഇല്ലെന്നതിന്റെ അടിസ്ഥാനത്തിലാണ് ബിജെപി ഇങ്ങനെയൊരു കടുത്ത തീരുമാനമെടുത്തത്. സംസ്ഥാന ബിജെപി ഘടകത്തിനും ഇതേ അഭിപ്രായമാണുള്ളത്. ബിഹാറിൽ അടുത്ത ബിജെപി മുഖ്യമന്ത്രിയെ സ്ഥാനത്ത് എത്തിക്കുകയെന്നതാണ് നേതൃത്വത്തിന്റെ പ്രധാന ലക്ഷ്യം.

പ്രതിപക്ഷ നേതാവ് രാഹുൽ ഗാന്ധി നടത്തിയ 'വോട്ട് ചോരി' യാത്രയിൽ ഉണ്ടാക്കിയെടുത്ത ആവേശം നിലനിർത്താനാവുമോ എന്നതാണ് ഇപ്പോൾ 'ഇന്ത്യ' സഖ്യം ബിഹാറിൽ തേജസ്വി യാദവിനെ ഉയർത്തിക്കാട്ടി പരീക്ഷിക്കുന്നത്. 

ഇതിൽ വിജയിക്കാനായാൽ അടുത്ത വർഷം നടക്കുന്ന അഞ്ച് സംസ്ഥാനങ്ങളിലെ തിരഞ്ഞെടുപ്പ് ഫലത്തിലും അത് പ്രകടമാകും. എന്നാൽ ന്യൂനപക്ഷ വോട്ടുകളിലെ ഭിന്നത 'ഇന്ത്യ' മുന്നണി ക്യാമ്പിൽ ആശങ്കയുണ്ടാക്കുന്നുമുണ്ട്.

വളരെ നേരത്തെ നടത്തിയ അഭിപ്രായ സർവേകൾ നൽകുന്ന സൂചനകൾ പ്രകാരം തിരഞ്ഞെടുപ്പിൽ ഏറ്റവും വലിയ കക്ഷിയാകാനുള്ള സാധ്യത ബിജെപിക്കാണുള്ളതെങ്കിലും തേജസ്വി യാദവിന്റെ ആർജെഡിയെയും ഇപ്പോൾ തള്ളിക്കളയാനാവില്ല. 

നിലനിൽപ്പിനായുള്ള പോരാട്ടത്തിലാണ് ബിഹാറിൽ കോൺഗ്രസ് പാർട്ടിയും നിതീഷ് കുമാറിന്റെ ജെഡിയുവും മത്സരിക്കുന്നത്. ഈ പാർട്ടികൾക്ക് ലഭിക്കുന്ന സീറ്റിന്റെ അടിസ്ഥാനത്തിലായിരിക്കും ബിഹാർ ആര് ഭരിക്കുമെന്ന് തീരുമാനിക്കുകയെന്നും രാഷ്ട്രീയ നിരീക്ഷകർ കണക്കുകൂട്ടുന്നു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം എന്താണ്? കമൻ്റ് ചെയ്യുക. സുഹൃത്തുക്കൾക്ക് ഷെയർ ചെയ്യുക 

Article Summary: 'INDIA' Alliance declares Tejashwi Yadav as its CM face in Bihar, challenging the NDA, which is hesitant to project Nitish Kumar.

#BiharElections #TejashwiYadav #IndiaAlliance #NitishKumar #BiharPolitics #RJD