സ്വരാജ് തോറ്റു; ചങ്ക് പറിച്ചു നൽകുന്നത് പോലെ ചെഗു വേര രാജൻ തൻ്റെ സൈക്കിൾ പന്തയം വെച്ചയാൾക്ക് കൈമാറി; വീഡിയോ വൈറൽ

പിലിക്കോട്: (KasargodVartha) നിലമ്പൂർ ഉപതിരഞ്ഞെടുപ്പിൽ സി.പി.എം. നേതാവ് എം. സ്വരാജ് തോറ്റതിനെ തുടർന്ന്, ബസ് ക്ലീനറും പുത്തിലോട്ടെ സജീവ പ്രവർത്തകനുമായ ചെ ഗുവേര രാജൻ തന്റെ പന്തയ സമ്മാനം കൈമാറി. 

പാർട്ടി സമ്മേളനങ്ങൾക്കും മറ്റ് പരിപാടികൾക്കും പോകാൻ രാജൻ സ്ഥിരമായി ഉപയോഗിച്ചിരുന്ന സൈക്കിളാണ്, പന്തയത്തിൽ തോറ്റതോടെ കഴിഞ്ഞ ദിവസം കൈമാറിയത്.

പന്തയം വെച്ച സുഹൃത്ത് പോലും ആ കാര്യം മറന്നിരുന്നുവെങ്കിലും, രാജന് തന്റെ വാക്ക് മറക്കാൻ കഴിഞ്ഞില്ല. സ്വരാജ് തോറ്റാൽ, താൻ എന്നും കൂടെ കൊണ്ടുനടക്കുന്ന സൈക്കിൾ പന്തയമായി നൽകുമെന്നായിരുന്നു രാജൻ സുഹൃത്തുമായി വാതുവെച്ചിരുന്നത്. 

സ്വരാജ് തോറ്റു; ചങ്ക് പറിച്ചു നൽകുന്നത് പോലെ ബസ് ക്ലീനർ ചെഗു വേര രാജൻ തൻ്റെ സൈക്കിൾ പന്തയം വെച്ചയാൾക്ക് കൈമാറി; വീഡിയോ വൈറൽ. pic.twitter.com/fJImGnXoHK

— Kasargod Vartha (@KasargodVartha) July 1, 2025

പരസ്പരം കണ്ടുമുട്ടാത്തതുകൊണ്ട് ഉപതിരഞ്ഞെടുപ്പിന്റെ ഫലം വന്ന് ദിവസങ്ങൾ കഴിഞ്ഞിട്ടും സൈക്കിൾ ഏൽപ്പിച്ചുകൊടുക്കാൻ കഴിഞ്ഞിരുന്നില്ല. എത്ര പ്രയാസങ്ങൾ നേരിട്ടാലും, ബുദ്ധിമുട്ടുകൾ അനുഭവിച്ചാലും സത്യസന്ധനായി ജീവിക്കുക എന്നതാണ് രാജന്റെ രീതി.

നിലമ്പൂർ തിരഞ്ഞെടുപ്പിൽ എം. സ്വരാജ് വിജയിക്കുമെന്ന് രാജന് അത്രയേറെ ഉറപ്പുണ്ടായിരുന്നു. അതുകൊണ്ടാണ് രാജൻ തന്റെ ജീവനേക്കാൾ വിലയുള്ള, ജീവിതം തന്നെയായ ആ സൈക്കിൾ പന്തയം വെച്ചത്. 

രാജൻ ഉൾപ്പെടെയുള്ള, പാർട്ടിയെ സ്നേഹിക്കുന്ന ഒരുപാട് പേർ സ്വരാജ് ജയിക്കുമെന്ന പ്രതീക്ഷയിലായിരുന്നു. ചെ ഗുവേര രാജൻ എന്ന വ്യക്തിയെ അടയാളപ്പെടുത്തുമ്പോൾ, കൂടെ ആ സൈക്കിൾ ഇല്ലെങ്കിൽ അയാൾക്ക് പൂർണ്ണത ലഭിക്കില്ലെന്ന് സുഹൃത്തുക്കൾ പറയുന്നു.

കഴിഞ്ഞ പാർട്ടി ജില്ലാ സമ്മേളനത്തിന്റെ ഭാഗമായുള്ള പൊതുസമ്മേളനത്തിൽ പങ്കെടുക്കാൻ, കിലോമീറ്ററുകൾ താണ്ടി കാഞ്ഞങ്ങാട്ടേക്ക് രാജൻ സൈക്കിളിൽ തന്നെയാണ് യാത്ര ചെയ്തത്. ഏത് പാർട്ടി പരിപാടിയിൽ പങ്കെടുക്കുമ്പോഴും, പാർട്ടി നേതാക്കളുടെ ചിത്രം പതിപ്പിച്ച തന്റെ സൈക്കിൾ തന്നെയായിരുന്നു രാജന്റെ വാഹനം. ചങ്ക് പറിച്ചു നൽകുന്ന വേദനയോടെ തന്നെയായിരിക്കും രാജൻ ആ സൈക്കിൾ വിട്ടുനൽകിയതെന്ന് സുഹൃത്തുക്കളും പാർട്ടി പ്രവർത്തകരും പറയുന്നു.

എന്നാൽ, ആ വേദനയെല്ലാം നെഞ്ചിലൊതുക്കി, പറഞ്ഞ വാക്കിൽ നിന്ന് ഒരടി പോലും പിന്നോട്ട് പോകാതെ, സത്യസന്ധതയുടെ ആൾരൂപമായി രാജൻ മാറുകയായിരുന്നു. ആര്യാടൻ ഷൗക്കത്തിന്റെ വിജയമായിരുന്നു സുഹൃത്ത് പന്തയത്തിൽ പറഞ്ഞിരുന്നത്.

പാർട്ടിയുടെ കരുത്തനായ നേതാവിനെ നിലമ്പൂർ പിടിക്കാൻ ഇറക്കിയിട്ടും പരാജയം നേരിട്ടത് രാജനെ പോലുള്ള പാർട്ടി അനുഭാവികൾക്ക് ഉൾക്കൊള്ളാൻ കഴിഞ്ഞിരുന്നില്ല. രാജൻ സൈക്കിൾ കൈമാറുന്നതിന്റെ വീഡിയോ നാട്ടിൽ ഇതിനകം തന്നെ വൈറലായിട്ടുണ്ട്.

ഈ സംഭവത്തെക്കുറിച്ച് നിങ്ങളുടെ അഭിപ്രായം പങ്കുവെക്കുക. 

Article Summary: Bus cleaner Rajan hands over bicycle after losing Nilambur by-election bet.

#NilamburByeElection #Swaraj #CheGuevaraRajan #Betting #KeralaPolitics #ViralVideo