ശരത് ലാൽ - കൃപേഷ് സ്മാരക സാംസ്കാരിക കേന്ദ്രം: നിർമ്മാണച്ചെലവ് കർണാടക പി സി സി വഹിക്കുമെന്ന് മന്ത്രി ജി പരമേശ്വര

പെരിയ: (KasargodVartha) ശരത് ലാൽ - കൃപേഷ് രക്തസാക്ഷികളുടെ പേരിൽ കല്യോട്ട് നിർമിക്കുന്ന സാംസ്കാരിക കേന്ദ്രത്തിൻ്റെ നിർമ്മാണച്ചെലവ് പൂർണമായും കർണാടക കോൺഗ്രസ് കമ്മിറ്റി വഹിക്കുമെന്ന് കർണാടക ആഭ്യന്തര മന്ത്രി ജി. പരമേശ്വര പ്രഖ്യാപിച്ചു.

ശരത് ലാൽ - കൃപേഷ് ഏഴാമത് രക്തസാക്ഷിത്വ ദിനാചരണത്തോടനുബന്ധിച്ച് ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ കല്യോട്ട് ശരത് ലാൽ - കൃപേഷ് നഗറിൽ നടന്ന അനുസ്മരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

മനുഷ്യനെ ഉന്മൂലനം ചെയ്തുകൊണ്ടുള്ള രാഷ്ട്രീയം കാലഹരണപ്പെട്ടതാണെന്നും നാടിൻ്റെ സ്വസ്ഥത തകർക്കുകയും പുരോഗതി തടസ്സപ്പെടുത്തുകയും ചെയ്യുന്ന പകയുടെ രാഷ്ട്രീയം സി.പി.എം. അവസാനിപ്പിക്കണമെന്നും ജി. പരമേശ്വര ആവശ്യപ്പെട്ടു. ഇന്ത്യയിൽ സി.പി.എം. ഭരണം നടത്തിയിടത്തെല്ലാം മനുഷ്യനോടുള്ള അസഹിഷ്ണുത മൂലം നാട്ടിൽ രക്തപ്പുഴ തീർത്തിട്ടുണ്ട്. അക്കാരണത്താൽ തന്നെ ജനങ്ങൾ കമ്മ്യൂണിസ്റ്റ് പാർട്ടിയെ നാട്ടിൽനിന്നും തുടച്ചുനീക്കുന്നുണ്ടെന്നും അദ്ദേഹം ഓർമിപ്പിച്ചു. വർഗീയ താൽപ്പര്യത്താൽ നാട്ടിൽ അനൈക്യം ഉണ്ടാക്കുന്ന ബി.ജെ.പി.യും രാഷ്ട്രീയത്തിൽ മനുഷ്യനെ കൊലപ്പെടുത്തുന്ന സി.പി.എം.ഉം ഒരു നാണയത്തിൻ്റെ രണ്ടു വശങ്ങളാണെന്നും മന്ത്രി പ്രസ്താവിച്ചു.

ഡി.സി.സി. പ്രസിഡൻ്റ് പി.കെ. ഫൈസൽ അധ്യക്ഷത വഹിച്ചു. രാജ്മോഹൻ ഉണ്ണിത്താൻ എം.പി. അനുസ്മരണ പ്രഭാഷണം നടത്തി. സംസ്ഥാന യൂത്ത് കോൺഗ്രസ് പ്രസിഡൻ്റ് ഓ.ജെ. ജനീഷ് മുഖ്യാതിഥിയായി സംസാരിച്ചു. ഡി.സി.സി. ജനറൽ സെക്രട്ടറി എം.സി. പ്രഭാകരൻ സ്വാഗതം പറഞ്ഞു.

കെ.പി.സി.സി. ജനറൽ സെക്രട്ടറിമാരായ കെ. നീലകണ്ഠൻ, ഹക്കീം കുന്നിൽ, യു.ഡി.എഫ്. ജില്ലാ കൺവീനർ എ. ഗോവിന്ദൻ നായർ, കോൺഗ്രസ് നേതാക്കളായ ടി.എം. ഷാഹിദ്, ബാലകൃഷ്ണൻ പെരിയ, കരിമ്പിൽ കൃഷ്ണൻ, ശാന്തമ്മ ഫിലിപ്പ്, മീനാക്ഷി ബാലകൃഷ്ണൻ, അഡ്വ. കെ.കെ. രാജേന്ദ്രൻ, പി.ജി. ദേവ്, ബി.പി. പ്രദീപ്കുമാർ, പി.വി. സുരേഷ്, രാജൻ പെരിയ, ധന്യാ സുരേഷ്, കെ.പി. പ്രകാശൻ, എം. കുഞ്ഞമ്പു നമ്പ്യാർ, സോമശേഖര ഷേണി, പി. കുഞ്ഞിക്കണ്ണൻ, ബലരാമൻ നമ്പ്യാർ, ലക്ഷ്മണ പ്രഭു, ഡി.എം.കെ. മുഹമ്മദ്, തോമസ് മാത്യു, കെ. വാരിജാക്ഷൻ, രാജു കട്ടക്കയം, സി.വി. ഭാവനൻ, കെ.വി. ഭക്തവത്സലൻ, ഉമേഷൻ ബെളൂർ, കെ.വി. വിജയൻ, മധുസൂദനൻ ബാലൂർ, മടിയൻ ഉണ്ണികൃഷ്ണൻ, ടി. ഗോപിനാഥൻ നായർ, കാർത്തികേയൻ പെരിയ, മിനി ചന്ദ്രൻ, എ. വാസുദേവൻ, ജവാദ് പുത്തൂർ, ദിവാകരൻ കരിച്ചേരി, പി. രാമചന്ദ്രൻ, അഡ്വ. എം.കെ. ബാബുരാജ്, രാജൻ അരിക്കര, ഇരിയ ഗോപാലൻ എന്നിവർ സംബന്ധിച്ചു.

രാഷ്ട്രീയ അനുസ്മരണ യോഗത്തിലെ പ്രസംഗത്തെയും പ്രഖ്യാപനങ്ങളെയും അടിസ്ഥാനപ്പെടുത്തിയുള്ള ഈ വാർത്ത ഷെയർ ചെയ്യൂ. പുതിയ വാര്‍ത്തകള്‍ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ.

Article Summary: Karnataka Home Minister G. Parameshwara announced that the Karnataka Pradesh Congress Committee (KPCC) will bear the entire construction cost of the Sharath Lal-Kripesh Memorial Cultural Centre. He made the announcement while inaugurating the 7th martyrdom anniversary meeting at Periya.

#Periya #SharathLal #Kripesh #Congress #GParameshwara #KarnatakaCongress #CPM #KasaragodNews #Politics