മഞ്ചേശ്വരം പഞ്ചായത്തിൽ 20 വാർഡുകളിൽ മത്സരിക്കാൻ എസ് ഡി പി ഐ തീരുമാനം

മഞ്ചേശ്വരം: (KasargodVartha) തദ്ദേശ തിരഞ്ഞെടുപ്പ് 2025-ൽ 'അവകാശങ്ങൾ അർഹരിലേക്ക്, അഴിമതിയില്ലാത്ത വികസനത്തിന്‌ എസ്.ഡി.പി.ഐക്ക് വോട്ട് ചെയ്യുക' എന്ന മുദ്രാവാക്യമുയര്‍ത്തി പാർട്ടി മത്സരിക്കുമെന്ന് എസ്.ഡി.പി.ഐ കാസർകോട് ജില്ലാ കമ്മിറ്റി അംഗവും മഞ്ചേശ്വരം പഞ്ചായത്തിൻ്റെ ചുമതലയുമുള്ള അഷ്‌റഫ് ബഡാജെ അറിയിച്ചു. വെള്ളിയാഴ്ച (2025 ഒക്ടോബർ 25) മഞ്ചേശ്വരം പ്രസ് ഫോറത്തില്‍ നടന്ന വാർത്താസമ്മേളനത്തിലാണ് അദ്ദേഹം ഈ പ്രഖ്യാപനം നടത്തിയത്.

സ്ഥാനാർഥികളുടെ പ്രഖ്യാപനം

മഞ്ചേശ്വരം ഗ്രാമ പഞ്ചായത്തിൽ മത്സരിക്കുന്ന സ്ഥാനാര്‍ത്ഥികളുടെ ആദ്യഘട്ട പട്ടിക അദ്ദേഹം പ്രഖ്യാപിച്ചു. പാർട്ടി മഞ്ചേശ്വരം മണ്ഡലം പ്രസിഡൻ്റ് ശരീഫ് പാവൂർ മച്ചംപാടി വാർഡിലും മണ്ഡലം ഓർഗനൈസർ യഅ്ഖൂബ് ഹൊസങ്കടി കജയിലും ജനവിധി തേടും. പഞ്ചായത്ത് കമ്മിറ്റി അംഗമായ ഹാരിസ് ഉദ്യാവരം കുണ്ടുകൊൾക വാർഡിലും എസ്.ഡി.പി.ഐയുടെ പിന്തുണയിൽ സ്വതന്ത്ര സ്ഥാനാർഥിയായി അബൂബക്കർ സിദ്ദീഖ് എന്ന റൈഷാദ് ഉദ്യാവരം ഗുത്തു വാർഡിൽ നിന്നും ജനവിധി തേടും.

20 വാർഡുകളിൽ മത്സരിക്കും

ത്രിതല പഞ്ചായത്ത് തിരഞ്ഞെടുപ്പിൽ മഞ്ചേശ്വരം ഗ്രാമ പഞ്ചായത്തിലെ 20 വാർഡുകളിൽ മത്സരിക്കാൻ എസ്.ഡി.പി.ഐ പഞ്ചായത്ത് തിരഞ്ഞെടുപ്പ് കമ്മിറ്റി തീരുമാനിച്ചു. മഞ്ചേശ്വരം ബ്ലോക്ക് പഞ്ചായത്തിലെ കുഞ്ചത്തൂർ, മഞ്ചേശ്വരം, ബഡാജെ ഡിവിഷനുകളിലും, ജില്ലാ പഞ്ചായത്തിലെ വോർക്കാടി, മഞ്ചേശ്വരം ഡിവിഷനുകളിലും സ്ഥാനാർഥിയെ മൽസരിപ്പിക്കും. കൂടുതൽ വാർഡുകളിലും എസ്.ഡി.പി.ഐ സ്ഥാനാർഥികൾക്ക് വിജയിക്കാനും ഭരണസമിതി രൂപീകരിക്കാനുമുള്ള രാഷ്ട്രീയ സാഹചര്യം പഞ്ചായത്തിലുണ്ട്.

ഭരണസഖ്യത്തിനെതിരെ വിമർശനം

നിലവിലുള്ള എസ്.ഡി.പി.ഐ ജനപ്രതിനിധികളുടെ പ്രവർത്തനം മാതൃകാപരമാണെന്നും ജനങ്ങൾക്കും വാർഡിനും പ്രയോജനകരമായിരുന്നുവെന്നും അഷ്‌റഫ് ബഡാജെ ചൂണ്ടിക്കാട്ടി. നിലവിലെ മുസ്ലിം ലീഗ് - കോൺഗ്രസ് - ബി ജെ പി സഖ്യം തുടരുന്ന ദുർഭരണം പഞ്ചായത്തിൻ്റെ വികസന മുന്നേറ്റത്തെ തടയിടുകയാണ് ചെയ്തതെന്നും ഇതിനെതിരെ പൊതുജനത്തിന് കടുത്ത അമർഷമുണ്ടെന്നും അദ്ദേഹം പറഞ്ഞു. ഭരണധാർഷ്ട്യത്തിന് അറുതി വരുത്താൻ വരുന്ന തിരഞ്ഞെടുപ്പിൽ വോട്ട് കരുതലോടെ വിനിയോഗിക്കണമെന്നും എസ്.ഡി.പി.ഐ സ്ഥാനാർഥികളുടെ വിജയത്തിന് ആവശ്യമായ സഹകരണവും പിന്തുണയും ഉണ്ടാവണമെന്നും അദ്ദേഹം അഭ്യർഥിച്ചു.

വാർത്താസമ്മേളനത്തിൽ എസ് ഡി പി ഐ ജില്ലാ കമ്മിറ്റി അംഗം അഷ്‌റഫ് ബഡാജെ, മഞ്ചേശ്വരം  മണ്ഡലം ആക്ടിങ് പ്രസിഡന്റ് ഇഖ്ബാൽ, സെക്രട്ടറി ഷബീർ, ഷംസുദീൻ മഞ്ചേശ്വരം, ഹാരിസ് സുബൈർ എന്നിവർ പങ്കെടുത്തു.

തദ്ദേശ തിരഞ്ഞെടുപ്പിലെ ഈ രാഷ്ട്രീയ നീക്കം വിജയകരമാകുമോ? നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: SDPI announces first phase candidates for Manjeshwaram local body polls 2025, contesting in 20 wards.

#SDPI #LocalBodyPolls #Manjeshwaram #KeralaPolitics #Kasaragod #Election2025