മഹാകവി ടി ഉബൈദ് സ്മാരക പുരസ്‌കാരം കെ സച്ചിദാനന്ദന് സമ്മാനിച്ചു: ഗാന്ധിയെ മറക്കാൻ നിർബന്ധിക്കുന്ന ഭരണകൂടം രാജ്യത്ത് - കെ സച്ചിദാനന്ദൻ

തൃശൂർ: (KasargodVartha) ഗാന്ധിജിയെ മറക്കാൻ നിർബന്ധിക്കുകയും അദ്ദേഹത്തെ വധിച്ചവരെ ആഘോഷിക്കാൻ ആവശ്യപ്പെടുകയും ചെയ്യുന്ന ഒരു ഭരണകൂടമാണ് രാജ്യത്ത് നിലവിലുള്ളതെന്ന് പ്രമുഖ കവിയും കേരള സാഹിത്യ അക്കാദമി പ്രസിഡന്റുമായ പ്രൊഫ. കെ. സച്ചിദാനന്ദൻ അഭിപ്രായപ്പെട്ടു. മഹാകവി ടി. ഉബൈദിന്റെ സ്മരണാർത്ഥം ദുബായ് കെ.എം.സി.സി കാസർകോട് ജില്ലാ കമ്മിറ്റി ഏർപ്പെടുത്തിയ ടി. ഉബൈദ് സ്മാരക സാഹിത്യ ശ്രേഷ്ഠ പുരസ്കാരം തൃശൂർ എം.ഐ.സി ഹാളിൽ വെച്ച് മുസ്‌ലിംലീഗ് സംസ്ഥാന ജനറൽ സെക്രട്ടറി പി.എം.എ. സലാമിൽ നിന്ന് ഏറ്റുവാങ്ങി സംസാരിക്കുകയായിരുന്നു അദ്ദേഹം.

ഇന്ത്യയുടെ ബഹുസ്വരതയെ തമസ്കരിക്കാൻ ശ്രമിക്കുമ്പോൾ പോലും കേരളം അതിന്റെ വൈവിധ്യം നിലനിർത്തുന്നുണ്ടെന്ന് സച്ചിദാനന്ദൻ പറഞ്ഞു. മലയാളം മാത്രമല്ല, അറബി മലയാളം, കന്നട, തുളു, കൊങ്കിണി, തമിഴ്, ആദിവാസി ഭാഷകൾ തുടങ്ങിയവയെല്ലാം കേരളത്തിന്റെ ഭാഗമാണ്. കേരളീയ നവോത്ഥാനത്തിന്റെ നെടുംതൂണുകളിലൊരാളായിരുന്ന ടി. ഉബൈദിന്റെ സാന്നിധ്യം ഈ സാംസ്കാരിക വൈവിധ്യത്തെ ഓർമ്മിപ്പിക്കുന്നു.

താനൊരു ഇടതുപക്ഷക്കാരനാണെന്നും തന്റെ കാഴ്ചപ്പാടുകളിൽ ഗാന്ധി, അക്ബർ, ബുദ്ധൻ തുടങ്ങിയവരുടെ കാരുണ്യവും ദയയും ആഴത്തിൽ പതിഞ്ഞുകിടക്കുന്നുണ്ടെന്നും സച്ചിദാനന്ദൻ കൂട്ടിച്ചേർത്തു. മുഗൾ കാലഘട്ടത്തിലെ ഭരണാധികാരികളുടെ പേരുള്ള റോഡുകൾ പോലും ഹിന്ദുത്വ ഭരണകൂടം മായ്ച്ചുകളയാൻ ശ്രമിക്കുകയാണ്. സ്നേഹത്തിന്റെയും സാഹോദര്യത്തിന്റെയും സഹിഷ്ണുതയുടെയും പ്രതീകമായി താൻ കണ്ടിരുന്ന ഇസ്‌ലാമിനെ, വെറുപ്പിന്റെ രാഷ്ട്രീയം പറഞ്ഞ് സംശയത്തിന്റെ നിഴലിലാക്കാൻ ശ്രമങ്ങൾ നടക്കുന്നു. ഭയമാണ് ഇന്ന് രാജ്യത്തെ നയിക്കുന്നത്. ഈ സാഹചര്യത്തിൽ നിർഭയത്വം ഏറ്റവും അത്യാവശ്യമാണ്. ഭരണകൂട ഭീകരതയെ അഹിംസയുടെ ശക്തികൊണ്ട് നേരിടണം. ജനാധിപത്യത്തെ വീണ്ടെടുക്കാൻ എല്ലാവരും ഒരുമിച്ച് നിൽക്കണമെന്നും അദ്ദേഹം ആഹ്വാനം ചെയ്തു.

അതേസമയം, വടക്കൻ കേരളത്തിലെ മുസ്‌ലിം വിഭാഗങ്ങൾക്കിടയിലെ നിരക്ഷരതയും അന്ധവിശ്വാസങ്ങളും തുടച്ചുനീക്കി വിദ്യാഭ്യാസത്തിലൂടെ സമൂഹത്തെ ഉയർത്തിക്കൊണ്ടുവരാൻ പ്രവർത്തിച്ച മഹാനായ കവിയായിരുന്നു ടി. ഉബൈദെന്ന് പുരസ്കാരം നൽകി സംസാരിച്ച പി.എം.എ. സലാം പറഞ്ഞു. ദുബായ് കെ.എം.സി.സി കാസർകോട് ജില്ലാ കമ്മിറ്റിയാണ് പരിപാടി സംഘടിപ്പിച്ചത്. ലോകത്തിലെ വിവിധ രാജ്യങ്ങളിൽ പ്രവർത്തിക്കുന്ന കെ.എം.സി.സി, ലാഭേച്ഛയില്ലാതെ സമൂഹത്തിന് വേണ്ടി സേവനങ്ങൾ ചെയ്യുന്നുണ്ടെന്ന് സലാം ചൂണ്ടിക്കാട്ടി. ജാതി-മത ഭേദമന്യേ നിർമ്മിച്ചുനൽകിയ ബൈത്തുറഹ്മ വീടുകൾ, സി.എച്ച്. സെന്ററുകൾ തുടങ്ങിയ കെ.എം.സി.സിയുടെ കാരുണ്യ പ്രവർത്തനങ്ങൾ അദ്ദേഹം വിശദീകരിച്ചു.

കെ.എം.സി.സി കാസർഗോഡ് ജില്ലാ പ്രസിഡന്റ് സലാം കന്യാപാടി അധ്യക്ഷനായി. മുസ്‌ലിം ലീഗ് തൃശൂർ ജില്ലാ പ്രസിഡന്റ് സി.എ. മുഹമ്മദ് അവാർഡ് ജേതാവിനെ പരിചയപ്പെടുത്തി. മുസ്‌ലിം ലീഗ് സംസ്ഥാന വൈസ് പ്രസിഡന്റ് സി.എച്ച്. റഷീദ്, കാസർകോട് ജില്ലാ പ്രസിഡന്റ് കല്ലട്ര മാഹിൻ ഹാജി, തൃശൂർ ജില്ലാ ജനറൽ സെക്രട്ടറി പി.എം. അമീർ, ഓണമ്പിള്ളി മുഹമ്മദ് ഫൈസി, കെ.ഇ.എ. ബക്കർ, മാഹിൻ കേളോട്ട്, എ. ഹമീദ് ഹാജി, കെ.സി.എം. ഷെരീഫ്, സിദ്ധീഖ് പള്ളിപുഴ, ടി.സി. കബീർ, അൻവർ കോളിയടുക്കം, ഹനീഫ് കട്ടക്കാൽ, സുബിൻ കോപ്പ, മുസ്‌ലിം ലീഗ് തൃശൂർ ജില്ലാ ഭാരവാഹികളായ ആർ.വി. അബ്ദുറഹീം, ഐ.ഐ. അബ്ദുൾ മജീദ്, അസീസ് താണിപാടം, പി.കെ. ഷാഹുൽ ഹമീദ്, എം. വിഷക്കീർ, സി.കെ. ജാഫർ സാദിഖ്, നൗഷാദ് വാളൂർ, പി.കെ. ബഷീർ, സംസ്ഥാന വർക്കിംഗ് കമ്മിറ്റി അംഗം എം.പി. കുഞ്ഞികോയ തങ്ങൾ, ജലീൽ വലിയകത്ത്, ദുബായ് കെ.എം.സി.സി നേതാക്കളായ മുഹമ്മദ് വെട്ടുകാട്, ബഷീർ വരവൂർ, മുസ്തഫ വടുതല എന്നിവർ പ്രസംഗിച്ചു. മുഹമ്മദ് ഖാളിയാർ ഖിറാഅത്ത് നടത്തി. കെ.എം.സി.സി കാസർകോട് ജില്ലാ ജനറൽ സെക്രട്ടറി ടി.ആർ. ഹനീഫ് സ്വാഗതവും ജില്ലാ വൈസ് പ്രസിഡന്റ് കെ.പി. അബ്ബാസ് കളനാട് നന്ദിയും പറഞ്ഞു.

സച്ചിദാനന്ദന്റെ വാക്കുകളെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കൂ.

Article Summary: K. Satchidanandan receives T. Ubaid Award, discusses Gandhi.

#KSatchidanandan, #TUbaidAward, #KeralaLiterature, #PoliticalCommentary, #KeralaNews, #KMCC