മുഖ്യമന്ത്രിക്ക് ധൈര്യമില്ല: ദേശീയപാത പരാതിയിൽ കേന്ദ്രത്തെ സമീപിച്ചില്ലെന്ന് രമേശ് ചെന്നിത്തല

കാഞ്ഞങ്ങാട്: (KasargodVartha) ദേശീയപാത നിർമാണത്തിൽ സംഭവിച്ച വൻ പാളിച്ചകൾക്ക് പ്രധാന ഉത്തരവാദികൾ കേന്ദ്ര-സംസ്ഥാന സർക്കാരുകളാണെന്ന് എഐസിസി വർക്കിംഗ് കമ്മിറ്റി അംഗം രമേശ് ചെന്നിത്തല ആരോപിച്ചു. 

നിർമാണക്കമ്പനികളിൽ നിന്ന് വൻ സാമ്പത്തിക ലാഭം കൈപ്പറ്റുന്നതിനായി ഒത്തുതീർപ്പുകൾ നടന്നതായും, റോഡ് പണി ആരംഭിച്ച ഘട്ടത്തിൽ അധികൃതരുടെ ഭാഗത്തുനിന്നും കാര്യക്ഷമമായ ഇടപെടലുകൾ ഇല്ലാത്തതുമാണ് കേരളത്തിലെ ദേശീയപാത നിർമാണത്തെ ദുരന്തമാക്കി മാറ്റിയതെന്നും അദ്ദേഹം കുറ്റപ്പെടുത്തി.

കാസർകോട് ജില്ലയിൽ പലയിടങ്ങളിലും നിർമാണത്തിൽ ഗുരുതരമായ പാളിച്ചകൾ സംഭവിച്ചിട്ടുണ്ട്. കാലവർഷത്തിന്റെ തുടക്കത്തിൽ തന്നെ റോഡിൽ വിള്ളലുകളും ഗർത്തങ്ങളും രൂപപ്പെട്ടെങ്കിൽ, മഴ കനക്കുമ്പോൾ ദേശീയപാതയുടെ സ്ഥിതി എന്താകുമെന്ന് ജനങ്ങൾ ആശങ്കപ്പെടുന്നതിൽ അതിശയോക്തിയില്ലെന്നും ചെന്നിത്തല ചൂണ്ടിക്കാട്ടി.

നിർമാണത്തിലുണ്ടായ പാളിച്ചകൾക്കപ്പുറം, റോഡ് നിർമാണത്തിന്റെ മറവിൽ കുന്നുകൾ തകർത്ത് ടൺ കണക്കിന് മണ്ണും കല്ലും നിർമാണക്കമ്പനിക്കാർ മറിച്ചുവിറ്റത് വലിയ പാരിസ്ഥിതിക പ്രത്യാഘാതങ്ങൾ ഉണ്ടാക്കിയിട്ടുണ്ടെന്നും അദ്ദേഹം പറഞ്ഞു.

ദേശീയപാത നിർമാണത്തിൽ അഭൂതപൂർവമായ പരാതികൾ കേരളത്തിൽ ഉയർന്നുവന്നപ്പോൾ പോലും, കേന്ദ്രമന്ത്രി നിതിൻ ഗഡ്കരിയോട് പരാതി പറയാനുള്ള ആർജവം മുഖ്യമന്ത്രി പിണറായി വിജയനും പൊതുമരാമത്ത് മന്ത്രി മുഹമ്മദ് റിയാസിനും ഉണ്ടായില്ലെന്നും രമേശ് ചെന്നിത്തല കുറ്റപ്പെടുത്തി.

കാസർകോട് ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ ദേശീയപാത നിർമാണത്തിലെ അഴിമതിക്കെതിരെയും അശാസ്ത്രീയമായ റോഡ് നിർമാണത്തിനെതിരെയും നടത്തുന്ന രണ്ടാം ഘട്ട സമരപരിപാടിയുടെ ഭാഗമായി കാഞ്ഞങ്ങാട്, ദേശീയപാത ജംഗ്ഷൻ കുളിയങ്കാലിൽ നടന്ന പ്രതിഷേധ സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 

ഡിസിസി പ്രസിഡന്റ് പി.കെ. ഫൈസൽ അധ്യക്ഷത വഹിച്ചു. ഡിസിസി ജനറൽ സെക്രട്ടറി എം.സി. പ്രഭാകരൻ സ്വാഗതം പറഞ്ഞു. മുൻ ഡിസിസി പ്രസിഡന്റ് ഹക്കീം കുന്നിൽ, നേതാക്കളായ എ. ഗോവിന്ദൻ നായർ, കെ. നീലകണ്ഠൻ, എം. അസിനാർ, രമേശൻ കരുവാച്ചേരി, കരിമ്പിൽ കൃഷ്ണൻ, മീനാക്ഷി ബാലകൃഷ്ണൻ, ഡോ. ഖാദർ മാങ്ങാട്, സാജിദ് മവ്വൽ, അഡ്വ. കെ.കെ. രാജേന്ദ്രൻ, ജയിംസ് പന്തമാക്കൽ, ബി.പി. പ്രദീപ് കുമാർ, അഡ്വ. പി.വി. സുരേഷ്, ടോമി പ്ലാച്ചേരി, കെ.വി. സുധാകരൻ, കെ.പി. പ്രകാശൻ, ഗീത കൃഷ്ണൻ, സുന്ദര ആരിക്കാടി, ധന്യ സുരേഷ്, കെ. ഖാലിദ്, പി. കുഞ്ഞിക്കണ്ണൻ, കെ.വി. വിജയൻ, മഡിയൻ ഉണ്ണികൃഷ്ണൻ, ജോയ് ജോസഫ്, മധുസൂദനൻ ബാലൂർ, ഉമേശൻ വേളൂർ, കെ.വി. ഭക്തവത്സലൻ, ടി. ഗോപിനാഥൻ നായർ, എം. രാജീവൻ നമ്പ്യാർ, മനാഫ് നുള്ളിപ്പാടി, കെ.ആർ. കാർത്തികേയൻ, മിനി ചന്ദ്രൻ, ജവാദ് പുത്തൂർ, കെ.കെ. ബാബു, എം.വി. ഉദ്ദേശ് കുമാർ, എ. വാസുദേവൻ എന്നിവർ സംസാരിച്ചു.

ദേശീയപാത നിർമാണത്തിലെ പാളിച്ചകളെക്കുറിച്ച് രമേശ് ചെന്നിത്തലയുടെ ആരോപണങ്ങളെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Ramesh Chennithala alleges that both central and state governments are responsible for the failures in national highway construction in Kerala, criticizing the Chief Minister for not approaching the Union Minister about the complaints.

#KeralaPolitics, #NationalHighway, #RameshChennithala, #PinarayiVijayan, #Corruption, #Infrastructure