രാഹുൽ ഗാന്ധിയുടെ സുരക്ഷയിൽ ആശങ്ക പ്രകടിപ്പിച്ച് സിആർപിഎഫ് മല്ലികാർജുൻ ഖാർഗെക്ക് കത്ത് നൽകി

ന്യൂഡൽഹി: (KasargodVartha) രാഹുൽ ഗാന്ധി ജനങ്ങൾക്കിടയിലേക്ക് ഇറങ്ങി ചെല്ലുന്ന പൊതു പരിപാടികളിൽ അതീവ സുരക്ഷാ ഭീഷണിയുണ്ടെന്ന് കാണിച്ച് സിആർപിഎഫ് ഉദ്യോഗസ്ഥർ കോൺഗ്രസ് അധ്യക്ഷൻ മല്ലികാർജുൻ ഖാർഗെക്ക് കത്ത് നൽകി. ബിഹാറിനെ പിടിച്ചുകുലുക്കിയ വോട്ടവകാശ യാത്രയടക്കമുള്ള പരിപാടികളിലെ ജനക്കൂട്ടത്തെ ചൂണ്ടിക്കാട്ടിയാണ് സിആർപിഎഫിന്റെ ആശങ്ക.

മോദി സർക്കാർ മൂന്നാമതും അധികാരത്തിൽ വന്ന ശേഷം എസ്പിജി സുരക്ഷ പിൻവലിച്ചതോടെ കേന്ദ്ര ആഭ്യന്തര മന്ത്രാലയത്തിന് കീഴിലുള്ള സിആർപിഎഫിനാണ് രാഹുൽ ഗാന്ധിയുടെ സുരക്ഷാ ചുമതല.

വിദേശ യാത്രകളടക്കം എല്ലാ നീക്കങ്ങളും മുൻകൂട്ടി സുരക്ഷാ വിഭാഗത്തെ അറിയിക്കണമെന്നും എങ്കിൽ മാത്രമേ മതിയായ സുരക്ഷ നൽകാൻ കഴിയുകയുള്ളൂവെന്നും സിആർപിഎഫ് ഉദ്യോഗസ്ഥർ കോൺഗ്രസ് അധ്യക്ഷന് നൽകിയ കത്തിൽ വ്യക്തമാക്കി.

'ഇസഡ് പ്ലസ്' കാറ്റഗറി സുരക്ഷയാണ് രാഹുലിന് ഇപ്പോൾ നൽകുന്നത്. എന്നാൽ നിർബന്ധമായും പാലിക്കേണ്ട മുൻകരുതലുകൾ പലപ്പോഴും രാഹുൽ ഗാന്ധി ഒഴിവാക്കുകയാണെന്നും സിആർപിഎഫ് കത്തിൽ കുറ്റപ്പെടുത്തുന്നുണ്ട്.

എന്നാൽ സിആർപിഎഫിന്റെ കത്തിനും ഇതിനായി തിരഞ്ഞെടുത്ത സമയത്തിനും എതിരെ കോൺഗ്രസ് രംഗത്തെത്തി. രാജ്യത്തെ വോട്ട് കൊള്ളക്കെതിരെ രാഹുൽ നടത്തുന്ന ബഹുജന മുന്നേറ്റത്തിൽ വിളറിപൂണ്ടാണ് തിരഞ്ഞെടുപ്പ് കമ്മീഷന്റെ മൗനാനുവാദത്തോടെ സിആർപിഎഫ് ഇത്തരത്തിൽ ഒരു കത്ത് അയച്ചതെന്നാണ് കോൺഗ്രസ് ആരോപണം.

ഉടൻതന്നെ ബിജെപി സർക്കാരിനെതിരെ 'ഹൈഡ്രജൻ ബോംബ്' പൊട്ടിക്കുമെന്ന് പ്രഖ്യാപിച്ച പ്രതിപക്ഷ നേതാവ് രാഹുൽ ഗാന്ധിയെ ഭയപ്പെടുത്താൻ തിരശ്ശീലക്ക് പിന്നിലുള്ള നീക്കമാണോ സിആർപിഎഫിന്റേതെന്ന് സംശയിക്കേണ്ടിയിരിക്കുന്നുവെന്ന് കോൺഗ്രസ് നേതാവ് പവൻ ഖേര പറഞ്ഞു.

രാഹുൽ ഗാന്ധിയുടെ സുരക്ഷാ വിഷയത്തെക്കുറിച്ചുള്ള ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെയ്ക്കൂ.

Article Summary: CRPF expresses concern over Rahul Gandhi's security in a letter to Kharge.

#RahulGandhi #CRPF #SecurityAlert #IndianPolitics #Congress #CRPFLetter