പുല്ലൂർ–പെരിയയിൽ വൈസ് പ്രസിഡന്റ് സ്ഥാനം കോൺഗ്രസിന്; സിപിഎം അംഗത്തിന്റെ വോട്ട് അസാധുവായി

പെരിയ: (KasargodVartha) പുല്ലൂർ–പെരിയ ഗ്രാമപഞ്ചായത്ത് വൈസ് പ്രസിഡന്റ് സ്ഥാനത്തേക്ക് കോൺഗ്രസ് സ്ഥാനാർത്ഥിയായ മുൻ ബ്ലോക്ക് പഞ്ചായത്ത് അംഗം അഡ്വ എം കെ ബാബുരാജ് തിരഞ്ഞെടുക്കപ്പെട്ടു. തിങ്കളാഴ്ച നടന്ന വോട്ടെടുപ്പിലാണ് നാടകീയ നീക്കങ്ങൾക്കൊടുവിൽ യുഡിഎഫ് വിജയം കണ്ടത്.

വൈസ് പ്രസിഡന്റ് തിരഞ്ഞെടുപ്പിൽ സിപിഎമ്മിലെ ഏ കൃഷ്ണനായിരുന്നു എതിർ സ്ഥാനാർത്ഥി. സിപിഎമ്മിന്റെ 13-ാം വാർഡായ തട്ടുമ്മൽ അംഗം നളിനിയുടെ വോട്ട് അസാധുവായതോടെയാണ് ഫലം മാറിയത്. ഇതോടെ അഡ്വ എം കെ ബാബുരാജിന് ഒൻപത് വോട്ടും ഏ കൃഷ്ണന് എട്ട് വോട്ടും ലഭിച്ചു. ബിജെപിയുടെ ഏക അംഗം വോട്ടെടുപ്പിൽ നിന്ന് വിട്ടുനിന്നു.

തിങ്കളാഴ്ച രാവിലെ നടന്ന പ്രസിഡന്റ് തിരഞ്ഞെടുപ്പിൽ യുഡിഎഫിനും എൽഡിഎഫിനും ഒൻപത് വീതം വോട്ടുകൾ ലഭിച്ച് തുല്യത നിലനിന്നിരുന്നു. തുടർന്ന് നടന്ന നറുക്കെടുപ്പിൽ സിപിഎമ്മിലെ സി കെ സബിത പ്രസിഡന്റായി തിരഞ്ഞെടുക്കപ്പെട്ടു.

പ്രസിഡന്റ് സ്ഥാനം എൽഡിഎഫിനും വൈസ് പ്രസിഡന്റ് സ്ഥാനം യുഡിഎഫിനും ലഭിച്ചതോടെ പുല്ലൂർ–പെരിയ ഗ്രാമപഞ്ചായത്തിൽ സംയുക്ത ഭരണമാണ് നിലവിൽ വരുന്നത്.

പുല്ലൂർ-പെരിയയിലെ ഈ രാഷ്ട്രീയ അട്ടിമറിയെക്കുറിച്ച് നിങ്ങളുടെ അഭിപ്രായം താഴെ രേഖപ്പെടുത്തൂ. വാർത്ത ഷെയർ ചെയ്യൂ. 

Article Summary: Congress candidate Adv MK Baburaj elected as Vice President of Pullur-Periya Panchayat after CPM vote invalidation.

#PullurPeriya #KasaragodNews #LocalBodyElection #KeralaPolitics #Congress #CPM