’സ്വർണ്ണക്കൊള്ള കേസ് അട്ടിമറിക്കാൻ അനുവദിക്കില്ല’; കാസർകോട്ട് ഡിസിസി മാർച്ചിൽ പ്രതിഷേധം ഇരമ്പി; പ്രവർത്തകരെ പിരിച്ചുവിടാൻ പൊലീസ് ജലപീരങ്കി ഉപയോഗിച്ചു

കാസർകോട്: (KasargodVartha) ശബരിമല സ്വർണ്ണക്കൊള്ളക്കേസിലെ അന്വേഷണം അട്ടിമറിക്കാനുള്ള നീക്കത്തിൽ പ്രതിഷേധിച്ച് ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ കാസർകോട് കലക്ട്രേറ്റിലേക്ക് നടത്തിയ മാർച്ചിൽ സംഘർഷം. പ്രതിഷേധവുമായെത്തിയ പ്രവർത്തകർക്ക് നേരെ പൊലീസ് ജലപീരങ്കി പ്രയോഗിച്ചു. കെപിസിസി ആഹ്വാന പ്രകാരമായിരുന്നു സമരം സംഘടിപ്പിച്ചത്.

മധൂർ റോഡ് ജംഗ്ഷനിൽ നിന്ന് പ്രകടനമായാണ് പ്രവർത്തകർ കലക്ട്രേറ്റിലേക്ക് എത്തിയത്. സ്ത്രീകളടക്കം നൂറുകണക്കിനാളുകൾ മാർച്ചിൽ പങ്കെടുത്തു. തുടർന്ന് നടന്ന പ്രതിഷേധ യോഗം രാജ്‌മോഹൻ ഉണ്ണിത്താൻ എംപി ഉദ്ഘാടനം ചെയ്തു. ശബരിമലയിലെ സ്വർണ്ണക്കൊള്ളയുമായി ബന്ധപ്പെട്ട കേസ് അട്ടിമറിക്കാനാണ് സർക്കാർ ശ്രമിക്കുന്നതെന്ന് അദ്ദേഹം കുറ്റപ്പെടുത്തി.

ബാരിക്കേഡ് മറികടക്കാൻ ശ്രമം

ഉദ്ഘാടനത്തിന് ശേഷം പ്രവർത്തകർ സംഘടിച്ച് മുദ്രാവാക്യം മുഴക്കുകയും പൊലീസ് സ്ഥാപിച്ച ബാരിക്കേഡിന് മുകളിൽ കയറി പ്രതിഷേധിക്കുകയും ചെയ്തു. പ്രവർത്തകർ ബാരിക്കേഡ് മറികടക്കാൻ ശ്രമിച്ചതോടെയാണ് പൊലീസ് ജലപീരങ്കി പ്രയോഗിച്ചത്. ഇതോടെ സ്ഥലത്ത് അല്പസമയം സംഘർഷാവസ്ഥ ഉടലെടുത്തു.

നേതൃത്വം

ഡിസിസി പ്രസിഡൻ്റ് പി.കെ ഫൈസൽ യോഗത്തിൽ അധ്യക്ഷത വഹിച്ചു. കെപിസിസി ജനറൽ സെക്രട്ടറി ഹക്കീം കുന്നിൽ, നേതാക്കളായ കരിമ്പിൽ കൃഷ്ണൻ, എം.സി പ്രഭാകരൻ, പി.വി സുരേഷ്, അഡ്വ. കെ.കെ രാജേന്ദ്രൻ, ബി.പി പ്രദീപ് കുമാർ, കാർത്തികേയൻ പെരിയ, ജെ.എസ് സോമശേഖരഷേണി തുടങ്ങിയവർ മാർച്ചിന് നേതൃത്വം നൽകി.

കാസർകോട്ട് കോൺഗ്രസ് പ്രവർത്തകർക്ക് നേരെ നടന്ന ജലപീരങ്കി പ്രയോഗത്തെ നിങ്ങൾ എങ്ങനെ കാണുന്നു? ങ്ങളുടെ അഭിപ്രായം കമന്റ് ചെയ്യൂ.

Article Summary: Police used water cannons to disperse Congress workers during a march to the Kasaragod Collectorate, organized by the DCC to protest the alleged sabotage of the Sabarimala gold theft case investigation.

#Kasaragod #CongressProtest #SabarimalaGoldCase #RajmohanUnnithan #DCCMarch #KeralaPolitics