പോലീസിനെതിരായ ഭീഷണി ജനാധിപത്യത്തോടുള്ള വെല്ലുവിളി: യുഡിഎഫ്

കുമ്പള: (KasargodVartha) പൊതുപണിമുടക്ക് ദിനത്തിൽ സീതാംഗോളിയിൽ കടകൾ അടപ്പിക്കുകയും വാഹനങ്ങൾ തടയുകയും ചെയ്ത സി.പി.എം. പ്രവർത്തകരുടെ അതിക്രമങ്ങളെ ധീരമായി നേരിട്ട്, പ്രതികളെ അറസ്റ്റ് ചെയ്ത് ജയിലിലടച്ച കുമ്പള പോലീസിന്റെ നടപടിയെ യു.ഡി.എഫ്. മഞ്ചേശ്വരം നിയോജക മണ്ഡലം ചെയർമാൻ അസീസ് മരിക്കെയും ജനറൽ കൺവീനർ മഞ്ചുനാഥ ആൾവയും അഭിനന്ദിച്ചു.

പോലീസ് ഉദ്യോഗസ്ഥരെ സ്റ്റേഷനിൽ കയറി കായികമായി കൈകാര്യം ചെയ്യുമെന്ന സി.പി.എം. ഏരിയ സെക്രട്ടറിയുടെ ഭീഷണി പ്രസംഗം പൊതുസമൂഹത്തോടുള്ള വെല്ലുവിളിയാണെന്ന് യു.ഡി.എഫ്. നേതാക്കൾ പ്രസ്താവനയിൽ പറഞ്ഞു. 

ഭരണത്തിന്റെ തണലിൽ മൈക്ക് ലഭിക്കുമ്പോൾ എന്തും വിളിച്ചുപറയാമെന്ന ധിക്കാരപരമായ നിലപാടാണിത്. ജനദ്രോഹ ഭരണത്തിൽ അണികൾ കൊഴിഞ്ഞുപോകുന്നത് തടയാനാണ് ഇത്തരം പ്രസ്താവനകളെന്നും അവർ കുറ്റപ്പെടുത്തി.

സത്യസന്ധമായി ജോലി ചെയ്യുന്ന പോലീസ് ഉദ്യോഗസ്ഥരുടെ മനോവീര്യം കെടുത്താനേ ഇത്തരം ഭീഷണികൾക്ക് കഴിയൂ. നാടിന്റെ സമാധാനാന്തരീക്ഷം തകർക്കാൻ ശ്രമിക്കുന്ന ഇത്തരം നേതാക്കന്മാരെ പിടിച്ചു കെട്ടാൻ സി.പി.എം. സംസ്ഥാന നേതൃത്വം മുന്നോട്ട് വരണം. 

പോലീസ് സ്റ്റേഷനിൽ കയറി സത്യസന്ധമായി ജോലി ചെയ്യുന്ന ഉദ്യോഗസ്ഥർക്ക് സംരക്ഷണം നൽകാൻ യു.ഡി.എഫ്. പ്രവർത്തകർ നിർബന്ധിതരാകുമെന്നും നേതാക്കൾ കൂട്ടിച്ചേർത്തു.

പോലീസിനെതിരായ ഈ ഭീഷണിയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക 

Article Summary: UDF condemns CPM leader's threat against police.

#KeralaPolitics #UDF #CPM #PoliceThreat #Democracy #Kasaragod