'എന്റെ സുഹൃത്തുക്കളെ'; പുത്തരിക്കണ്ടത്ത് മലയാളത്തിൽ തുടങ്ങി മോദി; കേരള വികസനത്തിന് പുതിയ ദിശാബോധം നൽകുമെന്ന് പ്രഖ്യാപനം

തിരുവനന്തപുരം: (KasargodVartha) മിഷൻ കേരളയുമായി തലസ്ഥാനത്ത് എത്തിയ പ്രധാനമന്ത്രി നരേന്ദ്ര മോദി സംസ്ഥാനത്തിന്റെ വികസനത്തിന് ഇന്ന് മുതൽ പുതിയ ദിശാബോധം നൽകുമെന്ന് പ്രഖ്യാപിച്ചു. വിമാനത്താവളത്തിൽ നിന്നും റോഡ് ഷോയായി പുത്തരിക്കണ്ടം മൈതാനത്തെത്തിയ അദ്ദേഹം 'എന്റെ സുഹൃത്തുക്കളെ' എന്ന് മലയാളത്തിൽ അഭിസംബോധന ചെയ്താണ് പ്രസംഗം ആരംഭിച്ചത്. വികസിത ഭാരതത്തിനായി രാജ്യം മുഴുവൻ ശ്രമിക്കുകയാണെന്നും കേന്ദ്രസർക്കാർ എപ്പോഴും കേരളത്തിലെ ജനങ്ങൾക്കൊപ്പമാണെന്നും അദ്ദേഹം വ്യക്തമാക്കി.

റോഡ് ഷോയും സ്വീകരണവും

രാവിലെ 11 മണിയോടെയാണ് ബി.ജെ.പി പ്രവർത്തകരെ ആവേശത്തിലാഴ്ത്തി മോദിയുടെ റോഡ് ഷോ ആരംഭിച്ചത്. വിമാനത്താവളത്തിൽ എത്തിയ പ്രധാനമന്ത്രിയെ മുഖ്യമന്ത്രി പിണറായി വിജയനും ഗവർണർ ആരിഫ് മുഹമ്മദ് ഖാനും ചേർന്നാണ് സ്വീകരിച്ചത്. കേന്ദ്രസർക്കാരിന് നന്ദി പറഞ്ഞ മുഖ്യമന്ത്രി കേരളത്തിന്റെ കൂടുതൽ ആവശ്യങ്ങൾ പരിഗണിക്കുമെന്നാണ് പ്രതീക്ഷയെന്ന് പറഞ്ഞു. തുടർന്ന് നടന്ന റോഡ് ഷോയിൽ പ്രധാനമന്ത്രിയെ കാണാൻ റോഡിനിരുവശവും നിരവധി പ്രവർത്തകരാണ് കാത്തുനിന്നത്. റോഡ് ഷോയിലുടനീളം പ്രവർത്തകരെ പ്രധാനമന്ത്രി കൈവീശി അഭിവാദ്യം ചെയ്തു.

വികസന പദ്ധതികളും പ്രഖ്യാപനങ്ങളും

പുത്തരിക്കണ്ടം മൈതാനത്ത് നടന്ന ചടങ്ങിൽ വേദിയിൽ വെച്ച് നിരവധി പദ്ധതികൾക്ക് പ്രധാനമന്ത്രി തറക്കല്ലിട്ടു. ശ്രീചിത്രയിൽ റേഡിയോ ചികിത്സാ സെന്ററിന് തറക്കല്ലിട്ട അദ്ദേഹം മൂന്ന് അമൃത് ഭാരത് ട്രെയിനുകൾ ഫ്ലാഗ് ഓഫ് ചെയ്തു. നഗരത്തിലെ പാവപ്പെട്ട കുടുംബങ്ങൾക്കായി സർക്കാർ ഒത്തിരി കാര്യങ്ങൾ ചെയ്യുന്നുണ്ടെന്ന് മോദി പറഞ്ഞു. കേരളത്തിലെ നഗരങ്ങളിലെ ദരിദ്ര കുടുംബങ്ങൾക്കും ആവാസ് യോജന വഴി വീട് ലഭിച്ചതായി അദ്ദേഹം ചൂണ്ടിക്കാട്ടി.

മുമ്പ് ധനികരുടെ കൈകളിൽ മാത്രമായിരുന്നു ക്രെഡിറ്റ് കാർഡ് ഉണ്ടായിരുന്നതെന്നും എന്നാൽ ഇപ്പോൾ തെരുവ് കച്ചവടക്കാരുടെ കൈകളിലും ക്രെഡിറ്റ് കാർഡ് എത്തിയെന്നും മോദി പറഞ്ഞു. കേരളത്തിൽ ഗുണഭോക്താക്കളായി 10,000 പേരുണ്ടെന്നും തിരുവനന്തപുരത്ത് 600-ൽ അധികം പേരുണ്ടെന്നും അദ്ദേഹം കൂട്ടിച്ചേർത്തു. പി.എം സ്വാനിധി പദ്ധതിയിലേക്ക് കേരളത്തെയും ഉൾപ്പെടുത്തും. ഇത് തൃശൂർ - ഗുരുവായൂർ പാസഞ്ചർ തീർഥാടകർക്ക് സഹായകരമാകും.

സൗഹൃദം പുതുക്കി

തന്റെ പഴയ സുഹൃത്താണ് വി.വി. രാജേഷ് എന്ന് മോദി പ്രസംഗത്തിനിടെ പ്രത്യേകം പരാമർശിച്ചു. ജനങ്ങൾ ബി.ജെ.പി യോഗത്തിലെ പ്രസംഗത്തിനായി തന്നെ കാത്തിരിക്കുകയാണെന്നും, ബി.ജെ.പി വേദിയിൽ കൂടുതൽ കാര്യങ്ങൾ വിശദമായി സംസാരിക്കാമെന്നും പറഞ്ഞു കൊണ്ടാണ് മോദി ഔദ്യോഗിക പരിപാടിയിലെ പ്രസംഗം അവസാനിപ്പിച്ചത്. കോർപ്പറേഷനിൽ അധികാരത്തിലേറിയാൽ 45 ദിവസത്തിനകം പ്രധാനമന്ത്രിയെ തലസ്ഥാനത്ത് കൊണ്ടുവരുമെന്ന് ബി.ജെ.പി സംസ്ഥാന അധ്യക്ഷൻ രാജീവ് ചന്ദ്രശേഖർ നേരത്തെ പ്രഖ്യാപിച്ചിരുന്നു. തിരുവനന്തപുരം നഗര വികസനത്തിന് ബൃഹദ് മാർഗരേഖയുമായാണ് പ്രധാനമന്ത്രിയുടെ സന്ദർശനം. അതിവേഗ റെയിൽ പ്രഖ്യാപനം ഉൾപ്പെടെ ഉണ്ടാകുമെന്ന സൂചനയും പുറത്തുവന്നിരുന്നു.

തമിഴ്നാട്ടിലേക്ക്

കേരളത്തിലെ പരിപാടികൾക്ക് ശേഷം എൻ.ഡി.എയുടെ തെരഞ്ഞെടുപ്പ് പ്രചാരണത്തിന് തുടക്കം കുറിക്കാൻ പ്രധാനമന്ത്രി തമിഴ്നാട്ടിലേക്ക് പോകും. ചെങ്കൽപ്പേട്ടിൽ ഉച്ചയ്ക്ക് ശേഷം മൂന്നിന് തുടങ്ങുന്ന റാലിയിൽ അദ്ദേഹം പങ്കെടുക്കും. എടപ്പാടി പളനിസാമി, ടി.ടി.വി. ദിനകരൻ, അൻപുമണി രാമദാസ് തുടങ്ങിയ ഘടകക്ഷി നേതാക്കളും റാലിയിൽ അണിനിരക്കും. അഴിമതി, കുടുംബാധിപത്യം, ഹൈന്ദവ വിശ്വാസികൾക്കെതിരായ പീഡനം തുടങ്ങിയ ആരോപണങ്ങൾ ഉന്നയിച്ച് ഡി.എം.കെ സർക്കാരിനെതിരെ മോദി കടന്നാക്രമണം നടത്തുമെന്നാണ് സൂചന. പൊതുയോഗത്തിന് ശേഷം വൈകിട്ട് അഞ്ച് മണിയോടെ മോദി ഡൽഹിക്ക് മടങ്ങും.

 'കേരള വികസനത്തിന് പുതിയ ദിശാബോധം' എന്ന പ്രഖ്യാപനത്തെ നിങ്ങൾ എങ്ങനെ നോക്കിക്കാണുന്നു? അഭിപ്രായം കമന്റ് ചെയ്യൂ.

Article Summary: PM Narendra Modi arrived in Thiruvananthapuram for Mission Kerala, addressing the crowd in Malayalam as "My friends". He launched development projects and flagged off Amrit Bharat trains.

#PMModi #KeralaVisit #MissionKerala #Thiruvananthapuram #AmritBharat #Development