Protest | 'പിണറായി വിജയൻ സർക്കാർ മാഫിയകളുടെ സംരക്ഷകൻ': പ്രതിഷേധ പ്രകടനം സംഘടിപ്പിച്ച് കോൺഗ്രസ്

കാഞ്ഞങ്ങാട്: (KasargodVartha) കേരളത്തെ സമസ്ത മേഖലകളിലും പിന്നോട്ടടിച്ച ഭരണത്തലവനായി പിണറായി വിജയൻ മാറിയെന്ന് കാസർകോട് ഡിസിസി പ്രസിഡന്റ് പി.കെ. ഫൈസൽ ആരോപിച്ചു.

സ്ത്രീ സുരക്ഷയെക്കുറിച്ച് പ്രചരിപ്പിച്ചുകൊണ്ട് അധികാരത്തിലെത്തിയ സർക്കാർ, വാസ്തവത്തിൽ സ്ത്രീകളെ അപമാനിക്കുന്നവരെ സംരക്ഷിക്കുകയാണെന്നും, ഓണക്കാലത്ത് പോലും വിലക്കയറ്റം നിയന്ത്രിക്കാൻ കഴിയാത്ത ഒരു സർക്കാരാണിത് എന്നും അദ്ദേഹം ആരോപിച്ചു. കൂടാതെ, കുറ്റകൃത്യങ്ങൾ ചെയ്യുന്ന പോലീസ് മേധാവികളെയും മാഫിയകളെയും സംരക്ഷിക്കുന്ന മുഖ്യമന്ത്രിയായി പിണറായി വിജയൻ മാറിയിരിക്കുന്നുവെന്നും അദ്ദേഹം കുറ്റപ്പെടുത്തി.

മാഫിയകളുടെ സംരക്ഷകനായ മുഖ്യമന്ത്രി രാജിവെക്കണമെന്നും, തൃശ്ശൂർ പൂരത്തിൽ നടന്ന ഗൂഢാലോചനയിൽ ഉൾപ്പെട്ടവർക്കെതിരെ നടപടിയെടുക്കണമെന്നും, ആഭ്യന്തര വകുപ്പിന്റെ ക്രിമിനലൈസേഷൻ അവസാനിപ്പിക്കണമെന്നും, വിലക്കയറ്റം നിയന്ത്രിക്കാൻ സർക്കാർ അടിയന്തരമായി ഇടപെടണമെന്നും ആവശ്യപ്പെട്ടുകൊണ്ട് കെപിസിസിയുടെ ആഹ്വാനപ്രകാരം നടത്തപ്പെടുന്ന പ്രതിഷേധ പ്രകടനംകാഞ്ഞങ്ങാട് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

കാഞ്ഞങ്ങാട് മണ്ഡലം കോൺഗ്രസ് കമ്മിറ്റി പ്രസിഡന്റ് കെ.പി. ബാലകൃഷ്ണൻ അധ്യക്ഷത വഹിച്ച ചടങ്ങിൽ, രമേശൻ കരുവാച്ചേരി, ഉമേശൻ വേളൂർ, പി.സി. സുരേന്ദ്രൻ നായർ, കെ.കെ. ബാബു, വി. ഗോപി, എം. കുഞ്ഞികൃഷ്ണൻ, എച്ച്. ഭാസ്കരൻ, കെ.പി. മോഹനൻ, രാജഗോപാലൻ വാഴുന്നോറടി, അനിൽ വാഴുന്നോറടി, പി. സരോജ, എ.വി. കമ്മാടത്ത് ശരത്ത്, മരക്കാപ്പ് രവീന്ദ്രൻ ചേടിറോഡ്, എം.എൻ. നാരായണൻ, പി.വി. ചന്ദ്രശേഖരൻ, സുരേഷ് കൊട്രച്ചാൽ എന്നിവർ സംസാരിച്ചു.

പിണറായി ആർ എസ് എസ് ബന്ധം മറയ്ക്കാനാണ് എഡിജിപിയെയെ സംരക്ഷിക്കുന്നത്: പി എ അശ്റഫലി

കാസർകോട്: ഭരണപക്ഷ എംഎൽഎമാർ തന്നെ ഗുരുതര ആരോപണങ്ങൾ ഉന്നയിച്ച എഡിജിപിയെ മുഖ്യമന്ത്രി സംരക്ഷിക്കുന്നത്, ആർ എസ് എസുമായുള്ള രഹസ്യ ബന്ധം പുറത്തുവരുമെന്ന ഭയം കൊണ്ടാണെന്ന് കെപിസിസി അംഗം പി.എ. അഷ്‌റഫലി ആരോപിച്ചു.

കെപിസിസി നിർദേശപ്രകാരം കാസർകോട് മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ നടത്തിയ പന്തം കൊളുത്തി പ്രകടനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. മണ്ഡലം പ്രസിഡണ്ട് അഡ്വ. ഷാജിദ് കമ്മാടം അധ്യക്ഷത വഹിച്ച പരിപാടിയിൽ എഐസിസി കോർഡിനേറ്റർ മനാഫ് നുള്ളിപ്പാടി, ജി. നാരായണൻ, ജവാദ് പുത്തൂർ, ഷാഹുൽഹമീദ് എ, ഉസ്മാൻ അണങ്കൂർ, ആബിദ് എടച്ചേരി, മുനീർ ബാങ്കോട്, സുഭാഷ് നാരായണൻ, ഹരീന്ദ്രൻ ഇറക്കോടൻ, രൂപേഷ് കടപ്പുറം, മുകുന്ദൻ, ബാബു തുടങ്ങിയവർ പങ്കെടുത്തു.

#CongressProtest, #KeralaPolitics, #PinarayiVijayan, #MafiaProtection, #PriceHike, #WomenSafety