കേന്ദ്ര സർക്കാർ കേരളത്തെ ശ്വാസം മുട്ടിക്കുന്നു; അതിവേഗ റെയിൽപ്പാത നിഷേധിച്ചത് രാഷ്ട്രീയ പകപോക്കലെന്ന് മുഖ്യമന്ത്രി പിണറായി വിജയൻ; എൽഡിഎഫ് വികസന മുന്നേറ്റ ജാഥ ഉദ്ഘാടനം ചെയ്തു

കുമ്പള: (KasargodVartha) കേരളം ഇന്ന് നേരിടുന്ന ഏറ്റവും ഗുരുതരമായ പ്രശ്നം കേന്ദ്ര സർക്കാരിന്റെ അവഗണനയാണെന്ന് മുഖ്യമന്ത്രി പിണറായി വിജയൻ. ഇടതുമുന്നണി സംസ്ഥാന കമ്മിറ്റിയുടെ ആഭിമുഖ്യത്തിൽ സിപിഎം സംസ്ഥാന സെക്രട്ടറി എം വി ഗോവിന്ദൻ മാസ്റ്റർ നയിക്കുന്ന വികസന മുന്നേറ്റ ജാഥ കുമ്പളയിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കേന്ദ്ര ബജറ്റിൽ കേരളം വലിയ പ്രതീക്ഷകൾ വെച്ചിരുന്നുവെങ്കിലും അതിവേഗ റെയിൽപ്പാത ഉൾപ്പെടെയുള്ള വികസന പദ്ധതികൾ നിഷേധിച്ച് സംസ്ഥാനത്തെ തഴയുകയായിരുന്നുവെന്ന് അദ്ദേഹം ചൂണ്ടിക്കാട്ടി.

പല കിഴക്കൻ സംസ്ഥാനങ്ങൾക്കും അതിവേഗ റെയിൽപ്പാതകൾ അനുവദിച്ചപ്പോൾ കേരളത്തെ കടലാമ സംരക്ഷണം പോലുള്ള നിസ്സാര പദ്ധതികളുടെ പട്ടികയിൽ മാത്രം ഉൾപ്പെടുത്തിയത് വേദനാജനകമാണ്. 'കേരളത്തിന് കേന്ദ്രം കാണുന്ന അയോഗ്യത എന്താണ്?' എന്ന് ചോദിച്ച മുഖ്യമന്ത്രി, ബിജെപിയെ സ്വീകരിക്കാൻ തയ്യാറാകാത്ത ജനത കേരളത്തിലുള്ളതാകാം കേന്ദ്രത്തിന്റെ രാഷ്ട്രീയ പകപോക്കലിന് കാരണമെന്ന് അഭിപ്രായപ്പെട്ടു. ലഹളകൾ സൃഷ്ടിച്ച് രാഷ്ട്രീയ നേട്ടം കൊയ്യാൻ ശ്രമിക്കുന്ന ചിലരുടെ നീക്കങ്ങളെ അവഗണിക്കാനാവില്ലെന്നും അദ്ദേഹം മുന്നറിയിപ്പ് നൽകി.

ക്ഷേമ പെൻഷനുകളുടെ കാര്യത്തിൽ യുഡിഎഫ് സ്വീകരിച്ച നിലപാടിനെ മുഖ്യമന്ത്രി രൂക്ഷമായി വിമർശിച്ചു. മുൻ ഭരണകാലത്ത് പെൻഷൻ 500 രൂപയിൽ നിന്ന് വെറും 100 രൂപ വർദ്ധിപ്പിച്ച് 600 ആക്കിയതു മാത്രമാണ് യുഡിഎഫിന്റെ സംഭാവനയെന്ന് അദ്ദേഹം പരിഹസിച്ചു. അതേസമയം, കേരളത്തിൽ നിർമ്മാണം പൂർത്തിയായ ദേശീയപാതകളുടെ ഉദ്ഘാടനം ഫെബ്രുവരി മാസത്തിൽ തന്നെ നടത്തുമെന്ന് കേന്ദ്ര ഉപരിതല ഗതാഗത മന്ത്രാലയം അറിയിച്ചതായും മുഖ്യമന്ത്രി വ്യക്തമാക്കി.

കേരള വികസനത്തിന്റെ 'മിനിയേച്ചർ' രൂപം ജാഥാ ക്യാപ്റ്റൻ എം വി ഗോവിന്ദൻ മാസ്റ്റർക്ക് കൈമാറിയാണ് മുഖ്യമന്ത്രി ജാഥ ഉദ്ഘാടനം ചെയ്തത്. എം വി ഗോവിന്ദൻ മാസ്റ്റർ, ബിനോയ് വിശ്വം, ജോസ് കെ മാണി എന്നിവർ നയിക്കുന്ന മൂന്ന് മേഖലാ ജാഥകളാണ് സംസ്ഥാനത്ത് നടക്കുന്നത്. ഇതിൽ ആദ്യ ഘട്ടമായ കാസർകോട്-പാലക്കാട് മേഖലയിലെ യാത്രയാണ് കുമ്പളയിൽ ആരംഭിച്ചത്. സിപിഐ ദേശീയ എക്സിക്യൂട്ടീവ് അംഗം അഡ്വ. പി സന്തോഷ് കുമാർ എംപിയാണ് ജാഥാ മാനേജർ. വിവിധ ഘടകകക്ഷി നേതാക്കളായ കെ എസ് സലീഖ്, മാത്യു കുന്നപ്പള്ളി തുടങ്ങി പത്തോളം സ്ഥിരം അംഗങ്ങൾ ജാഥയിലുണ്ട്. ചടങ്ങിൽ എംഎൽഎയും സിപിഐ നേതാവുമായ ഇ ചന്ദ്രശേഖരൻ അധ്യക്ഷത വഹിച്ചു. ജാഥയ്ക്ക് വൈകിട്ട് കാസർകോട് നഗരത്തിൽ സ്വീകരണം നൽകി.

ലൈഫ് പദ്ധതിയിൽ അഞ്ചുലക്ഷം വീടുകൾ പൂർത്തിയായി; ഫെബ്രുവരിയിൽ വിപുലമായ ആഘോഷമെന്ന് എം വി ഗോവിന്ദൻ

കേരളത്തിലെ അഞ്ചുലക്ഷം വീടുകളിൽ ലൈഫ് ഭവനപദ്ധതി പൂർത്തിയായതിന്റെ പ്രഖ്യാപനം ഫെബ്രുവരി മാസത്തിൽ സംഘടിപ്പിക്കുമെന്ന് സിപിഎം സംസ്ഥാന സെക്രട്ടറി എം വി ഗോവിന്ദൻ അറിയിച്ചു. അഞ്ചുലക്ഷം വീടുകളുടെ നിർമാണം ഈ മാസം പൂർത്തിയാകുമെന്നും ലോകത്ത് മറ്റൊരിടത്തും സാധ്യമാകാത്ത അപൂർവ നേട്ടമാണിതെന്നും അദ്ദേഹം പറഞ്ഞു. ഇതിന്റെ പ്രഖ്യാപനം വലിയ ആഘോഷമായാണ് എൽഡിഎഫ് സംഘടിപ്പിക്കുന്നത്.

അടച്ചുറപ്പുള്ള വീടുകൾ ലഭിച്ച അഞ്ചുലക്ഷം കുടുംബങ്ങളിലേക്കും എൽഡിഎഫ് പ്രവർത്തകർ നേരിട്ടെത്തി ആഘോഷങ്ങളിൽ പങ്കാളികളാകുമെന്ന് എം വി ഗോവിന്ദൻ വ്യക്തമാക്കി. കുമ്പളയിൽ വികസന മുന്നേറ്റ ജാഥയുടെ ഉദ്ഘാടന ചടങ്ങിലും കാസർകോട് നുള്ളിപ്പാടിയിൽ നടന്ന സ്വീകരണ പൊതുയോഗത്തിലും സംസാരിക്കുകയായിരുന്നു ജാഥാ ക്യാപ്റ്റൻ. ചൈനയ്ക്ക് ശേഷം അതിദാരിദ്ര്യം തുടച്ചുനീക്കാൻ സാധിച്ച പ്രദേശം കേരളമാണെന്നും അദ്ദേഹം കൂട്ടിച്ചേർത്തു.

നാലുവർഷം നീണ്ട പ്രക്രിയയിലൂടെ 64,006 കുടുംബങ്ങളെയാണ് അതിദാരിദ്ര്യത്തിൽ നിന്ന് മോചിപ്പിച്ചത്. ഇനി കേവല ദാരിദ്ര്യം ഇല്ലാതാക്കലാണ് സർക്കാരിന്റെ ലക്ഷ്യം. ഇന്ത്യയിലെ മറ്റൊരു സംസ്ഥാനത്തിനും പതിറ്റാണ്ടുകൾ കഴിഞ്ഞാലും ഇത്തരമൊരു നേട്ടം കൈവരിക്കാനാകില്ലെന്നും അദ്ദേഹം പറഞ്ഞു. കേരളത്തെ ലോകനിലവാരത്തിലേക്ക് ഉയർത്തുകയെന്ന ലക്ഷ്യത്തിനായി പശ്ചാത്തല മേഖലയിൽ വലിയ വളർച്ച അനിവാര്യമാണ്. ഇതിന് കേന്ദ്ര സർക്കാർ ഒപ്പമില്ലെന്നത് വെല്ലുവിളിയാണെങ്കിലും സംസ്ഥാന സർക്കാർ വികസനവുമായി മുന്നോട്ട് പോകുമെന്നും അദ്ദേഹം വ്യക്തമാക്കി.

കിഫ്ബി വഴി കഴിഞ്ഞ പത്തുവർഷത്തിനിടെ പശ്ചാത്തല മേഖലയിൽ 96,000 കോടി രൂപയുടെ വികസനമാണ് നടപ്പാക്കിയത്. ഉന്നത വിദ്യാഭ്യാസം സൗജന്യമാക്കിയ ഇന്ത്യയിലെ ആദ്യ സംസ്ഥാനമാണ് കേരളം. ഇതിനകം 38,000 പേർ വിദേശങ്ങളിൽ നിന്നും മറ്റും കേരളത്തിലേക്ക് മടങ്ങിയെത്തിയതായും അദ്ദേഹം പറഞ്ഞു. വർഗീയ കലാപങ്ങളില്ലാതെ കേരളത്തെ സംരക്ഷിക്കുമെന്നതാണ് ഈ ജാഥയുടെ പ്രധാന പ്രഖ്യാപനമെന്നും, മൂന്നാംവട്ടവും ഭരണ തുടർച്ചയ്ക്കായി ജനങ്ങളുടെ പിന്തുണ ഉണ്ടാകണമെന്നും എം വി ഗോവിന്ദൻ അഭ്യർത്ഥിച്ചു.

കേരളത്തെ ശിക്ഷിക്കുന്ന കേന്ദ്ര നിലപാട് അപമാനകരം; പി സന്തോഷ് കുമാർ എംപി

'കേരളത്തിന് ലഭിച്ചത് ആനമുട്ട'; സുരേഷ് ഗോപിയും ജോർജ് കുര്യനും രാജിവച്ച് കടലാമ നിരീക്ഷണത്തിന് പോകണം'

കേരളം കൈവരിച്ച വികസന മുന്നേറ്റങ്ങളെ കേന്ദ്ര സർക്കാർ ശിക്ഷിക്കുകയാണെന്ന് പി സന്തോഷ് കുമാർ എംപി. ആരോഗ്യ, വിദ്യാഭ്യാസ മേഖലകളിൽ സംസ്ഥാനം കാഴ്ചവെക്കുന്ന വൻ മുന്നേറ്റമാണ് കേന്ദ്രം പോരായ്മയായി കാണുന്നതെന്നും ഇതിനാൽ കേരളത്തിന് ആനുകൂല്യങ്ങൾ നൽകില്ലെന്ന വാശിയിലാണ് കേന്ദ്രമെന്നും അദ്ദേഹം കുറ്റപ്പെടുത്തി. വികസനം കൊണ്ടുവന്നതിന് കേരളം ശിക്ഷിക്കപ്പെടണമെന്ന സമീപനമാണ് ബജറ്റിൽ പ്രതിഫലിച്ചതെന്ന് അദ്ദേഹം പറഞ്ഞു.

മനുഷ്യ-വന്യജീവി സംഘർഷം പരിഹരിക്കാനുള്ള ഫണ്ട്, റബർ കർഷകർക്കുള്ള വില സ്ഥിരതാ ഫണ്ട്, എയിംസ് തുടങ്ങിയ ന്യായമായ ആവശ്യങ്ങളോട് നിഷേധ നിലപാടാണ് കേന്ദ്രം സ്വീകരിച്ചത്. ബജറ്റിൽ കേരളത്തിന് 'ആനമുട്ട'യാണ് ലഭിച്ചതെന്നും ജിഎസ്ടി വഴി കോടിക്കണക്കിന് രൂപ നികുതിയായി നൽകുന്ന മലയാളികളെ അപമാനിക്കുന്നതിന് തുല്യമാണിതെന്നും അദ്ദേഹം പറഞ്ഞു.

കേന്ദ്ര ബജറ്റിനെതിരെ വ്യാപക പ്രതിഷേധം ഉയരുമ്പോഴും ബിജെപി നേതാവ് രാജീവ് ചന്ദ്രശേഖർ കേരളത്തെ കുറ്റപ്പെടുത്തി കേന്ദ്രത്തെ അനുകൂലിക്കുന്നത് ലജ്ജാവഹമാണെന്ന് എംപി പറഞ്ഞു. കേന്ദ്രമന്ത്രിമാരായ സുരേഷ് ഗോപിയെയും ജോർജ് കുര്യനെയും അദ്ദേഹം രൂക്ഷമായി വിമർശിച്ചു. ഇരുവരെയും കൊണ്ട് സംസ്ഥാനത്തിന് ഉപകാരമില്ലെന്നും മന്ത്രിസ്ഥാനം രാജിവച്ച് കടലാമ നിരീക്ഷണത്തിന് പോകുന്നതാണ് നല്ലതെന്നും അദ്ദേഹം പരിഹസിച്ചു.

കേരളത്തെ തകർക്കാൻ കേന്ദ്രം സംഘടിത ആക്രമണം നടത്തുകയാണെന്നും സാമൂഹിക സൗഹാർദം നശിപ്പിക്കാനാണ് ബിജെപി ശ്രമിക്കുന്നതെന്നും അദ്ദേഹം ആരോപിച്ചു. എൽഡിഎഫ് സർക്കാരിനെ താഴെയിറക്കാനുള്ള ശ്രമങ്ങൾ വിജയിക്കില്ല. തദ്ദേശ തെരഞ്ഞെടുപ്പിലെ പോരായ്മകൾ പരിഹരിച്ച് നിയമസഭാ തെരഞ്ഞെടുപ്പിൽ ഇടതുസർക്കാർ വമ്പിച്ച വിജയം നേടുമെന്നും സന്തോഷ് കുമാർ പറഞ്ഞു.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ.അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: CM Pinarayi Vijayan inaugurated the LDF Vikasana Munneta Jatha in Kumbla, accusing the Central Government of neglecting Kerala in the Union Budget.

#PinarayiVijayan #LDFVikasanaMunnetaJatha #KeralaPolitics #CentralNeglect #KumblaNews #MVGovindan #KeralaDevelopment #UDFCriticism