ഓപ്പറേഷൻ തൂഫാൻ കൂടുതൽ വിപുലമാക്കുന്നു; ലഹരിമരുന്ന് ശൃംഖലകളുടെ അടിവേരറുക്കാൻ ദക്ഷിണേന്ത്യൻ സംസ്ഥാനങ്ങളുടെ സഹകരണം തേടി മുഖ്യമന്ത്രി വി ഡി സതീശൻ്റെ നിർണായക ഇടപെടൽ

തിരുവനന്തപുരം: (KasargodVartha) ലഹരിമരുന്ന് വ്യാപനത്തിൽ നിന്നും സംസ്ഥാനത്തെ മുക്തമാക്കുന്നതിനും, മയക്കുമരുന്ന് കടത്ത് ശൃംഖലകളുടെ അടിവേരറുക്കുന്നതിനുമായി സർക്കാർ നടപ്പിലാക്കുന്ന 'ഓപ്പറേഷൻ തൂഫാൻ' വിപുലമാക്കുന്നു. ഇതിൻ്റെ ഭാഗമായി അയൽ സംസ്ഥാനങ്ങളുമായി സംയുക്ത പ്രവർത്തനം ലക്ഷ്യമിട്ട് മുഖ്യമന്ത്രി വി ഡി സതീശൻ കർണാടക മുഖ്യമന്ത്രി ഡി കെ ശിവകുമാർ, തമിഴ്നാട് മുഖ്യമന്ത്രി സി ജോസഫ്  വിജയ്, പുതുച്ചേരി മുഖ്യമന്ത്രി എൻ. രംഗസ്വാമി എന്നിവർക്ക് മുഖ്യമന്ത്രി കത്തയച്ചിട്ടുണ്ട്. കേരളം തയാറാണെന്നും നമുക്ക് ഒരുമിച്ച് പോരാടാമെന്നും കത്തിലൂടെ മുഖ്യമന്ത്രി വ്യക്തമാക്കി.

സാമ്പത്തിക ശൃംഖലകൾ തകർക്കും

ഓപ്പറേഷൻ തൂഫാൻ്റെ ഭാഗമായി ഇൻ്റലിജൻസ് വിവരങ്ങളുടെ അടിസ്ഥാനത്തിലുള്ള നിയമനടപടികൾ ഊർജിതമാക്കിയതായി മുഖ്യമന്ത്രി അയൽ സംസ്ഥാനങ്ങളെ അറിയിച്ചു. മയക്കുമരുന്ന് കടത്തുകാരുടെ സാമ്പത്തിക ശൃംഖലകൾ തകർക്കുകയും, ഇവരുടെ അനധികൃത സമ്പാദ്യങ്ങൾ കണ്ടുകെട്ടുകയും ചെയ്യുന്നതായും കത്തിൽ ചൂണ്ടിക്കാട്ടുന്നു. വിവിധ സംസ്ഥാനങ്ങളിലായി വ്യാപിച്ചു കിടക്കുന്ന മയക്കുമരുന്ന് കടത്ത് ശൃംഖലകളെ നേരിടുന്നതിന് അയൽ സംസ്ഥാനങ്ങളും കേന്ദ്രഭരണ പ്രദേശങ്ങളും തമ്മിലുള്ള ഏകോപിത പ്രവർത്തനം അനിവാര്യമാണെന്ന് മുഖ്യമന്ത്രി വ്യക്തമാക്കി.

അതിർത്തികളിൽ നിരീക്ഷണം

കേരളം, കർണാടക, തമിഴ്‌നാട്, പുതുച്ചേരി എന്നീ സംസ്ഥാനങ്ങൾ തമ്മിലുള്ള അതിർത്തി മേഖലകൾ, പ്രധാന റോഡ് ഇടനാഴികൾ, വിനോദസഞ്ചാര കേന്ദ്രങ്ങൾ, വിദ്യാർഥി ശൃംഖലകൾ, നഗരങ്ങളിലെ വിതരണ കേന്ദ്രങ്ങൾ എന്നിവ മയക്കുമരുന്ന് മാഫിയകൾ ദുരുപയോഗം ചെയ്യാൻ സാധ്യതയുള്ള മേഖലകളാണ്. ഇതിനോടകം തന്നെ നിരവധി അന്തർസംസ്ഥാന, അന്തർദേശീയ മയക്കുമരുന്ന് കടത്തുകാരെ അറസ്റ്റ് ചെയ്യാൻ കേരള പൊലീസിന് കഴിഞ്ഞിട്ടുണ്ടെന്നും മുഖ്യമന്ത്രി കത്തിൽ അറിയിച്ചു.

ഉന്നതതല യോഗം വിളിക്കണം

ഇത്തരം ലഹരി സംഘങ്ങളെ നേരിടുന്നതിന് സംസ്ഥാനങ്ങൾ തമ്മിലുള്ള തത്സമയ വിവര കൈമാറ്റം, സംയുക്ത ഓപ്പറേഷനുകൾ, ഏകോപിത ആസൂത്രണം എന്നിവ അനിവാര്യമാണ്. ഇതിൻ്റെ ഭാഗമായി കേരളം, കർണാടക, തമിഴ്‌നാട്, പുതുച്ചേരി എന്നിവിടങ്ങളിലെ ബന്ധപ്പെട്ട ഉദ്യോഗസ്ഥരുടെ പ്രത്യേക ഉന്നതതല യോഗം വിളിച്ചുചേർക്കണമെന്നും, അന്തർസംസ്ഥാന മയക്കുമരുന്ന് കടത്തിനെതിരെ സംയുക്ത പ്രവർത്തന പദ്ധതി രൂപീകരിക്കണമെന്നും മുഖ്യമന്ത്രി വി ഡി സതീശൻ കത്തിൽ അഭ്യർഥിച്ചു.

ആഭ്യന്തരമന്ത്രി രമേശ് ചെന്നിത്തലയുടെ നേതൃത്വത്തിൽ സംസ്ഥാന പൊലീസ് മേധാവി റാവഡ ചന്ദ്രശേഖർ, ടാക്ടിക്കൽ കമാൻഡർ പുട്ട വിക്രമാദിത്യ എന്നിവരടങ്ങുന്ന ഉദ്യോഗസ്ഥ സംഘം കർണാടക, തമിഴ്‌നാട്, പുതുച്ചേരി എന്നിവിടങ്ങളിലെ പൊലീസ് മേധാവിമാരുമായും ആഭ്യന്തര വകുപ്പിലെ ഉന്നത ഉദ്യോഗസ്ഥരുമായും ചർച്ച നടത്താൻ തയ്യാറാണെന്നും മുഖ്യമന്ത്രി കത്തിൽ വ്യക്തമാക്കിയിട്ടുണ്ട്.

ലഹരിക്കെതിരായ സർക്കാരിൻ്റെ ഈ സംയുക്ത നീക്കത്തെക്കുറിച്ചുള്ള വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. കൂടുതല്‍ വാർത്തകൾ അറിയാൻ ഞങ്ങളുടെ ഫേസ്ബുക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പേജില്‍ ഈ വാര്‍ത്തയുടെ താഴെ കമൻ്റായി രേഖപ്പെടുത്തുക.

Article Summary: Kerala Chief Minister V.D. Satheesan wrote to the Chief Ministers of Karnataka, Tamil Nadu, and Puducherry, as well as leaders D.K. Shivakumar and Vijay, seeking joint operations and intelligence sharing to strengthen 'Operation Toofan' against drug trafficking.

#OperationToofan #KeralaGovernment #VDSatheesan #RameshChennithala #DrugFreeKerala #SouthIndia #RenuNews