‘മലയാളികളെ പ്രവാസികളാക്കിയത് മാറ്റിയത് ഇടത് - വലത് മുന്നണികൾ; വികസന മുരടിപ്പിന് കാരണം മുസ്ലിം ലീഗ്’; പ്രശാന്ത് താക്കൂറും അശ്വിനി എം എല്ലും; കാസർകോട് എൻഡിഎ തിരഞ്ഞെടുപ്പ് കാര്യാലയം തുറന്നു

കാസർകോട്: (KasargodVartha) കേരളത്തിൽ നിലവിലുള്ള എല്ലാ അനുകൂല സാഹചര്യങ്ങളും ഉപയോഗപ്പെടുത്താൻ പരാജയപ്പെട്ട ഇടത് - വലത് മുന്നണികളാണ് മലയാളികളെ പ്രവാസികളാക്കി മാറ്റിയതെന്ന് പൻവേൽ എം എൽ എ പ്രശാന്ത് താക്കൂർ. കാസർകോട് നിയോജക മണ്ഡലം എൻ ഡി എ തിരഞ്ഞെടുപ്പ് കാര്യാലയം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. വെള്ളിയാഴ്ച, 2026 മാർച്ച് 20 നാണ് തിരഞ്ഞെടുപ്പ് കാര്യാലയം പ്രവർത്തനമാരംഭിച്ചത്.

പ്രവാസികളുടെ പണമെടുത്ത് മേനി നടിക്കുന്നു

കേരളം മാറി മാറി ഭരിച്ച മുന്നണികൾ മലയാളികളെ തൊഴിലിനായി അന്യരാജ്യങ്ങളിലേക്ക് പറഞ്ഞയച്ചു. ഈ പ്രവാസികൾ അയക്കുന്ന സമ്പാദ്യമുപയോഗിച്ച് സംസ്ഥാനത്ത് നടന്ന വികസനത്തെ തങ്ങളുടെ ഭരണനേട്ടമായി ചിത്രീകരിക്കാനാണ് മുന്നണികൾ ശ്രമിക്കുന്നത്. ദശകങ്ങളായി പരിഹരിക്കപ്പെടാതെ കിടന്ന റോഡ് വികസനം ഉൾപ്പെടെയുള്ള ആവശ്യങ്ങൾ കേന്ദ്രത്തിൽ നരേന്ദ്ര മോദി സർക്കാർ വന്നതിന് ശേഷമാണ് യാഥാർത്ഥ്യമായത്. ഉദ്ഘാടനം പൂർത്തിയായ ദേശീയപാത 66 ലെ തലപ്പാടി - ചെങ്കള റീച്ച് ഇതിന് ഉദാഹരണമാണെന്നും അദ്ദേഹം ചൂണ്ടിക്കാട്ടി.

കാസർകോടിന്റെ വികസനം മുരടിപ്പിച്ചു

ജില്ലയുടെ ഭരണസിരാകേന്ദ്രം സ്ഥിതി ചെയ്യുന്ന കാസർകോട് മണ്ഡലത്തിന്റെ പിന്നോക്കാവസ്ഥയ്ക്ക് കാരണം ജില്ലാ രൂപീകരണം മുതൽ മണ്ഡലത്തെ പ്രതിനിധീകരിക്കുന്ന മുസ്ലിം ലീഗാണെന്ന് എൻ ഡി എ സ്ഥാനാർഥി അശ്വിനി എം എൽ പറഞ്ഞു. കാസർകോട് ജില്ല രൂപീകരിക്കപ്പെട്ട ശേഷം മുസ്ലിം ലീഗ് പ്രതിനിധികളായി രണ്ട് എം എൽ എമാരാണ് നിയമസഭയിലെത്തിയത്. എന്നാൽ ഭാഷാ ന്യൂനപക്ഷങ്ങളുടെ പ്രശ്നങ്ങൾ ഉൾപ്പെടെയുള്ള കാര്യങ്ങൾ ഇവർ കണ്ടില്ലെന്ന് നടിച്ചു.

സംസ്ഥാനത്തെ വികസന വിരുദ്ധ നയങ്ങളും അഴിമതിയും ചുവപ്പ് നാടകളും കാരണം കാസർകോട് ജില്ലയിലെ സംരംഭകർ പോലും അയൽ ജില്ലകളിൽ സംരംഭങ്ങൾ തുടങ്ങാൻ നിർബന്ധിതരാകുകയാണെന്നും അവർ ആരോപിച്ചു. ബി ജെ പി സംസ്ഥാന കമ്മിറ്റി അംഗവും കാസർകോട് മണ്ഡലം എൻ ഡി എ കൺവീനറുമായ രവീശ തന്ത്രി കുണ്ടാർ ചടങ്ങിൽ അധ്യക്ഷത വഹിച്ചു.

എൻ ഡി എ സ്ഥാനാർഥി അശ്വിനി എം എൽ, ബി ജെ പി ദേശീയ കൗൺസിൽ അംഗം എം സഞ്ജീവ ഷെട്ടി, കോഴിക്കോട് മേഖല ജനറൽ സെക്രട്ടറി സുധാമ ഗോസാഡ, പൻവേൽ മുൻസിപ്പൽ കോർപ്പറേഷൻ കൗൺസിലർ സന്തോഷ് ഷെട്ടി, ബി ജെ പി സംസ്ഥാന കമ്മിറ്റി അംഗങ്ങളായ വി രവീന്ദ്രൻ, സതീഷ് ചന്ദ്ര ഭണ്ഡാരി, സവിത ടീച്ചർ രാമപ്പ മഞ്ചേശ്വര, വേലായുധൻ, ജില്ലാ ജനറൽ സെക്രട്ടറി എൻ ബാബുരാജ്, ജില്ലാ വൈസ് പ്രസിഡന്റ് പി രമേശ്, ബദിയടുക്ക മണ്ഡലം പ്രസിഡന്റ് എം ഗോപാലകൃഷ്ണൻ, മണ്ഡലം ജനറൽ സെക്രട്ടറി രവീന്ദ്ര റൈ ഗോസാഡ, ശ്രീധര ബെള്ളൂർ, കാസർകോട് മണ്ഡലം പ്രസിഡന്റ് ഗുരുപ്രസാദ് പ്രഭു, മണ്ഡലം ജനറൽ സെക്രട്ടറിമാരായ ശ്രീധര കൂട്ലൂ, ചന്ദ്രശേഖർ ബി എന്നിവർ പരിപാടിയിൽ സംസാരിച്ചു. എൻ ഡി എ പ്രവർത്തകരുടെ വൻ പങ്കാളിത്തമാണ് ഉദ്ഘാടന ചടങ്ങിൽ ഉണ്ടായത്.

കാസർകോട്ടെ ഇത്തരം തിരഞ്ഞെടുപ്പ് വാർത്തകളും രാഷ്ട്രീയ ചലനങ്ങളും അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഫേസ്ബുക്ക് പേജിലൂടെയും അപ്‌ഡേറ്റുകൾ നിങ്ങളിലേക്ക് എത്തുന്നതാണ്. മലയാളികളെ പ്രവാസികളാക്കിയെന്ന പ്രശാന്ത് താക്കൂറിന്റെ വിമർശനത്തെക്കുറിച്ച് നിങ്ങൾ എന്ത് പറയുന്നു? കാസർകോട് മണ്ഡലത്തിന്റെ വികസന കാര്യത്തിൽ രാഷ്ട്രീയ പാർട്ടികൾ പരാജയപ്പെട്ടോ? നിങ്ങളുടെ വിലപ്പെട്ട അഭിപ്രായങ്ങൾ ഈ വാർത്തയുടെ ഫേസ്ബുക്ക് പോസ്റ്റിന് താഴെ കമന്റായി രേഖപ്പെടുത്തുക. ജില്ലയുടെ രാഷ്ട്രീയം ചർച്ച ചെയ്യുന്ന ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലുംഷെയർ ചെയ്യൂ.

Article Summary: Panvel MLA Prashant Thakur inaugurated the NDA election office in Kasaragod, blaming LDF and UDF for forcing Keralites to migrate while claiming credit for development fueled by remittances. NDA candidate Ashwini M.L. attacked the Muslim League for the constituency's backwardness and neglect of linguistic minorities, highlighting that central initiatives under Modi fulfilled long-standing infra needs like NH 66.

#KasaragodElection #NDAKerala #PrashantThakur #AshwiniML #BJPKerala #MuslimLeague #LDFvsUDF #NH66Development #KasaragodNews #Election2026 #KasargodVartha