സംസ്ഥാനത്ത് ഭരണവിരുദ്ധ വികാരമില്ല; തിരുവനന്തപുരം കോർപ്പറേഷനിൽ കോൺഗ്രസുമായി കൂട്ട് ചേരില്ലെന്ന് എം വി ഗോവിന്ദൻ

തിരുവനന്തപുരം: (KasargodVartha) സംസ്ഥാനത്ത് നിലവിൽ ഭരണവിരുദ്ധ വികാരം ഇല്ലെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദൻ. തദ്ദേശ തിരഞ്ഞെടുപ്പ് ഫലം വന്നതിനു പിന്നാലെ നടന്ന സിപിഎം സംസ്ഥാന സെക്രട്ടേറിയറ്റ് യോഗത്തിന് ശേഷമായിരുന്നു അദ്ദേഹത്തിൻ്റെ പ്രതികരണം. 'കപ്പൽ മുങ്ങുമെന്ന പ്രചാരവേല തെറ്റാണ്' — എന്ന് എം.വി. ഗോവിന്ദൻ പറഞ്ഞു. ശബരിമല സ്വർണക്കവർച്ച പോലുള്ള വിഷയങ്ങൾ തിരഞ്ഞെടുപ്പ് ഫലത്തെ എത്രത്തോളം ബാധിച്ചു എന്ന് ഇപ്പോൾ പറയാനാകില്ലെന്നും അദ്ദേഹം വ്യക്തമാക്കി.

തദ്ദേശ തിരഞ്ഞെടുപ്പ് ഫലം വിലയിരുത്തിയതിൽ 58 മണ്ഡലങ്ങളിൽ എൽഡിഎഫിനാണ് നേട്ടം ഉണ്ടായിരിക്കുന്നത്. എങ്കിലും ചിലയിടങ്ങളിൽ തിരിച്ചടിയുണ്ടായതു പരിശോധിക്കുകയും തിരുത്തുകയും ചെയ്യുമെന്നും അദ്ദേഹം കൂട്ടിച്ചേർത്തു. മധ്യകേരളത്തിലും മലപ്പുറം ജില്ലയിലുമാണ് പ്രധാനമായും തിരിച്ചടിയുണ്ടായത്. എന്നാൽ, ഏതെങ്കിലും ഒരു വിഭാഗം പൂർണ്ണമായും എതിരായെന്നു പറയാനാകില്ലെന്നും ന്യൂനപക്ഷങ്ങൾ ഇടതുപക്ഷത്തെ കൈവിട്ടിട്ടില്ലെന്നും അദ്ദേഹം അഭിപ്രായപ്പെട്ടു. കൊല്ലം കോർപ്പറേഷനിലുണ്ടായ തോൽവി ഗൗരവമായി പരിശോധിക്കുമെന്നും ഗോവിന്ദൻ അറിയിച്ചു.

തിരുവനന്തപുരത്ത് കുതിരക്കച്ചവടത്തിനില്ല

തിരുവനന്തപുരം കോർപ്പറേഷനിൽ അധികാരത്തിനായി കോൺഗ്രസുമായി ഒരുതരത്തിലും കൂടില്ലെന്ന് എം.വി. ഗോവിന്ദൻ വ്യക്തമാക്കി. 'കുതിരക്കച്ചവടത്തിനില്ല' — എന്നും അദ്ദേഹം പറഞ്ഞു. തിരുവനന്തപുരത്ത് ബിജെപി-കോൺഗ്രസ് ധാരണയുണ്ടായിരുന്നു. വോട്ട് കണക്കുകൾ പരിശോധിച്ചാൽ തിരുവനന്തപുരം കോർപ്പറേഷനിൽ എൽഡിഎഫ് തന്നെയാണ് ഇപ്പോഴും ഒന്നാമത്തെ ശക്തി. എൽഡിഎഫിന് 1,75,000 വോട്ടുകൾ ലഭിച്ചപ്പോൾ ബിജെപിക്ക് 1,65,000 വോട്ടും യുഡിഎഫിന് 1,25,000 വോട്ടുമാണ് ലഭിച്ചത്.

യുഡിഎഫിൻ്റേത് കപട മുദ്രാവാക്യം

തിരുവനന്തപുരത്ത് ബിജെപി വിജയിച്ച 41 ഡിവിഷനുകളിൽ യുഡിഎഫ് മൂന്നാം സ്ഥാനത്താണ്. മാത്രമല്ല, 25 ഡിവിഷനിൽ യുഡിഎഫിന് 1,000ത്തിൽ താഴെ വോട്ടുകൾ മാത്രമാണ് ലഭിച്ചതെന്നും അദ്ദേഹം ചൂണ്ടിക്കാട്ടി. 'ഒന്നിച്ച് നിന്ന് എൽഡിഎഫിനെ തോൽപ്പിച്ച ശേഷം ബിജെപിയെ അധികാരത്തിൽനിന്നു മാറ്റിനിർത്തുമെന്ന് പറയുന്നത് യുഡിഎഫിൻ്റെ കപട മുദ്രാവാക്യമാണ്' — ഗോവിന്ദൻ വ്യക്തമാക്കി. മറ്റ് പലയിടങ്ങളിലും വർഗീയശക്തികളും യുഡിഎഫും ഒന്നിച്ചു നിൽക്കുന്ന കാഴ്ചയാണ് തിരഞ്ഞെടുപ്പിൽ കണ്ടതെന്നും അദ്ദേഹം ആരോപിച്ചു.

ബിജെപിക്ക് തിരിച്ചടി

രാഷ്ട്രീയമായി പൂർണ്ണമായും വോട്ട് വിനിയോഗിക്കുന്ന ജില്ലാ പഞ്ചായത്തുകളിൽ ബിജെപിക്ക് തിരിച്ചടിയാണ് ഉണ്ടായിരിക്കുന്നത്. 'കഴിഞ്ഞ തിരഞ്ഞെടുപ്പിൽ എൻഡിഎയ്ക്ക് മൂന്ന് ജില്ലാ പഞ്ചായത്ത് ഡിവിഷനുകൾ ഉണ്ടായിരുന്നെങ്കിൽ ഇത്തവണ അത് ഒന്നായി ചുരുങ്ങി. അതിനാൽ ബിജെപി വലിയ മുന്നേറ്റമുണ്ടാക്കിയെന്ന പ്രചരണം ശരിയല്ല' — എം.വി ഗോവിന്ദൻ പറഞ്ഞു.

സർക്കാരിൻ്റെ മികച്ച പ്രവർത്തനങ്ങൾക്കിടയിലും ചിലയിടങ്ങളിൽ ഉണ്ടായ ഫലങ്ങൾ പാർട്ടി ഗൗരവമായി പരിശോധിക്കും. ജില്ലാ കമ്മിറ്റികൾ ചേർന്ന് പ്രാഥമിക പരിശോധന നടത്തിയ ശേഷം, സംസ്ഥാന കമ്മിറ്റി വിശദമായ റിവ്യു തയ്യാറാക്കി ആവശ്യമായ തിരുത്തലുകൾ വരുത്തുമെന്നും അദ്ദേഹം കൂട്ടിച്ചേർത്തു.

തദ്ദേശ തിരഞ്ഞെടുപ്പ് ഫലത്തിൽ ഭരണവിരുദ്ധ വികാരം പ്രതിഫലിച്ചില്ലെന്ന സി.പി.എമ്മിൻ്റെ വാദത്തെ എങ്ങനെ കാണുന്നു? നിങ്ങളുടെ അഭിപ്രായം പങ്കുവെക്കുക.

Article Summary: CPM leader MV Govindan asserts no anti-incumbency, rules out alliance with Congress in Thiruvananthapuram Corporation, and cites electoral gains in 58 segments.

#MVGovindan #CPMKerala #LocalBodyPolls #KeralaPolitics #Thiruvananthapuram #ElectionResults