മൊഗ്രാൽ പുത്തൂർ പഞ്ചായത്ത് തിരഞ്ഞെടുപ്പ്: മുസ്ലിം ലീഗ് സ്ഥാനാർത്ഥികളെ നിശ്ചയിച്ചു, തർക്കങ്ങളില്ലാതെ യുഡിഎഫ്

മൊഗ്രാൽ പുത്തൂർ: (KasargodVartha) മൊഗ്രാൽ പുത്തൂർ പഞ്ചായത്ത് തിരഞ്ഞെടുപ്പിനുള്ള യുഡിഎഫ് സ്ഥാനാർത്ഥി പട്ടിക തർക്കങ്ങളൊന്നുമില്ലാതെ തയ്യാറാക്കുന്നു. വിവിധ വാർഡുകളിലെ സ്ഥാനാർത്ഥികളെ ഇതിനോടകം തന്നെ നിശ്ചയിച്ചു കഴിഞ്ഞതായി അറിയുന്നു.

കഴിഞ്ഞ ദിവസം കല്ലങ്കൈ പതിനഞ്ചാം വാർഡിൽ, പാലിയേറ്റീവ് വളണ്ടിയറും സാമൂഹിക പ്രവർത്തകയുമായ ആയിഷാ അബ്ദുൽ റഹ്മാനെ സ്ഥാനാർത്ഥിയാക്കാൻ വാർഡ് കമ്മിറ്റി ഐക്യകണ്ഠേന തീരുമാനിച്ചിരുന്നു. 

ഇതിനു പിന്നാലെ ആറാം വാർഡിൽ മുസ്ലിം ലീഗ് സ്ഥാനാർത്ഥിയായി കെ എ അബ്ദുല്ല കുഞ്ഞിയെയും കമ്പാർ നാലാം വാർഡിൽ അസ്മിനാ ഷാഫിയെയും സ്ഥാനാർത്ഥിയാക്കാൻ വാർഡ് കൺവെൻഷനുകൾ തീരുമാനിക്കുകയായിരുന്നു. മേൽഘടകം സ്ഥാനാർത്ഥികളെ ഔദ്യോഗികമായി പ്രഖ്യാപിക്കുന്നതോടെ ഇവർ തിരഞ്ഞെടുപ്പ് ഗോദയിൽ ഇറങ്ങും.

പൊതുവേ, മൊഗ്രാൽ പുത്തൂർ പഞ്ചായത്ത് മുസ്ലിം ലീഗിന്റെ 'ഹരിതകോട്ട' എന്നാണ് അറിയപ്പെടുന്നത്. അതുകൊണ്ടുതന്നെ സ്ഥാനാർത്ഥി നിർണ്ണയത്തിൽ അപസ്വരങ്ങളൊന്നും ഉയർന്നു വന്നതുമില്ല. കോൺഗ്രസിന് അവർ ആവശ്യപ്പെട്ട സീറ്റുകൾ നൽകിയതായി സൂചനയുണ്ട്. ഇവിടെ പ്രധാന പ്രതിപക്ഷ പാർട്ടി ബിജെപിയാണ്. ചുരുക്കം ചില വാർഡുകളിൽ എസ്ഡിപിഐയും മത്സരിക്കുന്നുണ്ട്.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കൂ. നിങ്ങളുടെ രാഷ്ട്രീയ അഭിപ്രായങ്ങൾ കമൻ്റ് ചെയ്യുക. 

Article Summary: Muslim League finalises candidates in the Mogral Puthur Panchayat election without UDF disputes, maintaining its "Green Fort" status.

#MogralPuthur #Kasaragod #PanchayatElection #UDF #MuslimLeague #KeralaPolitics