മസാലബോണ്ട്; 'ഫെമ ചട്ടം ലംഘിച്ചു'; മുഖ്യമന്ത്രിക്ക് ഇഡി നോട്ടിസ്

കൊച്ചി: (KasargodVartha) കിഫ്ബി മസാലബോണ്ട് (വിദേശ കറൻസിയിൽ അല്ലാതെ രൂപയിൽ ഇറക്കുന്ന ബോണ്ട്) ഇടപാടിൽ മുഖ്യമന്ത്രി പിണറായി വിജയന് എൻഫോഴ്സ്‌മെൻ്റ് ഡയറക്‌ടറേറ്റിൻ്റെ നോട്ടിസ്. വിദേശനാണ്യ വിനിമയ ചട്ടം - ഫെമ ചട്ടം ലംഘിച്ചെന്ന് ആരോപിച്ചാണ് നോട്ടിസ് നൽകിയിട്ടുള്ളത്. മൂന്ന് വർഷത്തിലേറെ നീണ്ട അന്വേഷണത്തിന് ഒടുവിലാണ് ഇ ഡി ഈ നിർണ്ണായക നടപടിയിലേക്ക് കടന്നത്.

നോട്ടിസ് മുൻ ധനമന്ത്രിക്കും

മുഖ്യമന്ത്രിക്ക് ശനിയാഴ്ചയാണ് നോട്ടിസ് നൽകിയത്. വിശദീകരണം തേടിയശേഷമായിരിക്കും വിഷയത്തിൽ തുടർനടപടികൾ സ്വീകരിക്കുക. മുഖ്യമന്ത്രിയെ കൂടാതെ മുൻ ധനമന്ത്രി ടി എം തോമസ് ഐസക്കിനും കിഫ്ബി ഉദ്യോഗസ്ഥർക്കും ഇ ഡി നോട്ടിസ് നൽകിയിട്ടുണ്ട്. മസാല ബോണ്ട് വഴി ശേഖരിച്ച പണം അടിസ്‌ഥാന വികസന പദ്ധതികൾക്ക് വിനിയോഗിച്ചത് ചട്ടലംഘനമാണെന്നാണ് ഇ ഡി വ്യക്തമാക്കുന്നത്. അന്വേഷണത്തിൻ്റെ ഭാഗമായി കഴിഞ്ഞ വർഷം തോമസ് ഐസക്കിന് രണ്ട് തവണ നോട്ടിസ് നൽകിയിരുന്നു. ഇതിന് പിന്നാലെ ഇ ഡി അഡ്‌ജുഡിക്കേറ്റിങ് അതോറിറ്റിക്ക് റിപ്പോർട്ട് നൽകിയിരുന്നു.

ആയിരക്കണക്കിന് കോടി സമാഹരിച്ചു

2019 ജനുവരി 17ന് മുഖ്യമന്ത്രിയുടെ അധ്യക്ഷതയിൽ ചേർന്ന യോഗമാണ് ബോണ്ടിറക്കാനുള്ള നടപടികൾ പൂർത്തിയാക്കാൻ തീരുമാനിച്ചത്. ആ വർഷം 9.72 ശതമാനം പലിശയിൽ ലണ്ടൻ സ്റ്റോക്ക് എക്സ്ചേഞ്ചിൽ മസാല ബോണ്ടിറക്കി 2,150 കോടിയാണ് കിഫ്ബി സമാഹരിച്ചത്. കേന്ദ്രത്തിൻ്റെ അനുമതിയില്ലാതെ സംസ്‌ഥാനത്ത് ഈ രീതിയിൽ പണം സമാഹരിക്കാൻ കഴിയില്ലെന്ന വാദമാണ് നിലനിൽക്കുന്നത്.

ഗൂഢാലോചനയെന്ന് ചെന്നിത്തല

മസാല ബോണ്ട് വിഷയത്തിൽ വലിയ ഗൂഢാലോചനയാണ് നടന്നതെന്നു കോൺഗ്രസ് നേതാവ് രമേശ് ചെന്നിത്തല പ്രതികരിച്ചു. 'ഇതിലും കുറച്ച് പലിശയ്ക്ക് കേരളത്തിൽ വായ്‌പ കിട്ടുമായിരുന്നു. മസാല ബോണ്ട് അപകടമെന്നു നേരത്തെ പറഞ്ഞതാണ്. ലാവലിൻ കമ്പനിയുമായുള്ള ഡീൽ ആണ് നടന്നത്. ലാവലിൻ കമ്പനിക്ക് ഷെയറുള്ള സ്ഥാപനത്തിന് ബോണ്ടുകൾ വിൽക്കുന്നത് ദുരൂഹമാണ് എന്നും അന്നു ഞാൻ പറഞ്ഞിരുന്നു' - രമേശ് ചെന്നിത്തല പറഞ്ഞു. വലിയ സാമ്പത്തിക ലാഭം ചിലർക്ക് ഉണ്ടായിട്ടുണ്ടെന്നും, നോട്ടിസ് കൊടുത്തത് ശരിയായ നടപടിയാണെന്നും അദ്ദേഹം കൂട്ടിച്ചേർത്തു.

കിഫ്ബി മസാല ബോണ്ട് വിഷയത്തിൽ മുഖ്യമന്ത്രിക്ക് ഇഡി നോട്ടിസ് നൽകിയതിനെക്കുറിച്ച് നിങ്ങളുടെ അഭിപ്രായം എന്താണ്?

ED issues notice to Kerala CM Pinarayi Vijayan in KIIFB Masala Bond case.

#MasalaBond #PinarayiVijayan #EDNotice #KIIFB #FEMA #KeralaPolitics