മഞ്ചേശ്വരത്ത് ആര് ജയിക്കും? വോട്ട് കണക്കുകളിൽ അഷ്റഫിന് 14,000 വോട്ടിന്റെ മുൻതൂക്കമെന്ന് യുഡിഎഫ്; കണക്കുകൂട്ടലുകളിൽ കെ സുരേന്ദ്രനും

കാസർകോട്: (KasargodVartha) 2026-ലെ നിയമസഭാ തിരഞ്ഞെടുപ്പിൽ കേരളം ഉറ്റുനോക്കുന്ന മഞ്ചേശ്വരം മണ്ഡലത്തിൽ തിരഞ്ഞെടുപ്പ് വിശകലനങ്ങൾ ചൂടുപിടിക്കുന്നു. ആകെ 2,30,113 വോട്ടർമാരുള്ള മണ്ഡലത്തിൽ പോളിംഗ് 82 ശതമാനത്തിൽ എത്തിയാൽ ഏകദേശം 1,90,000 വോട്ടുകളാകും പോൾ ചെയ്യപ്പെടുക. കഴിഞ്ഞ കാലങ്ങളിലെ വോട്ട് വിഹിതവും നിലവിലെ വോട്ടർപട്ടികയും വിശകലനം ചെയ്യുമ്പോൾ യുഡിഎഫ് സ്ഥാനാർത്ഥി എകെഎം അഷ്റഫിന് 14,000 വോട്ടിന്റെ മുൻതൂക്കം ലഭിക്കാനാണ് സാധ്യതയെന്ന് രാഷ്ട്രീയ നിരീക്ഷകർ വിലയിരുത്തുന്നു.

വോട്ട് വിഹിതത്തിലെ മാറ്റങ്ങൾ (2011-2021)

കഴിഞ്ഞ നാല് തിരഞ്ഞെടുപ്പുകളിലെ കണക്കുകൾ പരിശോധിച്ചാൽ മഞ്ചേശ്വരത്ത് ത്രികോണ മത്സരം എത്രത്തോളം ശക്തമാണെന്ന് വ്യക്തമാകും.

2011-ൽ യുഡിഎഫിൽ പിബി അബ്ദുൽ റസാഖും, ബിജെപിയിൽ കെ സുരേന്ദ്രനും എൽഡിഎഫിൽ സിഎച്ച് കുഞ്ഞമ്പുവും കളത്തിൽ ഇറങ്ങിയപ്പോൾ യഥാക്രമം 37.46%, 33.08%, 26.37% എന്നിങ്ങനെയായിരുന്നു വോട്ട് വിഹിതം. 2016-ലും ഇതേ സ്ഥാനാർത്ഥികൾ മാറ്റുരച്ചപ്പോൾ അവർക്ക് ലഭിച്ച വോട്ടുകളുടെ ശതമാനം പിബി അബ്ദുൽ റസാഖ് - 35.79%, കെ സുരേന്ദ്രൻ - 35.74%, സിഎച്ച് കുഞ്ഞമ്പു - 26.79% എന്നിങ്ങനെ മാറ്റമില്ലാതെ ഒന്നു മുതൽ മൂന്നാം സ്ഥാനം വരെ തുടർന്നു. 89 വോട്ടിന്റെ നേരിയ ഭൂരിപക്ഷത്തിന് റസാഖിന് രണ്ടാം വട്ടം.

ഉപതിരഞ്ഞെടുപ്പിലെ പ്രകടനം

റസാഖ് മരിച്ചതിനെത്തുടർന്ന് 2019-ൽ നടന്ന ഉപതിരഞ്ഞെടുപ്പിൽ യുഡിഎഫിലെ എംസി ഖമറുദ്ദീൻ 40.19% വോട്ട് നേടി ബഹുദൂരം മുന്നിലെത്തി. ബിജെപിയുടെ രവീശ തന്ത്രി കുണ്ടാർ 35.32% നേടി രണ്ടാം സ്ഥാനത്തും, എൽഡിഎഫിലെ ശങ്കർ റായ് 23.49% വാങ്ങി മൂന്നാം സ്ഥാനത്ത് തന്നെ. 2021-ൽ വീണ്ടും ഒരു ഇഞ്ചോടിഞ്ച് പോരാട്ടത്തിനൊടുവിൽ യുഡിഎഫിലെ എകെഎം അഷ്റഫ് 38.41% വോട്ടുമായി മുന്നിലെത്തിയെങ്കിലും ബിജെപിയിലെ കെ സുരേന്ദ്രൻ 37.70%-വുമായി തൊട്ടുപിറകിൽ ഫിനിഷ് ചെയ്തു. എൽഡിഎഫ് സ്ഥാനാർത്ഥി വിവി രമേശൻ പതിവുപോലെ 23.57% വോട്ടുമായി മൂന്നാം സ്ഥാനത്ത്.

വിജയത്തിലേക്കുള്ള കണക്കുകൂട്ടലുകൾ

2026-ൽ ആകെ പോൾ ചെയ്യാൻ സാധ്യതയുള്ള 1,90,000 വോട്ടുകളിൽ എൽഡിഎഫ് പരമാവധി 24 ശതമാനം (45,000 വോട്ട്) നേടുമെന്നാണ് കരുതുന്നത്. എസ്ഡിപിഐ (3,000), നോട്ടയും മറ്റുള്ളവരും (1,000) എന്നിവ കൂടി ചേർത്താൽ ഏകദേശം 50,000 വോട്ടുകൾ മറ്റ് വിഭാഗങ്ങളിലേക്ക് പോകും. ബാക്കിയുള്ള 1,40,000 വോട്ടുകളാണ് എകെഎം അഷ്റഫിനും കെ സുരേന്ദ്രനും ഇടയിൽ വിഭജിക്കപ്പെടുക. ഇതിൽ 37 ശതമാനത്തിലധികം വോട്ട് നേടുന്നയാൾക്ക് വിജയം ഉറപ്പിക്കാം. കെ സുരേന്ദ്രൻ തന്റെ വോട്ട് വിഹിതം 37 ശതമാനത്തിന് മുകളിൽ നിലനിർത്താൻ സാധ്യതയുണ്ടെങ്കിലും പഞ്ചായത്ത് തിരഞ്ഞെടുപ്പിലുണ്ടായ ഏഴ് ശതമാനത്തിന്റെ ഇടിവ് ബിജെപിക്ക് ഭീഷണിയാണ്.

ജാതി-മത സമവാക്യങ്ങൾ

മറ്റൊരു രീതിയിൽ വിശകലനം ചെയ്താൽ മണ്ഡലത്തിലെ വോട്ടർമാരുടെ ഏകദേശ കണക്ക് ഇങ്ങനെയാണ്: മുസ്ലിം വിഭാഗം - 1,30,000, ഹിന്ദു വിഭാഗം - 93,000, ക്രിസ്ത്യൻ വിഭാഗം - 7,000.

80 ശതമാനം പോളിംഗ് നടന്നാൽ മുസ്ലിം വോട്ടുകൾ 1,04,000-വും ഹിന്ദു വോട്ടുകൾ 74,400-വും ക്രിസ്ത്യൻ വോട്ടുകൾ 5,600-വുമായിരിക്കും പോൾ ചെയ്യപ്പെടുക.

എകെഎം അഷ്റഫിന്റെയും കെ സുരേന്ദ്രന്റെയും സാധ്യതകൾ

ഈ വോട്ടുകളിൽ എകെഎം അഷ്റഫിന്റെ സാധ്യത: മുസ്ലിം വോട്ടുകളുടെ 65% - 67,600, ഹിന്ദു വോട്ടുകളുടെ 5% - 4,650, ക്രിസ്ത്യൻ വോട്ടുകളുടെ 50% - 2,800. ആകെ: 75,050.

കെ സുരേന്ദ്രന്റെ സാധ്യത: ഹിന്ദു വോട്ടുകളുടെ 80% - 59,520, മുസ്ലിം വോട്ടുകളുടെ 1% - 1,040, ക്രിസ്ത്യൻ വോട്ടുകളുടെ 10% - 560. ആകെ: 61,120.

ഈ കണക്കുകൾ പ്രകാരം എകെഎം അഷ്റഫിന് 14,000 വോട്ടുകളുടെ ഭൂരിപക്ഷം ലഭിക്കാനിടയുണ്ടെന്നാണ് മുൻ കണക്കുകളുമായി താരതമ്യം ചെയ്യുമ്പോൾ കണക്കാക്കപ്പെടുന്നത്. എന്നാൽ എൽഡിഎഫ് സ്ഥാനാർഥി കെ ആർ ജയാനന്ദയ്ക്ക് ലഭിക്കുന്ന വോട്ടുകളിലും ബിജെപിയുടെ വോട്ട് വിഹിതത്തിലും ഉണ്ടാകുന്ന ചെറിയ മാറ്റങ്ങൾ പോലും ഈ പ്രവചനങ്ങളെ അട്ടിമറിച്ചേക്കാം.

പുതിയ വോട്ടർമാരുടെ നിലപാട്

പുതിയ വോട്ടർമാരുടെ നിലപാടായിരിക്കും മഞ്ചേശ്വരത്ത് ഇത്തവണ നിർണ്ണായകമാവുക. യുഡിഎഫും എൻഡിഎയും പുതിയ വോട്ടർ പട്ടികയിൽ ആയിരക്കണക്കിന് പേരെ പുതുതായി ചേർത്തിട്ടുണ്ട്. ഇതിന്റെ ഏറ്റക്കുറച്ചിലുകളും വിജയപരാജയങ്ങളെ നിർണ്ണയിച്ചേക്കാം. അതേസമയം തുടർച്ചയായി മണ്ഡലത്തിൽ മത്സരിക്കുകയും പരാജയപ്പെടുകയും ചെയ്യുന്ന കെ സുരേന്ദ്രന് അനുകൂലമായി സഹതാപതരംഗം ഉണ്ടാകാനിടയുണ്ടെന്നും ഒരവസരം സുരേന്ദ്രന് കൊടുക്കണമെന്ന് വോട്ടർമാർ ചിന്തിച്ചാൽ കണക്കുകളിൽ മറിമായം ഉണ്ടാകാൻ സാധ്യതയുണ്ടെന്ന കാര്യവും തള്ളിക്കളയാൻ കഴിയില്ല. സുരേന്ദ്രനാകട്ടെ സമൂഹ-ഓൺലൈൻ മാധ്യമങ്ങളിൽ അഷ്റഫിനേക്കാൾ ഒരുപാട് മുന്നിലാണ് താനും.

പ്രവാസി വോട്ടുകളുടെ സ്വാധീനം

പശ്ചിമേഷ്യയിൽ യുദ്ധം നടക്കുന്നതുകൊണ്ട് പ്രവാസി വോട്ടർമാർക്ക് നാട്ടിലേക്ക് വരാൻ കഴിയാത്ത സ്ഥിതിയുണ്ട്. മുൻകാലങ്ങളിൽ തിരഞ്ഞെടുപ്പ് നടക്കുമ്പോൾ പലരും അവധിയെടുത്ത് നാട്ടിലെത്താറുണ്ട്. ഇങ്ങനെ എത്തുന്ന വോട്ടർമാരിൽ ഭൂരിഭാഗവും യുഡിഎഫ് അനുഭാവികളാണ്. അങ്ങനെ വന്നാൽ എകെഎം അഷ്റഫിന് കിട്ടേണ്ടതായി കരുതുന്ന വോട്ടുകൾ കുറയാനിടയാകുന്നതും സുരേന്ദ്രന് നേട്ടമാകും.

മുൻകാല തിരഞ്ഞെടുപ്പ് ഫലങ്ങൾ ഒറ്റനോട്ടത്തിൽ

മഞ്ചേശ്വരത്തെ ഈ തിരഞ്ഞെടുപ്പ് കണക്കുകളെക്കുറിച്ചുള്ള നിങ്ങളുടെ വിലയിരുത്തലുകൾ ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്തുക. കാസർകോട് ജില്ലയിലെ തിരഞ്ഞെടുപ്പ് വിശേഷങ്ങൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ. ഈ വാർത്ത മഞ്ചേശ്വരത്തെ നിങ്ങളുടെ സുഹൃത്തുക്കൾക്കും വോട്ടർമാർക്കും വാട്സ്ആപ്പ് ഗ്രൂപ്പുകളിൽ ഷെയർ ചെയ്യാൻ മറക്കരുത്. കൂടുതൽ അപ്‌ഡേറ്റുകൾക്കായി ഫേസ്ബുക്ക് പേജും പിന്തുടരുക.

Article Summary: A detailed analytical report on Manjeshwaram 2026 election predicts a potential 14,000-vote lead for AKM Ashraf based on demographic split and previous voting patterns.

#ManjeshwaramElection #KasaragodNews #AKMAshraf #KSurendran #VoteAnalysis #KeralaPolitics #Manjeshwar #Election2026