ഹൈന്ദവ വോട്ടർമാരെ ലക്ഷ്യം: മമതയും ക്ഷേത്ര നിർമ്മാണത്തിന്, ബിജെപിക്ക് ആശങ്ക!

കൊൽക്കത്ത: (KasargodVartha) ഹൈന്ദവ വോട്ടർമാരെ ആകർഷിക്കാൻ പശ്ചിമബംഗാൾ മുഖ്യമന്ത്രി മമതാ ബാനർജിയും ‘വികസനം’ എന്ന പതിവ് തന്ത്രം വിട്ട് ക്ഷേത്ര നിർമ്മാണ രാഷ്ട്രീയത്തിലേക്ക് തിരിയുന്നുവെന്ന സൂചനകൾ ശക്തമാകുന്നു. കാളിഗഞ്ച് ഉപതിരഞ്ഞെടുപ്പ് ഫലം നൽകുന്ന പ്രധാന സൂചന ഹൈന്ദവ വോട്ടുകളിൽ ഏകീകരണം സംഭവിച്ചു എന്നതാണ്. 

ഈ വിഷയത്തിൽ തൃണമൂൽ കോൺഗ്രസ് നേതാവും മുഖ്യമന്ത്രിയുമായ മമതാ ബാനർജി വിശദമായ പഠനം നടത്തിവരികയാണ്. തൃണമൂൽ എം.എൽ.എ നസിറുദ്ദീൻ അഹമ്മദിന്റെ നിര്യാണത്തെ തുടർന്നാണ് കാളിഗഞ്ചിൽ ഉപതിരഞ്ഞെടുപ്പ് നടന്നത്. അദ്ദേഹത്തിന്റെ മകൻ ആലിഫ് അഹമ്മദിനെ സ്ഥാനാർത്ഥിയാക്കി തൃണമൂൽ വിജയം നേടുകയും ചെയ്തു.

എന്നിരുന്നാലും, 309 ബൂത്തുകളുള്ള കാളിഗഞ്ച് മണ്ഡലത്തിൽ 109 ബൂത്തുകളിൽ ഭൂരിപക്ഷം ഹൈന്ദവ വോട്ടർമാർക്കായിരുന്നു. ഇതിൽ 108 ബൂത്തുകളിലും ബിജെപി സ്ഥാനാർത്ഥിക്കായിരുന്നു മുൻതൂക്കം ലഭിച്ചത്. 

മണ്ഡലത്തിൽ ബിജെപി തോൽവി ഏറ്റുവാങ്ങിയെങ്കിലും, അടുത്ത നിയമസഭാ തിരഞ്ഞെടുപ്പ് മുന്നിൽ കണ്ടുകൊണ്ട് അവർ ഇത് ‘വിജയമായി’ ആഘോഷിച്ചു. ഹൈന്ദവ വോട്ടുകളിൽ ഏകീകരണമുണ്ടായി എന്നതാണ് ബിജെപിക്ക് ഏക ആശ്വാസം.

294 സീറ്റുകളുള്ള നിയമസഭാ തിരഞ്ഞെടുപ്പിൽ 200 മണ്ഡലങ്ങളിലും ഹൈന്ദവ വോട്ടർമാർക്ക് ഭൂരിപക്ഷമുണ്ട്. നിയമസഭാ തിരഞ്ഞെടുപ്പിലും ഹൈന്ദവ വോട്ടുകളിൽ ഏകീകരണം ഉണ്ടായാൽ അത് തങ്ങൾക്ക് അനുകൂലമാകുമെന്നും, ഭരണം പിടിച്ചെടുക്കാൻ കഴിയുമെന്നും ബിജെപി കണക്കുകൂട്ടുന്നു. 

കാളിഗഞ്ച് ഉപതിരഞ്ഞെടുപ്പിൽ മമതാ ബാനർജിയെയും കോൺഗ്രസിനെയും ഇടതുപാർട്ടികളെയും ‘മുസ്ലിം പ്രീണന പാർട്ടികൾ’ എന്ന് ആരോപിച്ചായിരുന്നു ബിജെപിയുടെ പ്രചാരണം. ഈ പ്രചാരണത്തിൽ അവർ ഏറെക്കുറെ വിജയിക്കുകയും ചെയ്തു.

ഹൈന്ദവ വോട്ടുകളുടെ ഏകീകരണം മനസ്സിലാക്കിയാവണം ഒടുവിൽ മമതാ ബാനർജിയും ‘മത വോട്ടുകൾ’ ലക്ഷ്യമാക്കി നീങ്ങുന്നുവെന്ന സൂചനകൾ കണ്ടുതുടങ്ങി. 250 കോടി രൂപ ചെലവിൽ ‘ജഗന്നാഥ് ക്ഷേത്രം’ നിർമ്മിച്ചുകൊണ്ടിരിക്കുകയാണ് മമതാ ബാനർജി. ക്ഷേത്രത്തിന് സർക്കാർ ഫണ്ട് ഉപയോഗപ്പെടുത്തുന്നുവെന്ന ആക്ഷേപം മറികടക്കാൻ ‘ദിഗ ജഗന്നാഥ് ഡാം സാംസ്കാരിക കേന്ദ്രം’ എന്ന പേരും നൽകിയാണ് ക്ഷേത്ര നിർമ്മാണം ഒരുക്കിയിരിക്കുന്നത്. 

ഇതിനായി ‘പുരി’ മാതൃകയിൽ ദിഗയിലും രഥയാത്ര നടത്തി മമതാ ബാനർജി ബിജെപിയെ ഞെട്ടിച്ചു. ബിജെപിയെക്കാൾ ഒരു പടി കടന്ന് ക്ഷേത്രത്തിലെ പ്രസാദം സർക്കാർ ചെലവിൽ റേഷൻ കടകളിലൂടെ സംസ്ഥാനത്തെ എല്ലാ വീടുകളിലും എത്തിക്കാനും നടപടിയുണ്ടായി. ഇത് സംസ്ഥാന ബിജെപിയെ ഇപ്പോൾ കുറച്ചൊന്നുമല്ല ചൊടിപ്പിച്ചിരിക്കുന്നത്.

ഇപ്പോൾ ബിജെപി സംസ്ഥാന നേതൃത്വം ക്ഷേത്രത്തിലെ പോരായ്മകൾ എന്തൊക്കെയാണെന്ന് ‘ഗവേഷണം’ നടത്തി, ഹൈന്ദവ വോട്ടുകൾ എങ്ങനെ ബിജെപിക്ക് അനുകൂലമാക്കാം എന്ന നിരീക്ഷണത്തിലാണ്. മമതാ ബാനർജി ഹിന്ദുവായി അഭിനയിക്കുകയാണെന്ന ആരോപണവുമായി ഇപ്പോൾ ബിജെപി രംഗത്ത് വന്നുകഴിഞ്ഞു. 

ക്ഷേത്രത്തിലെ പ്രസാദം ‘ഹലാൽ’ ആണെന്നും ബിജെപി ആരോപിക്കുന്നുണ്ട്. പ്രസാദം തയ്യാറാക്കുന്നത് മുസ്ലിങ്ങളാണെന്നും, ഇത് വിതരണം ചെയ്യുന്ന റേഷൻ കടകൾ നടത്തുന്നതും മുസ്ലിങ്ങൾ തന്നെയാണെന്നും ബിജെപി പറയുന്നു. 

ഫലത്തിൽ, അടുത്ത നിയമസഭാ തിരഞ്ഞെടുപ്പിൽ മമതയും വികസനം വിട്ട് തങ്ങളെപ്പോലെ ‘ക്ഷേത്ര നിർമ്മാണ രാഷ്ട്രീയം’ ഉൾപ്പെടെ പ്രയോഗിക്കുന്നത് ഇപ്പോൾ ബിജെപിയെ വിഷമത്തിലാക്കിയിരിക്കുകയാണ്.

ബംഗാളിലെ രാഷ്ട്രീയ നീക്കങ്ങളെക്കുറിച്ചുള്ള ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കൂ.

Article Summary: Mamata Banerjee adopts temple politics to attract Hindu voters, causing concern for BJP

#WestBengalPolitics #MamataBanerjee #BJP #TemplePolitics #HinduVote #KaliganjByElection