കുമ്പള ഉളുവാർ വാർഡ്: ഹരിത കോട്ടയിലും പോരാട്ടം കടുപ്പിച്ച് സിപിഎം സ്ഥാനാർഥി

കുമ്പള: (KasargodVartha) മുസ്ലിം യൂത്ത് ലീഗ് നേതാവ് യൂസഫ് ഉളുവാറിന്റെ സ്വന്തം തട്ടകമായ ആറാം വാർഡ് ഉളുവാറിൽ ഈ പ്രാവശ്യം മുസ്ലിം ലീഗിന് 'വാക്കോവർ' ഇല്ല. പോരാട്ടം കടുപ്പിക്കാൻ സിപിഎം സ്ഥാനാർഥി പതിനെട്ടടവും പയറ്റുകയാണ്. സിപിഎമ്മിന്റെ പ്രധാന ലക്ഷ്യം ന്യൂജൻ വോട്ടുകളിലാണ്.

കുമ്പള ഗ്രാമപഞ്ചായത്തിലെ ഹരിത കോട്ടയെന്ന് വിശേഷിപ്പിക്കാറുള്ള ഉളുവാറിലാണ് മുസ്ലിം ലീഗ് സ്ഥാനാർത്ഥി നാഫിയാ ഹുസ്സന് കടുത്ത വെല്ലുവിളി ഉയർത്തുന്നത്. സിപിഎം സ്ഥാനാർത്ഥിയായി മത്സരരംഗത്തുള്ള ആയിഷത്ത് റജൂലയാണ് പ്രധാന എതിരാളി. ഇതിനിടയിൽ ബിജെപിയുടെ മമത ശാന്താരാമ ആൾവയും മത്സരരംഗത്തുണ്ട്. ഉളുവാറിൽ ബിജെപിക്ക് വോട്ടുള്ള പ്രദേശങ്ങളുണ്ട്. ബിജെപി വോട്ടുകളിൽ ഉണ്ടായ വർദ്ധനവ് മമതയ്ക്ക് പ്രതീക്ഷ നൽകുന്നുമുണ്ട്.

കാലങ്ങളായി മുസ്ലിം ലീഗിനെ വിജയിപ്പിക്കാറുള്ള വാർഡാണ് ഉളുവാർ. നാട്ടുകാർക്ക് സ്വീകാര്യനായ യൂസഫ് ഉളുവാർ തന്നെ ഇവിടെ നിന്ന് മൂന്ന് തവണ തിരഞ്ഞെടുക്കപ്പെട്ടിട്ടുണ്ട്. കഴിഞ്ഞ തവണ സ്വതന്ത്ര സ്ഥാനാർഥി മുസ്ലിം ലീഗിന് കടുത്ത വെല്ലുവിളി ഉയർത്തിയിരുന്നു. 

'മാറ്റത്തിനായുള്ള വോട്ട്' ജനങ്ങൾ ഏറ്റെടുത്തിരിക്കുന്നുവെന്നും, ഈ പ്രാവശ്യം വിജയം തങ്ങൾക്കായിരിക്കുമെന്നും സിപിഎം പ്രവർത്തകർ പറയുന്നു. ഇതിനായുള്ള എല്ലാ തന്ത്രങ്ങളും മെനയുകയാണ് സിപിഎം പ്രാദേശിക നേതൃത്വം.

കുമ്പള ഗ്രാമപഞ്ചായത്തിലെ മറ്റു വാർഡുകളെപ്പോലെ തന്നെ മത്സരമുണ്ടെന്നും എന്നാൽ വിജയം മുസ്ലിം ലീഗിന് തന്നെയായിരിക്കുമെന്നും ലീഗ് പ്രവർത്തകരും പറയുന്നുണ്ട്. വാർഡ് നിലനിർത്താനുള്ള കടുത്ത പോരാട്ടത്തിലാണ് മുസ്ലിം ലീഗ് പ്രവർത്തകർ.

കുമ്പള ഉളുവാർ വാർഡിലെ ഈ കടുത്ത പോരാട്ടത്തെക്കുറിച്ച് നിങ്ങളുടെ സുഹൃത്തുക്കളുമായി പങ്കുവെക്കൂ. അഭിപ്രായങ്ങൾ രേഖപ്പെടുത്തുക. 

Article Summary: Kumbla Uluvar ward, a Muslim League stronghold, faces tough challenge from CPM and BJP in local polls.

#KumblaElection #UluvarWard #Kasaragod #LocalBodyPolls #MuslimLeague #CPM