കുമ്പളയിൽ രാഷ്ട്രീയ നീക്കങ്ങൾ സജീവം: അവിശ്വാസത്തിനൊപ്പം സീറ്റുറപ്പിക്കാൻ കോൺഗ്രസ്!

കുമ്പള: (KasargodVartha) ഗ്രാമപഞ്ചായത്ത് യുഡിഎഫ് ഭരണസമിതിക്കെതിരെ പ്രധാന പ്രതിപക്ഷ കക്ഷിയായ ഭാരതീയ ജനതാ പാർട്ടി അവിശ്വാസ പ്രമേയത്തിന് നോട്ടീസ് നൽകിയതോടെ രാഷ്ട്രീയ അന്തരീക്ഷം ചൂടുപിടിച്ചു. വരാനിരിക്കുന്ന പഞ്ചായത്ത് തെരഞ്ഞെടുപ്പിൽ കൂടുതൽ നേട്ടങ്ങളുണ്ടാക്കാൻ കോൺഗ്രസ് ഈ സാഹചര്യം മുതലെടുത്ത് സമ്മർദ്ദ തന്ത്രങ്ങളുമായി രംഗത്തെത്തി.

ബസ് ഷെൽട്ടർ നിർമ്മാണവുമായി ബന്ധപ്പെട്ട് പഞ്ചായത്തിൽ ഉടലെടുത്ത ഭരണപ്രതിസന്ധി ജനങ്ങളിലേക്ക് എത്തിക്കാനാണ് ബിജെപി അവിശ്വാസ പ്രമേയം കൊണ്ടുവന്നിരിക്കുന്നത്. പഞ്ചായത്ത് സെക്രട്ടറിയും ഭരണസമിതിയും തമ്മിലുള്ള ഭിന്നതകൾക്കിടയിലും പരാതികൾക്ക് കുറവില്ല. 

രാഷ്ട്രീയ പാർട്ടികൾ പരസ്പരം ആരോപണങ്ങളും പ്രത്യാരോപണങ്ങളുമായി വാളോങ്ങി നിൽക്കുമ്പോൾ, കോൺഗ്രസിലെയും ലീഗിലെയും അസംതൃപ്തർ ഈ അവസ്ഥ മുതലെടുക്കാൻ ശ്രമിക്കുകയാണ്.

കുമ്പള ഗ്രാമപഞ്ചായത്തിൽ വൈസ് പ്രസിഡന്റ് ഉൾപ്പെടെ രണ്ട് അംഗങ്ങളാണ് കോൺഗ്രസിനുള്ളത്. റെയിൽവേ സ്റ്റേഷൻ (ബത്തേരി), മാട്ടംകുഴി വാർഡുകളിലാണ് കോൺഗ്രസ് പ്രധാനമായും ലക്ഷ്യമിടുന്നത്. 

ഈ വാർഡുകളിൽ വിജയപ്രതീക്ഷയുള്ളതിനാൽ, കുമ്പള മണ്ഡലം കോൺഗ്രസ് ജനറൽ സെക്രട്ടറി റിയാസ് കരീമും ബ്ലോക്ക് കോൺഗ്രസ് മുൻ ഭാരവാഹി ടി.എ. കുഞ്ഞഹമ്മദ് മൊഗ്രാലും സ്വയം സ്ഥാനാർത്ഥിത്വം പ്രഖ്യാപിച്ച് രംഗത്തെത്തിക്കഴിഞ്ഞു. രണ്ട് ബ്ലോക്ക് പഞ്ചായത്ത് സീറ്റുകളും ഒരു ജില്ലാ പഞ്ചായത്ത് സീറ്റും തങ്ങൾക്ക് ലഭിക്കണമെന്നും അവിശ്വാസ പ്രമേയ ചർച്ചകൾക്ക് മുൻപ് ഇക്കാര്യത്തിൽ വ്യക്തത വേണമെന്നും കോൺഗ്രസ് ആവശ്യപ്പെട്ടിട്ടുണ്ട്.

അവിശ്വാസ പ്രമേയ ചർച്ചകളിലെ കണക്കെടുപ്പിലാണ് നിലവിൽ യുഡിഎഫ് നേതൃത്വം. രണ്ട് സ്വതന്ത്രർ ഉൾപ്പെടെ മൂന്ന് അംഗങ്ങളുള്ള സിപിഐ.എം അവിശ്വാസ പ്രമേയത്തിൽ നിന്ന് വിട്ടുനിൽക്കാനാണ് സാധ്യത. ബിജെപിക്ക് 9 അംഗങ്ങളുണ്ട്. യുഡിഎഫിനും 9 അംഗങ്ങളാണുള്ളത് – മുസ്‌ലിം ലീഗ് 7, കോൺഗ്രസ് 2. മൊഗ്രാൽ കൊപ്പളം വാർഡിലെ സ്വതന്ത്ര അംഗം കൗലത്ത് ബീവിയുടെയും എസ്.ഡി.പി.ഐ. അംഗം അൻവർ ആരിക്കാടിയുടെയും പിന്തുണയിലാണ് യുഡിഎഫ് ഭരണസമിതി ഭരണം നടത്തുന്നത്. 

എന്നാൽ, ബസ് ഷെൽട്ടർ അഴിമതി ആരോപണങ്ങളിൽ എസ്.ഡി.പി.ഐ. ശക്തമായ നിലപാട് സ്വീകരിച്ചതിനാൽ, അവിശ്വാസ പ്രമേയത്തിൽ യുഡിഎഫിനെ പിന്തുണയ്ക്കാൻ സാധ്യത കുറവാണ്. എസ്.ഡി.പി.ഐയും സിപിഐ.എമ്മിനെപ്പോലെ വിട്ടുനിൽക്കാനാണ് സാധ്യത. 

അങ്ങനെയാണെങ്കിൽ 9-10 എന്ന നിലയിൽ അവിശ്വാസത്തെ പരാജയപ്പെടുത്താമെന്നാണ് യുഡിഎഫിന്റെ കണക്കുകൂട്ടൽ. എന്നാൽ, 'പാളയത്തിൽ പട'യുണ്ടാകുമോ എന്ന ഭയം യുഡിഎഫ് നേതൃത്വത്തിനുണ്ട്.

അതിനിടെ, ബസ് ഷെൽട്ടർ നിർമ്മാണവുമായി ബന്ധപ്പെട്ട് ഉയർന്നുവന്ന ആരോപണങ്ങളിൽ സമഗ്ര അന്വേഷണം ആവശ്യപ്പെട്ട് എസ്.ഡി.പി.ഐ. കുമ്പള പഞ്ചായത്ത് കമ്മിറ്റി സംസ്ഥാന തിരഞ്ഞെടുപ്പ് കമ്മീഷന് പരാതി നൽകി. 

ഈ പരാതിയിൽ അന്വേഷണം നടത്താൻ തിരഞ്ഞെടുപ്പ് കമ്മീഷൻ ഉത്തരവിടുകയും ചെയ്തു. എസ്.ഡി.പി.ഐ. കുമ്പള പഞ്ചായത്ത് കമ്മിറ്റി പ്രസിഡന്റ് നാസർ ബംബ്രാണയാണ് പരാതി നൽകിയത്. നേരത്തെ പഞ്ചായത്ത് സെക്രട്ടറി നൽകിയ പരാതിയിൽ പോലീസ് അന്വേഷണം നടന്നുവരികയാണ്. 

പഞ്ചായത്ത് പ്രസിഡന്റ് യു.പി. താഹിറ-യൂസഫ് നൽകിയ പരാതിയിൽ വിജിലൻസ് അന്വേഷണവും നടക്കുന്നുണ്ട്. ഈ രണ്ട് അന്വേഷണങ്ങളിലും കഴമ്പുണ്ടെന്ന് കണ്ടാൽ യുഡിഎഫിന് അത് വലിയ പ്രത്യാഘാതങ്ങൾ സൃഷ്ടിക്കും. മറിച്ചാണെങ്കിൽ പ്രതിപക്ഷത്തിനും അത് തിരിച്ചടിയാകും.

കുമ്പളയിലെ ഈ രാഷ്ട്രീയ നീക്കങ്ങളെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Article Summary: Political developments in Kumbla: BJP's no-confidence motion, Congress seeks gains.

#KumblaPolitics #NoConfidenceMotion #KeralaPolitics #UDF #BJP #Congress