കുമ്പള ടോൾ ബൂത്തിൽ അക്രമം: സിപിഎം, ലീഗ് നേതാക്കളുൾപ്പെടെ 10 പേർക്കെതിരെ കേസ്; സമരത്തിൽ നിന്ന് പിന്നോട്ടില്ലെന്ന് ആക്ഷൻ കമ്മിറ്റി

കുമ്പള: (KasargodVrtha) ദേശീയപാത ടോൾ ബൂത്തിൽ അക്രമം നടത്തുകയും വാഹന ഗതാഗതം തടസ്സപ്പെടുത്തുകയും ചെയ്തുവെന്ന പരാതിയിൽ സി.പി.എം, മുസ്ലിം ലീഗ് നേതാക്കൾ ഉൾപ്പെടെ പത്തുപേർക്കെതിരെ കുമ്പള പൊലീസ് കേസെടുത്തു.

ടോൾ വിരുദ്ധ സമരസമിതി നേതാവും സി.പി.എം കുമ്പള ഏരിയാ സെക്രട്ടറിയുമായ സി.എ സുബൈർ, മുസ്ലിം ലീഗ് നേതാവും കാസർകോട് ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാനുമായ അഷറഫ് കർള, മുസ്ലിം ലീഗ് ഭാരവാഹിയായ എ.കെ ആരിഫ് എന്നിവർക്കും കണ്ടാലറിയാവുന്ന മറ്റ് ഏഴുപേർക്കുമെതിരെയാണ് കേസെടുത്തത്.

ടോൾ ബൂത്ത് മാനേജറും ഹരിയാന സ്വദേശിയുമായ അമിത് കുമാർ നൽകിയ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തത്. കഴിഞ്ഞ ബുധനാഴ്ച രാത്രി 10 മണിയോടെയാണ് കേസിനാസ്പദമായ സംഭവം. 

പ്രതികൾ സംഘം ചേർന്ന് ടോൾ ബൂത്തിന് മുന്നിലെത്തി വാഹനഗതാഗതം തടസ്സപ്പെടുത്തിയെന്നും, പരാതിക്കാരനെ ഒന്നാം പ്രതിയായ സി.എ സുബൈർ തടഞ്ഞുനിർത്തി മർദ്ദിച്ചുവെന്നും എഫ്.ഐ.ആറിൽ പറയുന്നു. കൂടാതെ ടോൾ ബൂത്തിലെ മറ്റ് ജീവനക്കാരെയും ഭീഷണിപ്പെടുത്തുകയും അസഭ്യം പറയുകയും ചെയ്തതായും പരാതിയിൽ വ്യക്തമാക്കുന്നുണ്ട്.

സമരത്തിൽ നിന്ന് പിന്നോട്ടില്ല: ആക്ഷൻ കമ്മിറ്റി 

അതേസമയം, എത്ര കേസെടുത്താലും ടോൾ വിരുദ്ധ സമരത്തിൽ നിന്ന് ഒരിഞ്ചും പിന്നോട്ടില്ലെന്ന് കാസർകോട് ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ അഷറഫ് കർള പ്രതികരിച്ചു. ജനങ്ങളെ കൊള്ളയടിക്കുന്ന ടോൾ പിരിവിനെതിരെ നിയമപരമായും സമര പോരാട്ടമായും മുന്നോട്ടുപോകുമെന്നും അദ്ദേഹം വ്യക്തമാക്കി.

ഈ വാർത്ത വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Kumbala Police have registered a case against 10 people, including CPM and Muslim League leaders, for alleged violence and obstruction of traffic at the toll booth. The Action Committee stated they will continue the protest.

#Kumbala #TollBooth #Kasaragod #CPM #MuslimLeague #Protest #PoliceCase #KeralaNews