കുമ്പള ആരിക്കാടി ടോൾ ബൂത്തിൽ ഹമ്പ് നിർമാണം: ജനങ്ങളുടെ പ്രതിഷേധത്തെ തുടർന്ന് പ്രവൃത്തി നിർത്തിവെച്ചു

കുമ്പള: (KasargodVartha) ആരിക്കാടി ടോൾ ബൂത്ത് നിർമ്മാണവുമായി ബന്ധപ്പെട്ട് ഹമ്പ് നിർമ്മിക്കുന്നതിനായി റോഡിൽ ഗതാഗത തടസ്സം സൃഷ്ടിച്ചതിനെതിരെ ജനങ്ങൾ ശക്തമായ പ്രതിഷേധം സംഘടിപ്പിച്ചു. ഇതേത്തുടർന്ന് നിർമ്മാണ പ്രവൃത്തി നിർത്തിവെപ്പിച്ചു.

ടോൾ ബൂത്തിന്റെ ഇരുവശങ്ങളിലും ഹമ്പുകൾ സ്ഥാപിക്കുകയും, ഗതാഗതം തടസ്സപ്പെടുത്താനായി റോഡിൽ തടങ്ങൾ വെക്കുകയും ചെയ്തതിനെ തുടർന്ന് ആംബുലൻസുകൾക്കും അടിയന്തര സേവന വാഹനങ്ങൾക്കും പോലും നീങ്ങാനാകാത്ത അവസ്ഥയുണ്ടായതോടെയാണ് ജനങ്ങൾ പ്രതിഷേധവുമായി രംഗത്തെത്തിയത്. 

മൂന്നു പാതകളിൽ രണ്ടെണ്ണം അടച്ചതിനെ തുടർന്ന് ദേശീയപാതയിൽ കനത്ത ഗതാഗതക്കുരുക്ക് അനുഭവപ്പെട്ടതും ജനങ്ങളെ പ്രകോപിതരാക്കി. ആക്ഷൻ കമ്മിറ്റി ഭാരവാഹികളുടെ നേതൃത്വത്തിൽ ജനങ്ങൾ ടോൾ ബൂത്ത് പ്രദേശത്ത് എത്തി റോഡ് തടഞ്ഞ് നിർമ്മാണ പ്രവർത്തനം നിർത്തിവെപ്പിച്ചു. 

ഗതാഗതം തടഞ്ഞിരുന്ന തടങ്ങൾ പ്രതിഷേധക്കാർ വലിച്ചെറിഞ്ഞു. ഇതിനെ തുടർന്ന് കരാർ കമ്പനി ജീവനക്കാരും സമരക്കാരും തമ്മിൽ വാക്കേറ്റമുണ്ടായി. വിവരം ലഭിച്ചതിനെത്തുടർന്ന് കുമ്പള പോലീസും സ്ഥലത്തെത്തി സ്ഥിതിഗതികൾ നിയന്ത്രിച്ചു.

സമരക്കാരുമായി നടത്തിയ ചർച്ചയിൽ, റോഡിലെ തടസ്സങ്ങൾ ഉടൻ നീക്കം ചെയ്യുമെന്നും അടച്ചിട്ട രണ്ട് പാതകളും തുറക്കുമെന്നും പോലീസ് ഉറപ്പു നൽകി. ടോൾ പിരിവ് ആരംഭിക്കുമ്പോൾ ആവശ്യമായ സാഹചര്യത്തിൽ മാത്രമേ ഹമ്പുകൾ നിർമ്മിക്കൂ എന്നും നിലവിലെ ഹമ്പുകൾ ഉടൻ നീക്കം ചെയ്യുമെന്നും പോലീസും കരാർ കമ്പനിയും അറിയിച്ചു.

സമരസമിതി നേതാക്കളായ എ കെ ആരിഫ്, അഷ്‌റഫ് കർള, സി എ സുബൈർ എന്നിവരാണ് പ്രതിഷേധത്തിന് നേതൃത്വം നൽകിയത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ താഴെ പങ്കുവെക്കുക. ഈ വിവരങ്ങൾ നിങ്ങളുടെ സുഹൃത്തുക്കളുമായി ഷെയർ ചെയ്യുക.

Article Summary: Public protest halts construction of a speed hump at Arikkady toll booth in Kumbala.

#Kumbala #TollBooth #Protest #HumpConstruction #TrafficBlockade #Kerala