സജി ചെറിയാന് നെല്ലിക്കാത്തളം വെക്കേണ്ടി വരും, സംസ്കാരമില്ലാത്ത മന്ത്രി; രൂക്ഷ വിമർശനവുമായി അലോഷ്യസ് സേവ്യർ

കാസർകോട്: (KasargodVartha) മന്ത്രി സജി ചെറിയാൻ സംസ്കാരമില്ലാത്ത മന്ത്രിയാണെന്നും, ഇത്തരത്തിൽ തുടരുകയാണെങ്കിൽ അദ്ദേഹത്തിന് നെല്ലിക്കാത്തളം വെക്കേണ്ടിവരുമെന്നും കെ.എസ്.യു സംസ്ഥാന പ്രസിഡന്റ് അലോഷ്യസ് സേവ്യർ. കാസർകോട് പ്രസ് ക്ലബിൽ നടത്തിയ വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം. മുഖ്യമന്ത്രി പിണറായി വിജയന്റെ ‘ഗുഡ് ലിസ്റ്റിൽ’ ഇടം പിടിക്കാനുള്ള ശ്രമത്തിന്റെ ഭാഗമായാണ് മന്ത്രി സജി ചെറിയാൻ ഇത്തരം വർഗ്ഗീയ പരാമർശങ്ങൾ നടത്തുന്നതെന്നും അലോഷ്യസ് സേവ്യർ ആരോപിച്ചു.

വർഗീയത സർക്കാർ സ്പോൺസേർഡ്

സാമുദായിക നേതാക്കളും മന്ത്രിമാരും വർഗീയ പരാമർശങ്ങൾ അവസാനിപ്പിക്കണം. സംസ്ഥാനത്ത് നടക്കുന്ന എല്ലാ വർഗീയ പ്രചാരണങ്ങളും സർക്കാർ സ്പോൺസേർഡാണെന്നും അദ്ദേഹം വിമർശിച്ചു. സ്ഥാനാർഥി നിർണയവുമായി ബന്ധപ്പെട്ട് അടുത്ത ദിവസങ്ങളിൽ കെപിസിസി നേതാക്കളുമായി ചർച്ച നടത്തും. വരാനിരിക്കുന്ന നിയമസഭാ തിരഞ്ഞെടുപ്പിൽ യുവാക്കൾക്ക് കൂടുതൽ പരിഗണന ലഭിക്കുമെന്നാണ് പ്രതീക്ഷയെന്നും അലോഷ്യസ് സേവ്യർ വ്യക്തമാക്കി.

'ജെൻസി കണക്ട്' യാത്രയ്ക്ക് ചൊവ്വാഴ്ച തുടക്കം

അതിനിടെ, കെ.എസ്.യു സംസ്ഥാന പ്രസിഡന്റ് അലോഷ്യസ് സേവ്യർ നയിക്കുന്ന ‘ജെൻസി കണക്ട്’ യാത്രയ്ക്ക് ചൊവ്വാഴ്ച കാസർകോട് തുടക്കമാകും. 2026-ലെ നിയമസഭാ തിരഞ്ഞെടുപ്പ് മുന്നിൽ കണ്ട് കേരളത്തിലെ വിദ്യാർത്ഥി സമൂഹത്തിന്റെ ആവശ്യങ്ങളും പ്രതീക്ഷകളും ഉൾക്കൊള്ളുന്ന ഒരു ‘സ്റ്റുഡന്റ് മാനിഫെസ്റ്റോ’ തയ്യാറാക്കുക എന്ന ലക്ഷ്യത്തോടെയാണ് യാത്ര സംഘടിപ്പിക്കുന്നത്.

യാത്രയുടെ ഭാഗമായി സംഘടിപ്പിക്കുന്ന ‘ജെൻസ് പാർലമെന്റ്’ പരിപാടി വൈകിട്ട് എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ എം.പി ഉദ്ഘാടനം ചെയ്യും. കേരളത്തിലെ 14 ജില്ലകളിലൂടെയും പര്യടനം നടത്തുന്ന യാത്രയിൽ വിവിധ മേഖലകളിലെ വ്യക്തിത്വങ്ങളും യു.ഡി.എഫ് നേതാക്കളും പങ്കെടുക്കും.

വിഷൻ ഡോക്യുമെന്റ് തയ്യാറാക്കും

വിദ്യാർത്ഥികളുമായി നേരിട്ട് സംവദിച്ച് തയ്യാറാക്കുന്ന വിഷൻ ഡോക്യുമെന്റ് യാത്രയുടെ സമാപനത്തിന് ശേഷം യു.ഡി.എഫ് നേതൃത്വത്തിന് ഔദ്യോഗികമായി കൈമാറും. ജെൻസി മീറ്റ് അപ്പ്, ജെൻസി വാക്ക്, ഔട്ട്‌റീച്ച് പ്രോഗ്രാമുകൾ, ലോങ് മാർച്ച് തുടങ്ങിയ വൈവിധ്യമാർന്ന പരിപാടികളാണ് യാത്രയുടെ ഭാഗമായി ആസൂത്രണം ചെയ്തിരിക്കുന്നത്.

അലോഷ്യസ് സേവ്യർ ക്യാപ്റ്റനായ യാത്രയിൽ കെ.എസ്.യു സംസ്ഥാന വൈസ് പ്രസിഡന്റുമാരായ എം.ജെ. യദുകൃഷ്ണൻ, അരുൺ രാജേന്ദ്രൻ, മുഹമ്മദ് ഷമ്മാസ്, ആൻ സെബാസ്റ്റ്യൻ എന്നിവർ വൈസ് ക്യാപ്റ്റന്മാരായി അണിനിരക്കും. കെ.എസ്.യു സംസ്ഥാന ജനറൽ സെക്രട്ടറിമാരും എക്‌സിക്യൂട്ടീവ് അംഗങ്ങളും സ്ഥിരാംഗങ്ങളായി യാത്രയെ അനുഗമിക്കും. ‘ജെൻസി കണക്ട്’ യാത്ര ജനുവരി 28-ന് തിരുവനന്തപുരത്ത് സമാപിക്കും.

രാഷ്ട്രീയത്തിലെ ഈ വാക്പോരിനെ നിങ്ങൾ എങ്ങനെ കാണുന്നു? അഭിപ്രായം കമന്റ് ചെയ്യൂ.

Article Summary: KSU State President Aloysius Xavier criticized Minister Saji Cherian and announced the launch of the 'GenZ Connect' Yatra from Kasaragod to prepare a student manifesto for the 2026 elections.

#KSU #AloysiusXavier #SajiCherian #GenZConnect #KeralaPolitics #KasaragodNews