‘പിണറായിയുടെ കുടുംബത്തിനെതിരായ കേസിൽ പ്രതിരോധം തീർക്കൽ മാത്രമാണ് ഇപ്പോൾ പാർട്ടിയിൽ നടക്കുന്നത്’; കോടിയേരിയുടെ ഭാര്യ വിനോദിനിയുടെ സഹോദരൻ എസ് ആർ വിനയകുമാർ സിപിഎം വിട്ടു
● 2009 മുതൽ പാർട്ടിയിൽ സജീവമായിരുന്നുവെന്നും പട്ടം ബ്രാഞ്ച് അംഗമായിരുന്നുവെന്നും അദ്ദേഹം
● പിണറായിയുടെ കുടുംബത്തിനെതിരായ കേസിൽ പ്രതിരോധം തീർക്കൽ മാത്രമാണ് പാർട്ടിയിൽ നടക്കുന്നതെന്ന് വിമർശനം
● പിണറായി വിജയനും എം വി ഗോവിന്ദനും മാറാതെ സിപിഎം രക്ഷപ്പെടില്ലെന്ന് വിനയകുമാർ പറഞ്ഞു
● ട്രിവാൻഡ്രം ക്ലബ് കേസിനെ തുടർന്ന് ഇദ്ദേഹത്തെ എംഡി സ്ഥാനത്തുനിന്ന് സർക്കാർ ഒഴിവാക്കിയിരുന്നു
തിരുവനന്തപുരം: (KasargodVartha) സിപിഎം സംസ്ഥാന മുൻ സെക്രട്ടറി കോടിയേരി ബാലകൃഷ്ണൻ്റെ ഭാര്യാ സഹോദരനും പൊതുമേഖലാ സ്ഥാപന മുൻ മേധാവിയുമായ എസ് ആർ വിനയകുമാർ പാർട്ടി വിട്ടു. കോടിയേരിയുടെ ഭാര്യ വിനോദിനിയുടെ സഹോദരനായ വിനയകുമാർ പാർട്ടി അംഗത്വം പുതുക്കാൻ തയ്യാറാകാതിരുന്നതോടെയാണ് പുറത്തുപോകൽ ഔദ്യോഗികമായത്. പാർട്ടിയിൽ ഇപ്പോൾ പിണറായിസം മാത്രമേ ഉള്ളുവെന്ന ആരോപണം ഉന്നയിച്ചാണ് വിനയകുമാർ സിപിഎം ബന്ധം ഉപേക്ഷിക്കുന്നത്.
2009 മുതൽ പാർട്ടിയിൽ സജീവമായി ഉണ്ടെന്നും തിരുവനന്തപുരം പട്ടം ബ്രാഞ്ച് അംഗമായിരുന്നുവെന്നും വിനയകുമാർ പറഞ്ഞു. തികഞ്ഞ അടിമയായി പാർട്ടിയിൽ ഇനിയും മുന്നോട്ടുപോകുന്നതിൽ അർഥമില്ലെന്നും അദ്ദേഹം പറഞ്ഞു.
'വിമർശിക്കുന്നവർ വർഗവഞ്ചകരാകും'
'ഇപ്പോൾ സിപിഎം ഇല്ല. സംസ്ഥാന സെക്രട്ടറി എം വി ഗോവിന്ദൻ പറയുന്നത് സിപിഎം എന്നാൽ പിണറായി ആണെന്നും പിണറായി എന്നാൽ സിപിഎം ആണെന്നുമാണ്. പാർട്ടിയിൽ ഇതുവരെ കേട്ടുകേൾവിയില്ലാത്ത കാര്യമാണിത്. നേതാക്കന്മാർ പറയുന്ന കാര്യങ്ങൾ മുഴുവൻ അണികൾ വിഴുങ്ങുന്ന നിലയാണുള്ളത്. വിമർശിക്കുന്നവർ വർഗവഞ്ചകരാകും.
കുറേക്കാലമായി പിണറായി വിജയൻ്റെ കുടുംബത്തിനെതിരായ കേസിൽ പ്രതിരോധം തീർക്കൽ മാത്രമാണ് പാർട്ടിയിൽ നടക്കുന്നത്. മറ്റ് പാർട്ടി പ്രവർത്തനങ്ങൾ ഒന്നുമില്ല. 10 വർഷത്തെ ഭരണത്തിന് ശേഷം പാർട്ടി ചരിത്രത്തിലില്ലാത്ത വിധം തോൽവി ഏറ്റുവാങ്ങി. എന്നിട്ടും അവർ തിരുത്താൻ തയ്യാറാകുന്നില്ല'- വിനയകുമാർ വിമർശിച്ചു.
'ഗോവിന്ദനും പിണറായിയും മാറാതെ രക്ഷപ്പെടില്ല'
തിരുത്താനായി ചേർന്ന സംസ്ഥാന സമിതിയുടെ തലേന്ന് എം വി ഗോവിന്ദൻ വാർത്താസമ്മേളനം വിളിച്ച് ഞാനും പിണറായിയും മാറുന്നില്ല എന്ന് പറയുകയാണ് ചെയ്തത്. എന്താണ് അതിൻ്റെ സന്ദേശമെന്നും വിനയകുമാർ ചോദിക്കുന്നു. വിപുലീകൃത ജില്ലാ കമ്മിറ്റിയിൽ ഉൾപ്പെടുത്തിയത് സ്തുതിപാഠകരെ മാത്രമാണ്. തോൽവിക്ക് ശേഷം എം വി ഗോവിന്ദൻ കുറ്റം പറയുന്നത് അണികളെയാണ്. ഇവരെ നേതാക്കന്മാരായി അംഗീകരിച്ചതാണ് പാർട്ടി അണികൾക്ക് പറ്റിയ തെറ്റെന്നും, ഗോവിന്ദനും പിണറായിയും മാറാതെ പാർട്ടി രക്ഷപ്പെടില്ലെന്നും വിനയകുമാർ പറഞ്ഞു.
ട്രിവാൻഡ്രം ക്ലബ് കേസും അകൽച്ചയും
ഇടതുഭരണകാലത്ത് വ്യവസായ വകുപ്പിന് കീഴിലുള്ള പൊതുമേഖലാ സ്ഥാപനമായ യുണൈറ്റഡ് ഇലക്ട്രിക്കൽസിൻ്റെ എംഡിയായിരുന്നു എസ് ആർ വിനയകുമാർ. ട്രിവാൻഡ്രം ക്ലബ്ബിൽ പണംവച്ച് ചീട്ടുകളിച്ചതിന് വിനയകുമാർ അടക്കം 9 പേരെ പോലീസ് അറസ്റ്റ് ചെയ്തിരുന്നു. ഈ സംഭവത്തിന് ശേഷം ഇദ്ദേഹത്തെ എംഡി സ്ഥാനത്തുനിന്ന് സർക്കാർ ഒഴിവാക്കിയിരുന്നു. ഇതിന് പിന്നാലെയാണ് ഇപ്പോൾ പാർട്ടിയുമായുള്ള ബന്ധം പൂർണമായും വിച്ഛേദിച്ചുകൊണ്ടുള്ള പ്രഖ്യാപനം ഉണ്ടായിരിക്കുന്നത്.
കൂടുതല് വാർത്തകളും വിശേഷങ്ങളും അറിയാന് ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക.
Article Summary: SR Vinayakumar, brother-in-law of late CPM leader Kodiyeri Balakrishnan, quit the party citing 'Pinarayism' and lack of internal democracy.
#CPMKerala #PinarayiVijayan #MVGovindan #KeralaPolitics #KodiyeriBalakrishnan #TrivandrumNews #MalayalamPoliticalNews #RenuNews






