തദ്ദേശ തിരഞ്ഞെടുപ്പ് ഫലമറിയാൻ മണിക്കൂറുകൾ മാത്രം; വരണാധികാരി, നിരീക്ഷകർ, സ്ഥാനാർഥികൾ എന്നിവരുടെ സാന്നിധ്യത്തിൽ സ്ട്രോങ് റൂം തുറക്കും; ഫലം തത്സമയം അറിയാം

തിരുവനന്തപുരം: (KasargodVartha) കേരളത്തിലെ തദ്ദേശ സ്ഥാപനങ്ങളിലേക്കുള്ള വാശിയേറിയ തിരഞ്ഞെടുപ്പിന്റെ ഫലം അറിയാൻ ഇനി മണിക്കൂറുകൾ മാത്രം. സംസ്ഥാനത്തെ മുന്നണികളുടെ രാഷ്ട്രീയ ഭാവി നിർണ്ണയിക്കുന്ന സെമിഫൈനൽ മത്സരമായാണ് ഈ തിരഞ്ഞെടുപ്പിനെ വിലയിരുത്തുന്നത്. ശനിയാഴ്ച (13.12.2025) രാവിലെ എട്ടുമണിക്ക് വോട്ടെണ്ണൽ ആരംഭിക്കുമെന്ന് സംസ്ഥാന തിരഞ്ഞെടുപ്പ് കമ്മീഷൻ അറിയിച്ചു. മട്ടന്നൂർ മുനിസിപ്പാലിറ്റി ഒഴികെയുള്ള 1199 തദ്ദേശസ്വയംഭരണ സ്ഥാപനങ്ങളിലെ 23,576 വാർഡുകളിലേക്കാണ് തിരഞ്ഞെടുപ്പ് നടന്നത്.

സംസ്ഥാനത്ത് ആകെ 244 വോട്ടെണ്ണൽ കേന്ദ്രങ്ങളാണ് ഇതിനായി സജ്ജീകരിച്ചിരിക്കുന്നത്. ഗ്രാമ, ബ്ലോക്ക്, ജില്ലാ പഞ്ചായത്തുകളുടെ വോട്ടെണ്ണൽ ബ്ലോക്ക് തലത്തിലുള്ള കേന്ദ്രങ്ങളിലായിരിക്കും നടക്കുക. മുനിസിപ്പാലിറ്റി, കോർപറേഷൻ തലങ്ങളിലെ വോട്ടെണ്ണൽ അതത് സ്ഥാപനങ്ങളിലെ കേന്ദ്രങ്ങളിലായിരിക്കും. ജില്ലാ പഞ്ചായത്തിലേക്കുള്ള പോസ്റ്റൽ ബാലറ്റുകൾ അതത് ജില്ലാ കലക്ടറുടെ നേതൃത്വത്തിൽ കലക്ടറേറ്റുകളിലാണ് എണ്ണുക.

വോട്ടിങ് കേന്ദ്രങ്ങളിൽ വരണാധികാരിയുടെ ടേബിളിൽ പോസ്റ്റൽ ബാലറ്റുകൾ ആദ്യം എണ്ണിത്തുടങ്ങും. ഇതിനുശേഷമായിരിക്കും വോട്ടിങ് മെഷീനുകളിലെ വോട്ടുകൾ എണ്ണിത്തുടങ്ങുന്നത്. സ്ട്രോങ് റൂമുകളിൽനിന്ന് കൺട്രോൾ യൂണിറ്റുകൾ മാത്രമാണ് കൗണ്ടിങ് ടേബിളുകളിൽ എത്തിക്കുക.

സ്ട്രോങ് റൂം തുറക്കുന്ന നടപടികൾ വരണാധികാരി, ഉപവരണാധികാരി, നിരീക്ഷകർ, സ്ഥാനാർഥികൾ, ഏജന്റുമാർ എന്നിവരുടെ സാന്നിധ്യത്തിലായിരിക്കും പൂർത്തിയാക്കുക. തുടർന്ന് ഓരോ വാർഡിലെയും മെഷീനുകൾ കൗണ്ടിങ് ഹാളിലേക്ക് കൊണ്ടുവരും. വാർഡുകളുടെ ക്രമനമ്പർ അനുസരിച്ചായിരിക്കും കൺട്രോൾ യൂണിറ്റുകൾ ഓരോ കൗണ്ടിങ് ടേബിളിലും വെക്കുക. ഒരു വാർഡിലെ എല്ലാ പോളിങ് സ്റ്റേഷനുകളിലെയും മെഷീനുകൾ ഒരു ടേബിളിൽത്തന്നെ എണ്ണുന്ന രീതിയിലാണ് ക്രമീകരണം.

വോട്ടിങ് മെഷീനിലെ സീലുകളും സ്പെഷ്യൽ ടാഗുകളും കൃത്യമായി ഉണ്ടെന്ന് സ്ഥാനാർഥികളുടെയോ കൗണ്ടിങ്/ഇലക്ഷൻ ഏജന്റുമാരുടെയോ സാന്നിധ്യത്തിൽ പരിശോധിച്ചുറപ്പിച്ച ശേഷമാണ് വോട്ടെണ്ണൽ ആരംഭിക്കുക. കൺട്രോൾ യൂണിറ്റിൽനിന്ന് ആദ്യം ഗ്രാമപഞ്ചായത്ത് സ്ഥാനാർഥികളുടെ വോട്ടുനിലയാണ് ലഭിക്കുക. ഇതിനുശേഷം ബ്ലോക്ക് പഞ്ചായത്ത് സ്ഥാനാർഥികളുടെയും, തുടർന്ന് ജില്ലാ പഞ്ചായത്ത് സ്ഥാനാർഥികളുടെയും വോട്ടുവിവരം ലഭ്യമാകും.

ഓരോ കൺട്രോൾ യൂണിറ്റിലെയും ഫലം അപ്പോൾത്തന്നെ കൗണ്ടിങ് സൂപ്പർവൈസർ രേഖപ്പെടുത്തി വരണാധികാരിക്ക് കൈമാറും. ഒരു വാർഡിലെ പോസ്റ്റൽ ബാലറ്റുകളും എല്ലാ ബൂത്തുകളിലെയും വോട്ടുകളും എണ്ണിത്തീരുന്ന മുറയ്ക്ക്, അതത് തലത്തിലെ വരണാധികാരി ഫലം പ്രഖ്യാപിക്കുമെന്നും തിരഞ്ഞെടുപ്പ് കമ്മീഷൻ അറിയിച്ചു. ഓരോ ബൂത്തും എണ്ണിത്തീരുമ്പോൾ വോട്ടുനില തിരഞ്ഞെടുപ്പു കമ്മിഷൻ്റെ ട്രെൻഡ് പോർട്ടലിൽ അപ്‌ലോഡ് ചെയ്യും. അതുവഴി ലീഡ് നിലയും അന്തിമ ഫലവും തത്സമയം പൊതുജനങ്ങൾക്ക് അറിയാൻ സാധിക്കും.

വോട്ടെണ്ണൽ നടപടികൾ പൂർത്തിയാക്കിയ ശേഷം സുരക്ഷിതമായി സൂക്ഷിക്കേണ്ട തിരഞ്ഞെടുപ്പ് രേഖകൾക്കായി ശനിയാഴ്ച എല്ലാ സർക്കാർ ട്രഷറികളും തുറന്നു പ്രവർത്തിക്കണമെന്ന് ട്രഷറി ഡയറക്ടർക്ക് സംസ്ഥാന തിരഞ്ഞെടുപ്പ് കമ്മിഷൻ നിർദേശം നൽകിയിട്ടുണ്ട്.

പ്രചാരണ ബോർഡുകൾ നീക്കം ചെയ്യണം

തദ്ദേശ തിരഞ്ഞെടുപ്പിനുള്ള വോട്ടെടുപ്പ് പൂർത്തിയായ സാഹചര്യത്തിൽ, റോഡുകളിലും പൊതുസ്ഥലങ്ങളിലുമുള്ള പ്രചരണ ബോർഡുകൾ, ബാനറുകൾ എന്നിവ ഉടൻ നീക്കം ചെയ്യാൻ സ്ഥാനാർഥികളും രാഷ്ട്രീയപാർട്ടികളും മുൻകൈയെടുക്കണമെന്ന് സംസ്ഥാന തിരഞ്ഞെടുപ്പ് കമ്മിഷണർ എ ഷാജഹാൻ അറിയിച്ചു. ഇവ നീക്കം ചെയ്യാത്തപക്ഷം, ബന്ധപ്പെട്ട തദ്ദേശസ്വയംഭരണ സ്ഥാപനങ്ങൾ അവ നീക്കം ചെയ്യുകയും അതിനുള്ള ചെലവ് സ്ഥാനാർഥികളിൽനിന്ന് ഈടാക്കുകയും അവരുടെ തിരഞ്ഞെടുപ്പ് ചെലവിൽ ഉൾപ്പെടുത്തുകയും ചെയ്യുമെന്നും കമ്മീഷൻ വ്യക്തമാക്കി.

വോട്ടെണ്ണൽ പ്രക്രിയയുടെ വിശദാംശങ്ങൾ എല്ലാവരിലേക്കും എത്തിക്കുക.

Article Summary: Kerala Local Body Election counting starts at 8 AM Saturday, results live on the trend portal; strong room opening and safety protocols detailed.

#KeralaElection #LocalBodyPolls #CountingDay #ElectionResults #EVM #KeralaPolitics