സർക്കാരിന്റെ പുതിയ മദ്യത്തിന് 'മലബാർ മിസ്റ്ററി' എന്ന പേര് മാറ്റിയേക്കും; പകരമെത്തുക 'മിന്നൽ മാജിക്'

കോഴിക്കോട്: (KasargodVartha) സർക്കാർ പുറത്തിറക്കുന്ന പുതിയ മദ്യത്തിന് നൽകിയ 'മലബാർ മിസ്റ്ററി' എന്ന പേര് മാറ്റാൻ ആലോചന. ഈ പേരിന് പകരമായി 'മിന്നൽ മാജിക്' എന്ന പേരാണ് നിലവിൽ സർക്കാരിന്റെ പരിഗണനയിലുള്ളത്. 

ശനിയാഴ്ച, പ്ലാന്റ് ഉദ്ഘാടന വേദിയിൽ വെച്ച് എക്സൈസ് മന്ത്രി പുതിയ പേര് ഔദ്യോഗികമായി പ്രഖ്യാപിക്കും. മദ്യത്തിന് മലബാർ എന്ന് പേരിടുന്നതിനോട് വലിയ രീതിയിലുള്ള എതിർപ്പ് ഉയർന്ന സാഹചര്യത്തിലാണ് പേര് മാറ്റാനുള്ള നടപടിയിലേക്ക് സർക്കാർ കടന്നത്.

പ്രതിഷേധം ഫലംകണ്ടു

സർക്കാരിന്റെ പുതിയ മദ്യത്തിന്റെ പേര് പതിപ്പിച്ച ലേബൽ അച്ചടിച്ചശേഷമാണ് മാറ്റാൻ തീരുമാനിച്ചിരിക്കുന്നത്. സർക്കാരിന്റെ മേൽനോട്ടത്തിൽ പാലക്കാട്ട് നിന്നും ഉൽപാദിപ്പിക്കുന്ന ബ്രാണ്ടിക്ക് 'മലബാർ മിസ്റ്ററി' എന്ന് പേര് നൽകാനുള്ള നീക്കം പൂർണ്ണമായും ഉപേക്ഷിക്കണമെന്ന് കേരള മദ്യനിരോധന സമിതി രക്ഷാധികാരിയും കോഴിക്കോട് പാളയം ചീഫ് ഇമാമുമായ ഡോ ഹുസൈൻ മടവൂർ ആവശ്യപ്പെട്ടു. ഈ നടപടി മലബാർ പ്രദേശത്തെ മുഴുവൻ ജനങ്ങളെയും അവഹേളിക്കുന്നതാണെന്നും മലബാർ എന്നും നന്മയുടെ കൂടെയാണെന്നും അദ്ദേഹം വ്യക്തമാക്കി.

വാഗ്ദാന ലംഘനമെന്ന് വിമർശനം

ജനാധിപത്യത്തിൽ ജനങ്ങളുടെ അഭിപ്രായവും വികാരവും സർക്കാർ മാനിക്കണം. യു ഡി എഫ് ഭരണകാലത്ത് 29 ബാർ മാത്രമുണ്ടായിരുന്ന കേരളത്തിൽ 10 വർഷം കൊണ്ട് എൽ ഡി എഫ് ഭരണത്തിൽ ബാറുകളുടെ എണ്ണം 945 ആയി ഉയർന്നുവെന്ന് അദ്ദേഹം കുറ്റപ്പെടുത്തി. 

ഇപ്പോൾ ബാറുകളുടെ പ്രവൃത്തി സമയം രണ്ട് മണിക്കൂർ വർധിപ്പിച്ചിരിക്കുകയാണ്. നിയമസഭയിലോ മന്ത്രിസഭയിലോ ചർച്ച ചെയ്യാതെയാണ് ഇത്തരം തീരുമാനങ്ങൾ കൈക്കൊള്ളുന്നതെന്നും അദ്ദേഹം പറഞ്ഞു.

ശക്തമായ ജനരോഷം

നാടെങ്ങും മദ്യമൊഴുക്കുന്ന ഇത്തരം തീരുമാനങ്ങൾ നേരത്തേ ഇടതുപക്ഷ സർക്കാർ പുറത്തിറക്കിയ പ്രകടന പത്രികകൾക്കെതിരാണെന്ന് ഡോ ഹുസൈൻ മടവൂർ അഭിപ്രായപ്പെട്ടു. 

മദ്യത്തിന്റെ ലഭ്യത കുറയ്ക്കുമെന്ന് കൃത്യമായി വ്യക്തമാക്കിയ പ്രകടനപത്രിക വിശ്വസിച്ചാണ് ജനം വോട്ട് ചെയ്ത് ഇടതുപക്ഷത്തെ വിജയിപ്പിച്ച് ഭരണത്തിലെത്തിച്ചതെന്ന് സർക്കാർ മനസ്സിലാക്കണം. സർക്കാരിൻ്റെ മനുഷ്യത്വരഹിതമായ ഇത്തരം പ്രവർത്തനങ്ങൾക്കെതിരെ രാഷ്ട്രീയ മതഭേദമെന്യേ ഒന്നിച്ചുള്ള ജനരോഷം ഉയർന്നുവരുമെന്നും അദ്ദേഹം കൂട്ടിച്ചേർത്തു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Kerala government considers renaming its new liquor brand from 'Malabar Mystery' to 'Minnal Magic' following public protests.

#MalabarMystery #MinnalMagic #KeralaLiquorPolicy #ExciseNews #Malabar #Protest #LDFGovernment #KVARTHA