കേരളത്തിന്റെ ധനസ്ഥിതി ഗുരുതര പ്രതിസന്ധിയിൽ! നഷ്ടം 78,000 കോടി കടന്നതായി മുഖ്യമന്ത്രി; വി ഡി സതീശൻ സർക്കാർ സംസ്ഥാനത്തിന്റെ സാമ്പത്തിക സ്ഥിതി വ്യക്തമാക്കുന്ന ധവളപത്രം പുറത്തിറക്കി

തിരുവനന്തപുരം: (KasargodVartha) കേരളത്തിൻ്റെ ധനസ്ഥിതി ഗുരുതരമായ പ്രതിസന്ധിയിലാണെന്നും പുതിയ സർക്കാർ അധികാരമേറ്റെടുത്ത സാമ്പത്തിക ബാധ്യതകൾ വലുതാണെന്നും ചൂണ്ടിക്കാട്ടി കേരളാസ് ഫിസ്കൽ ഹെൽത്ത്: എ സ്റ്റാറ്റസ് റിപ്പോർട്ട് വി ഡി സതീശൻ സർക്കാർ പുറത്തിറക്കി.

മുഖ്യമന്ത്രിയും ധനമന്ത്രിയുമായ വി ഡി സതീഷൻ്റെ ആമുഖത്തോടെയാണ് റിപ്പോർട്ട് നിയമസഭയിൽ പ്രസിദ്ധീകരിച്ചിരിക്കുന്നത്.

കുടിശ്ശികയും ചെലവുകളും

റിപ്പോർട്ടിൻ്റെ എക്സിക്യൂട്ടീവ് സംഗ്രഹം പ്രകാരം സംസ്ഥാനത്തിൻ്റെ ആകെ കുടിശ്ശിക ബാധ്യത 2025-26-ൽ 5.07 ലക്ഷം കോടിയിലെത്തി. വരുമാന വരവിൻ്റെ 77 ശതമാനവും ശമ്പളം, പെൻഷൻ, പലിശ അടക്കമുള്ള പ്രതിബദ്ധ ചെലവുകൾക്കായി ചെലവാകുന്നു.

പലിശ അടവ് മാത്രം മൊത്തം വരുമാനത്തിൻ്റെ 20.9 ശതമാനമാണ്. അതേസമയം മൂലധന ചെലവ്, സംസ്ഥാനത്തിൻ്റെ സാമ്പത്തിക സമ്മർദം, ട്രഷറി പ്രവർത്തനങ്ങളിലും പ്രതിഫലിച്ചിട്ടുണ്ടെന്നാണ് റിപ്പോർട്ട് പറയുന്നത്.

2024-25-ൽ 12 മാസങ്ങളിൽ 10 മാസവും ട്രഷറി ബാലൻസ് നെഗറ്റീവായിരുന്നു. ആർബിഐയുടെ വേയ്‌സ് ആൻഡ് മീൻസ് അഡ്വാൻസ്, ഓവർഡ്രാഫ്റ്റ് സൗകര്യങ്ങളെ ആശ്രയിച്ചാണ് സർക്കാർ പ്രവർത്തിച്ചതെന്നും റിപ്പോർട്ട് വിലയിരുത്തുന്നു.

പുതിയ സർക്കാർ ഏറ്റെടുത്ത കുടിശ്ശിക ബാധ്യതകളും റിപ്പോർട്ടിൽ വിവരിക്കുന്നു. ജീവനക്കാരുടെ ക്ഷാമബത്ത കുടിശ്ശികയായി 21,670 കോടിയും പെൻഷൻകാരുടെ ഡിആർ കുടിശ്ശികയായി 14,387 കോടിയും നിലനിൽക്കുന്നു. ബാങ്കുകൾക്കും കരാറുകാർക്കും നൽകാനുള്ള ബിൽ ഡിസ്കൗണ്ടിംഗ് കുടിശ്ശിക 3,431 കോടിയാണ്. മറ്റ് മാറ്റിവെച്ച പണമടവുകൾ ഉൾപ്പെടെ ആകെ കുടിശ്ശിക 48,733 കോടിയിലെത്തുന്നതായി റിപ്പോർട്ട് പറയുന്നു.

കിഫ്ബിയും പൊതുമേഖലാ സ്ഥാപനങ്ങളും

കേരള ഇൻഫ്രാസ്ട്രക്ചർ ഇൻവെസ്റ്റ്മെൻ്റ് ഫണ്ട് ബോർഡ് സംസ്ഥാന ധനസ്ഥിതിക്ക് അധികഭാരമായെന്നും റിപ്പോർട്ട് വിലയിരുത്തുന്നു. നിലവിൽ 21,000 കോടി വായ്പാ ബാധ്യതയും 35,000 കോടിയോളം ചെലവ് വരുന്ന പദ്ധതികൾക്കുള്ള ധനസമാഹരണ ബാധ്യതയും നിലനിൽക്കുന്നു. കിഫ്ബിയുടെ കടബാധ്യത യഥാർഥത്തിൽ സംസ്ഥാനത്തിൻ്റെ കടബാധ്യതയാണെന്നും, ഫണ്ട് സമാഹരണ ചെലവ് സംസ്ഥാന സർക്കാരിനേക്കാൾ ഒന്ന് മുതൽ 1.5 ശതമാനം വരെ കൂടുതലാണെന്നും റിപ്പോർട്ട് ചൂണ്ടിക്കാട്ടുന്നു.

പൊതുമേഖല സ്ഥാപനങ്ങളുടെ നഷ്ടവും സംസ്ഥാന ഖജനാവിന് ഭാരമാണെന്ന് റിപ്പോർട്ട് പറയുന്നു. 2021-22-ലെ 31,571 കോടി ആയിരുന്ന പൊതുമേഖല സ്ഥാപനങ്ങളുടെ ആകെ നഷ്ടം 2024-25-ൽ 78,851 കോടിയായി ഉയർന്നു. കെഎസ്ആർടിസി, കെഎസ്എസ്പിഎൽ, കേരള വാട്ടർ അതോറിറ്റി എന്നിവ ചേർന്നാണ് 2024-25-ലെ മൊത്തം നഷ്ടത്തിൻ്റെ 72 ശതമാനവും ഉണ്ടാക്കിയത്.

സാമ്പത്തിക പ്രതിസന്ധിയുടെ ആഘാതം വികസന ചെലവുകളിലും പ്രകടമാണെന്ന് റിപ്പോർട്ട് വ്യക്തമാക്കുന്നു. പട്ടികജാതി, പട്ടികവർഗം, പിന്നാക്ക വിഭാഗങ്ങൾ, ന്യൂനപക്ഷങ്ങൾ എന്നിവരുടെ ക്ഷേമത്തിനായുള്ള പദ്ധതി ചെലവ് 2017-18-ൽ മൊത്തം പദ്ധതി ചെലവിൻ്റെ 9.24 ശതമാനമായിരുന്നത് 2025-26-ൽ 3.85 ശതമാനമായി കുറഞ്ഞു.

സാമൂഹ്യ സേവനങ്ങൾ, തദ്ദേശ സ്ഥാപനങ്ങൾക്കുള്ള പദ്ധതി സഹായം, കൃഷി, വിദ്യാഭ്യാസം തുടങ്ങിയ മേഖലകളിലും ചെലവ് ചുരുങ്ങിയതായി റിപ്പോർട്ടിൽ പറയുന്നു.

സംസ്ഥാനത്തിൻ്റെ സാമ്പത്തിക പ്രതിസന്ധി മറികടക്കാൻ സ്വകാര്യ നിക്ഷേപം, സഹകരണ നിക്ഷേപം, വ്യവസായ സൗഹൃദ നിയമ പരിഷ്കാരങ്ങൾ, വൈദ്യുതി മേഖലയിലെ സ്വകാര്യ പങ്കാളിത്തം എന്നിവ പ്രോത്സാഹിപ്പിക്കേണ്ടതുണ്ടെന്ന് റിപ്പോർട്ട് നിർദേശിക്കുന്നു. ദീർഘകാല പരിഹാരം ചെലവ് ചുരുക്കലിൽ മാത്രമല്ല, വളർച്ച, നിക്ഷേപം, തൊഴിൽ സൃഷ്ടി എന്നിവയിലാണെന്നും റിപ്പോർട്ട് വിലയിരുത്തുന്നു.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതൽ വാർത്തകൾ അറിയാൻ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജില്‍ ഈ വാര്‍ത്തയുടെ താഴെ കമൻ്റായി രേഖപ്പെടുത്തുക.

Article Summary: The VD Satheesan government released a white paper revealing Kerala's severe financial crisis, citing a total debt burden of Rs 5.07 lakh crore and outstanding dues of Rs 48,733 crore.

#KeralaFinance #VDSatheesan #KeralaEconomy #WhitePaperKerala #KIIFB #KeralaGovernment #RenuNews