10 സീറ്റിൽ കേരള കോൺഗ്രസ് മത്സരിക്കും: വിജയസാധ്യതയുള്ളവരെ ഇറക്കും - പി ജെ ജോസഫ്

വെള്ളരിക്കുണ്ട്: (KasargodVartha) വരുന്ന നിയമസഭാ തിരഞ്ഞെടുപ്പിൽ 10 സീറ്റുകളിൽ കേരള കോൺഗ്രസ് മത്സരിക്കുമെന്ന് പാർട്ടി ചെയർമാൻ പി.ജെ. ജോസഫ് എം.എൽ.എ. വിജയസാധ്യതയുള്ള സ്ഥാനാർത്ഥികളെയായിരിക്കും പാർട്ടി രംഗത്തിറക്കുകയെന്നും അദ്ദേഹം പറഞ്ഞു.

പാർട്ടി കാസർകോട് ജില്ലാ കമ്മിറ്റി വെള്ളരിക്കുണ്ടിൽ സംഘടിപ്പിച്ച നേതൃസംഗമം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ജനകീയ പ്രശ്നങ്ങൾ കൈകാര്യം ചെയ്യുന്നതിൽ ഇടതുപക്ഷ സർക്കാർ പൂർണ്ണമായും പരാജയപ്പെട്ടിരിക്കുകയാണ്.

ജനങ്ങളെല്ലാം ഇടതുപക്ഷ സർക്കാരിനെ വെറുത്തുകൊണ്ടിരിക്കുകയാണ്. നിലവിൽ യു.ഡി.എഫിന് അനുകൂലമായ കാറ്റാണ് കേരളത്തിലുള്ളതെന്നും പി.ജെ. ജോസഫ് കൂട്ടിച്ചേർത്തു. പാർട്ടി മുന്നോട്ടുവച്ച 'മാലിന്യരഹിത കേരളനാട്' എന്ന ആശയത്തിന് വലിയ പിന്തുണയാണ് ലഭിച്ചുകൊണ്ടിരിക്കുന്നതെന്നും അദ്ദേഹം പറഞ്ഞു.

കർഷക വിരുദ്ധ സർക്കാർ 

കർഷകരുടെ കാര്യത്തിൽ തെറ്റായ തീരുമാനങ്ങളാണ് പലപ്പോഴും ഇടതു സർക്കാർ എടുക്കുന്നതെന്ന് ചടങ്ങിൽ സംസാരിച്ച പാർട്ടി വർക്കിംഗ് പ്രസിഡണ്ട് പി.സി. തോമസ് അഭിപ്രായപ്പെട്ടു.

ശബരിമലയും സി.പി.എമ്മും 

ശബരിമല വിഷയത്തിൽ മാർക്സിസ്റ്റ് പാർട്ടിയുടെ നേതാക്കളെ പാർട്ടിയിൽ നിന്നും പുറത്താക്കാത്തത് അവർ പലതും തുറന്നു പറയുമെന്നുള്ള ഭയം മൂലമാണെന്ന് മുൻ എം.എൽ.എ തോമസ് ഉണ്ണിയാടൻ ആരോപിച്ചു.

പങ്കെടുത്തവർ 

യോഗത്തിൽ ജില്ലാ പ്രസിഡണ്ട് ജെറ്റോ ജോസഫ് അധ്യക്ഷത വഹിച്ചു. സംസ്ഥാന കോഡിനേറ്റർ അപു ജോൺ ജോസഫ്, ഡെപ്യൂട്ടി ചെയർമാൻ ജോർജ് മുള്ളൻമട, വൈസ് ചെയർമാൻ എം.പി. ജോസഫ്, സംസ്ഥാന സെക്രട്ടറി ജോർജ് പൈനാപ്പിള്ളി, ജില്ലാ പ്രസിഡണ്ടുമാരായ പി.എം. ജോർജ്ജ്, റോജസ്സ് സെബാസ്റ്റ്യൻ, ജില്ലാ ജനറൽ സെക്രട്ടറി പ്രിൻസ് ജോസഫ്, സംഘാടകസമിതി ചെയർമാൻ നിസാം ഫലാഹ്, കൺവീനർ കെ.എ. സാലു എന്നിവർ സംസാരിച്ചു.

ഈ വാർത്ത സുഹൃത്തുകൾക്കും കുടുംബാംഗങ്ങൾക്കും ഷെയർ ചെയ്യൂ. നിങ്ങളുടെ അഭിപ്രായം കമന്റായി രേഖപ്പെടുത്തൂ.

Article Summary: Kerala Congress Chairman P.J. Joseph announced that the party will contest 10 seats in the upcoming assembly election, fielding only winnable candidates. He criticized the LDF government's performance.

#KeralaCongress #PJJoseph #KeralaElection2026 #UDF #Vellarikundu #Kasargod #Politics