'കാസർകോടിനോട് എന്താണ് ഇത്ര ഭയം?'; മന്ത്രിമാർക്ക് കണക്കിന് കൊടുത്ത് മഞ്ചേശ്വരം എംഎൽഎ എ കെ എം അശ്റഫ്; കർണ്ണാടകയെ മാതൃകയാക്കണമെന്ന് ആവശ്യം

കാസർകോട്: (KasargodVartha) ജില്ലയോടുള്ള മാറിമാറിവരുന്ന സംസ്ഥാന സർക്കാരുകളുടെ അവഗണനക്കെതിരെ രൂക്ഷവിമർശനവുമായി മഞ്ചേശ്വരം എംഎൽഎ എ കെ എം അശ്റഫ്. ഇടതുമുന്നണി ഭരിച്ചാലും വലതുമുന്നണി ഭരിച്ചാലും മന്ത്രിമാരുടെ സമീപനത്തിൽ മാറ്റവുമില്ലെന്നും കാസർകോടിനോട് എന്താണ് ഇത്ര ഭയമെന്നും അദ്ദേഹം ചോദിച്ചു.

ശിൽപി കാനായി കുഞ്ഞിരാമൻ കാസർകോട് ജില്ലാ പഞ്ചായത്ത് അങ്കണത്തിൽ നിർമിച്ച വിക്റ്റിംസ് ശിൽപ ഉദ്ഘാടന ചടങ്ങിൽ സംസാരിക്കവെയാണ് അദ്ദേഹം പ്രതിഷേധം രേഖപ്പെടുത്തിയത്. ശിൽപം ഉദ്ഘാടനം ചെയ്യാമെന്ന് ഏറ്റ സ്പീക്കർ തിരുവഞ്ചൂർ രാധാകൃഷ്ണൻ അസൗകര്യത്തെ തുടർന്ന് ചടങ്ങിന് എത്താതിരുന്നതിൻ്റെ അമർഷംകൂടി പ്രകടിപ്പിച്ചുകൊണ്ടാണ് എംഎൽഎ തൻ്റെ പ്രതിഷേധം വ്യക്തമാക്കിയത്.

'എന്താണ് നിങ്ങളെ ഇത്ര ഭയപ്പെടുത്തുന്നത്?'

കാനായി കുഞ്ഞിരാമനെപ്പോലെയുള്ള ഒരു പ്രതിഭയ്ക്കായി സംഘടിപ്പിച്ച ഇത്രയും പ്രധാനപ്പെട്ട പരിപാടിയിൽ പോലും ഒരു മന്ത്രിയെ ലഭിക്കാത്തത് സങ്കടമാണെന്ന് അദ്ദേഹം പറഞ്ഞു. പരിപാടിയുടെ പ്രാധാന്യം ചൂണ്ടിക്കാട്ടി സ്പീക്കറുടെ സാന്നിധ്യത്തിനായി താൻ പ്രത്യേകം അഭ്യർഥിച്ചിരുന്നതായും അശ്റഫ് വ്യക്തമാക്കി. തിരുവനന്തപുരത്ത് നടക്കുന്ന ചെറിയ പരിപാടികളിൽ പോലും മന്ത്രിമാരുടെ സാന്നിധ്യം ഉറപ്പാക്കുമ്പോൾ കാസർകോട്ടേക്ക് എത്താൻ മന്ത്രിമാർക്ക് വലിയ മടിയാണെന്ന പ്രതീതിയാണ് നിലനിൽക്കുന്നതെന്ന് അദ്ദേഹം കുറ്റപ്പെടുത്തി.

കോഴിക്കോട് വരെയെത്താൻ മന്ത്രിമാർക്ക് എളുപ്പമാണെന്നും, എന്നാൽ കാസർകോട്ടെത്തുമ്പോൾ 'നിങ്ങൾക്ക് ഇതുമതി' എന്ന സമീപനമാണ് ഭരണകൂടത്തിന് ഉണ്ടാകുന്നതെന്നും അദ്ദേഹം പറഞ്ഞു. 'എന്താണ് ഞങ്ങളുടെ കാസർകോടിനോട് ഇത്ര ഭയം? എന്താണ് നിങ്ങളെ ഇത്ര ഭയപ്പെടുത്തുന്നത്?' എന്നായിരുന്നു അശ്റഫിൻ്റെ ചോദ്യം.

പല ഉദ്യോഗസ്ഥരും കാസർകോട്ടേക്കുള്ള തങ്ങളുടെ സ്ഥലംമാറ്റത്തെ ഒരു ശിക്ഷയായാണ് കാണുന്നതെന്നും അദ്ദേഹം പറഞ്ഞു. ജില്ലയിലേക്ക് എത്തുന്ന ഉദ്യോഗസ്ഥർ പലപ്പോഴും സ്വാധീനങ്ങൾ ഉപയോഗിച്ച് പെട്ടെന്ന് മടങ്ങിപ്പോകുന്ന സാഹചര്യമുണ്ടെന്നും ഇത് മാറേണ്ടതുണ്ടെന്നും അദ്ദേഹം ആവശ്യപ്പെട്ടു.

മംഗളൂരു മാതൃകയും മന്ത്രിസഭായോഗവും

കർണാടകയിലെ മംഗ്ളൂരിൽ മുഖ്യമന്ത്രി ഡി കെ ശിവകുമാറിൻ്റെ നേതൃത്വത്തിൽ മന്ത്രിസഭാ യോഗം ചേർന്ന കാര്യവും അശ്റഫ് പ്രസംഗത്തിൽ ചൂണ്ടിക്കാട്ടി. മംഗ്ളൂരിറെ സമഗ്ര വികസനത്തിന് കൂടുതൽ ഊന്നൽ നൽകുന്നതിൻ്റെ ഭാഗമായാണ് അവിടെ പ്രത്യേകം മന്ത്രിസഭാ യോഗം ചേർന്നതെന്നും അദ്ദേഹം പറഞ്ഞു. കാസർകോട് ജില്ലയുടെ വികസനവുമായി ബന്ധപ്പെട്ട് സമാനമായ രീതിയിൽ കാസർകോട്ട് മന്ത്രിസഭായോഗം നടത്തണമെന്ന് നിയമസഭയിൽ മുഖ്യമന്ത്രിയോട് താൻ ആവശ്യപ്പെട്ടിരുന്നുവെന്ന് അദ്ദേഹം വ്യക്തമാക്കി.

കാസർകോട്ടെ ജനങ്ങൾക്ക് എല്ലാ മന്ത്രിമാരെയും ഒരുമിച്ച് കാണാനും ജില്ലയിലെ വിവിധ പ്രശ്നങ്ങൾ നേരിട്ട് അവതരിപ്പിക്കാനും അവസരം നൽകുന്ന തരത്തിൽ ഇവിടെ മന്ത്രിസഭാ യോഗം സംഘടിപ്പിക്കണമെന്നായിരുന്നു അദ്ദേഹത്തിൻ്റെ പ്രധാന ആവശ്യം. ജില്ലയുടെ വികസന മുരടിപ്പ് മാറ്റാൻ ഇത്തരം ഇടപെടലുകൾ അനിവാര്യമാണെന്നും അദ്ദേഹം പറഞ്ഞു.

സമയക്രമം മന്ത്രിമാർക്ക് വേണ്ടി മാത്രം

കാസർകോട്ടെ പൊതുപരിപാടികളുടെ ഉദ്ഘാടനങ്ങളിലെ രീതിയെയും എംഎല്‍എ വിമർശിച്ചു. കലോത്സവങ്ങളുടേത് ഉൾപ്പെടെയുള്ള പല പരിപാടികളുടെയും ഉദ്ഘാടനം സംഘാടകർ തീരുമാനിക്കുന്ന സമയത്തല്ല നടക്കുന്നതെന്നും, മന്ത്രിമാരുടെ സൗകര്യത്തിനനുസരിച്ച് നട്ടുച്ചയിലോ പാതിരാത്രിയിലോ ഇത്തരം പരിപാടികൾ നടത്തേണ്ട അവസ്ഥയാണെന്നും അദ്ദേഹം പറഞ്ഞു.

കാസർകോട്ടെ ഉദ്ഘാടനങ്ങളുടെ സമയക്രമം മന്ത്രിമാരുടെ യാത്രാസൗകര്യത്തിനനുസരിച്ച് മാത്രം തീരുമാനിക്കേണ്ടി വരുന്ന സാഹചര്യം മാറണമെന്ന് അദ്ദേഹം ആവശ്യപ്പെട്ടു. രാഷ്ട്രീയ വ്യത്യാസങ്ങൾ മാറ്റിവെച്ച് ജില്ലയിലെ വികസനത്തിനായി എല്ലാവരും ഒരുമിച്ച് ഇടപെടേണ്ട സമയമാണിതെന്നും അദ്ദേഹം ഓർമിപ്പിച്ചു. കാസർകോട് ജില്ലയോടുള്ള ഭരണകൂടങ്ങളുടെ സമീപനത്തിൽ മാറ്റം വരുത്തുന്നതിനുള്ള ശക്തമായ സന്ദേശമാകണം ഇത്തരം വേദികളിൽ നിന്നുയരേണ്ടതെന്നും അദ്ദേഹം കൂട്ടിച്ചേർത്തു.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Manjeshwaram MLA AKM Ashraf strongly criticized the state government and ministers for consistently neglecting the development of Kasaragod district.

#KasaragodNews #AKMAshraf #KeralaPolitics #LDFGovernment #UDF #MalayalamPoliticalNews #KanayiKunhiraman #KasaragodDevelopment #RenuNews