വൻജനാവലി സാക്ഷി; കാസർകോട്ട് പുതിയ ജനപ്രതിനിധികൾ അധികാരമേറ്റു; അവധി ദിനത്തിലും ഉണർന്ന് തദ്ദേശ സ്ഥാപനങ്ങൾ; സത്യപ്രതിജ്ഞാ ചടങ്ങുകൾ പൂർത്തിയായി

കാസർകോട്: (KasargodVartha) ജില്ലയിലെ തദ്ദേശ സ്വയംഭരണ സ്ഥാപനങ്ങളിലേക്ക് തിരഞ്ഞെടുക്കപ്പെട്ട ജനപ്രതിനിധികളുടെ സത്യപ്രതിജ്ഞാ ചടങ്ങുകൾ വൻജനാവലിയെ സാക്ഷിയാക്കി വിപുലമായി നടന്നു. 2025 ഡിസംബർ 21 ഞായറാഴ്ച രാവിലെ 10 മണിയോടെയാണ് ജില്ലയിലെ ഗ്രാമ, ബ്ലോക്ക്, ജില്ലാ പഞ്ചായത്തുകളിലും മൂന്ന് നഗരസഭകളിലും സത്യപ്രതിജ്ഞാ ചടങ്ങുകൾ ഒരേസമയം അരങ്ങേറിയത്. നിലവിലെ ഭരണസമിതികളുടെ കാലാവധി ശനിയാഴ്ച അവസാനിച്ച സാഹചര്യത്തിലാണ് അവധി ദിനമായിട്ടും ഞായറാഴ്ച തന്നെ ചടങ്ങുകൾ നടത്താൻ അധികൃതർ തീരുമാനിച്ചത്.

കാസർകോട് ജില്ലാ പഞ്ചായത്തിൽ കളക്ടറേറ്റ് കോൺഫറൻസ് ഹാളിൽ നടന്ന ചടങ്ങിൽ വരണാധികാരിയായ ജില്ലാ കളക്ടർ കെ ഇമ്പശേഖർ തിരഞ്ഞെടുക്കപ്പെട്ട അംഗങ്ങൾക്ക് സത്യവാചകം ചൊല്ലിക്കൊടുത്തു. തിരഞ്ഞെടുക്കപ്പെട്ടവരിൽ ഏറ്റവും മുതിർന്ന അംഗമായ രാമപ്പ മഞ്ചേശ്വരയ്ക്കാണ് കളക്ടർ ആദ്യം സത്യവാചകം ചൊല്ലിക്കൊടുത്തത്. ബദിയടുക്ക ഡിവിഷനെ പ്രതിനിധീകരിക്കുന്ന 74 വയസ്സുകാരനായ രാമപ്പ മഞ്ചേശ്വര സത്യപ്രതിജ്ഞ ചെയ്ത ശേഷം മറ്റ് 16 ഡിവിഷനുകളിലെയും ജനപ്രതിനിധികൾക്ക് സത്യവാചകം ചൊല്ലിക്കൊടുത്തു.

ജില്ലാ പഞ്ചായത്തിലേക്ക് തിരഞ്ഞെടുക്കപ്പെട്ട അലി ഹർഷാദ് വോർക്കാടി (വോർക്കാടി ഡിവിഷൻ), ജെ എസ് സോമശേഖര (പുത്തിഗൈ), ഒ വത്സല (ദേലമ്പാടി), സാബു എബ്രഹാം (കുറ്റിക്കോൽ), റീന തോമസ് (കള്ളാർ), ബിൻസി ജെയ്ൻ (ചിറ്റാരിക്കൽ), കെ കൃഷ്ണൻ ഒക്ലാവ് (കയ്യൂർ), എം മനു (പീലിക്കോട്), ഡോ. സെറീന സലാം (ചെറുവത്തൂർ), കെ സബീഷ് (മടിക്കൈ), കെ കെ സോയ (പെരിയ), റ്റി വി രാധിക (ബേക്കൽ), സുകുമാരി ശ്രീധരൻ (ഉദുമ), ജസ്‌ന മനാഫ് (ചെങ്കള), പി ബി ഷെഫീക്ക് (സിവിൽ സ്റ്റേഷൻ), അസീസ് കളത്തൂർ (കുമ്പള), ഇർഫാന ഇഖ്ബാൽ (മഞ്ചേശ്വരം) എന്നിവരും സത്യപ്രതിജ്ഞ ചെയ്ത് ഔദ്യോഗികമായി അധികാരമേറ്റു.

ജില്ലയിലെ 38 ഗ്രാമ പഞ്ചായത്തുകളിലും ആറ് ബ്ലോക്ക് പഞ്ചായത്തുകളിലും അതത് വരണാധികാരികളാണ് സത്യപ്രതിജ്ഞാ ചടങ്ങുകൾക്ക് നേതൃത്വം നൽകിയത്. മിക്കയിടങ്ങളിലും ആദ്യം മുതിർന്ന അംഗത്തിന് വരണാധികാരി സത്യവാചകം ചൊല്ലിക്കൊടുക്കുകയും തുടർന്ന് മുതിർന്ന അംഗം മറ്റ് അംഗങ്ങൾക്ക് പ്രതിജ്ഞ ചൊല്ലിക്കൊടുക്കുകയും ചെയ്യുന്ന രീതിയാണ് പിന്തുടർന്നത്. ജില്ലാ പഞ്ചായത്തിൽ നടന്ന ചടങ്ങിൽ രാജ്മോഹൻ ഉണ്ണിത്താൻ എംപി, എംഎൽഎമാരായ എൻ എ നെല്ലിക്കുന്ന്, അഡ്വ. സി എച്ച് കുഞ്ഞമ്പു, എം രാജഗോപാലൻ എന്നിവർ സംബന്ധിച്ചു.

എ ഡി എം പി അഖിൽ, എൽ എസ് ജി ഡി ജോയിന്റ് ഡയറക്ടർ ആർ ഷൈനി, ജില്ലാ പഞ്ചായത്ത് സെക്രട്ടറി എസ് ബിജു, മുൻ ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണൻ, മുൻ വൈസ് പ്രസിഡന്റ് ഷാനവാസ് പാദൂർ തുടങ്ങിയവരും വിവിധ രാഷ്ട്രീയ പാർട്ടി പ്രതിനിധികളും സ്ഥാനാർത്ഥികളുടെ കുടുംബാംഗങ്ങളും ചടങ്ങിൽ പങ്കെടുത്തു. ജില്ലയിലെ മുഴുവൻ തദ്ദേശ കേന്ദ്രങ്ങളിലും ചടങ്ങുകൾ സമാധാനപരമായാണ് പൂർത്തിയായതെന്ന് അധികൃതർ വ്യക്തമാക്കി.

വാർത്ത ഷെയർ ചെയ്ത് പുതിയ അംഗങ്ങൾക്ക് ആശംസകൾ നേരൂ. 

Article Summary: Local body representatives took oath of office in Kasaragod on Dec 21.

#Kasaragod #LocalBodyElection #OathTaking #KeralaPolitics #Panchayat #KVARTHA