പുനഃസംഘടന: കാസർകോട് ഡിസിസി പ്രസിഡന്റ് പട്ടികയിൽ കെപിസിസി സെക്രട്ടറി കെ നീലകണ്ഠനും

കാസർകോട്: (KasargodVartha) ഗുജറാത്തിൽ നടന്ന എഐസിസി സമ്മേളനത്തിലെ തീരുമാനങ്ങളുടെ ചുവടുപിടിച്ച്, കെപിസിസി നേതൃത്വ മാറ്റത്തിന് പിന്നാലെ സംസ്ഥാനത്തെ ഡിസിസികളിലും അഴിച്ചുപണിക്ക് കോൺഗ്രസ് സംസ്ഥാന നേതൃത്വം ഒരുങ്ങുന്നു. ആസന്നമായ തദ്ദേശ സ്വയംഭരണ, നിയമസഭാ തെരഞ്ഞെടുപ്പുകളെ നേരിടാൻ ജില്ലകളിൽ കരുത്തുറ്റ യുവ നേതൃത്വം അനിവാര്യമാണെന്ന തിരിച്ചറിവാണ് 14 ഡിസിസികളിലും വലിയ മാറ്റങ്ങൾക്ക് കെപിസിസിയെ പ്രേരിപ്പിക്കുന്നത്. ഇതിനായി കോൺഗ്രസ് ഹൈക്കമാൻഡിന്റെ സഹായവും തേടിയിട്ടുണ്ട്.
 

പാർട്ടിയെ പുനരുജ്ജീവിപ്പിക്കാൻ താഴെത്തട്ടിൽ സംഘടന ശക്തമാവണമെന്ന് കോൺഗ്രസ് ദേശീയ നേതൃത്വത്തിന് വ്യക്തമായ ധാരണയുണ്ട്. ഇതിന്റെ ഭാഗമായാണ് ഡിസിസികളെ ശക്തിപ്പെടുത്താനുള്ള പദ്ധതികൾ തയ്യാറാക്കിയിരിക്കുന്നത്. ദേശീയ തലത്തിൽ നിരന്തരമായി പാർട്ടിക്കുണ്ടാകുന്ന പരാജയങ്ങളും, വിവിധ സംസ്ഥാനങ്ങളിലെ തദ്ദേശ തെരഞ്ഞെടുപ്പുകളിൽ പോലും പാർട്ടി നേരിട്ട തോൽവികളും വിശദമായി പഠിച്ച ശേഷമാണ് കോൺഗ്രസ് താഴെത്തട്ടിലുള്ള പ്രവർത്തനം ശക്തിപ്പെടുത്താൻ നടപടി സ്വീകരിക്കുന്നത്.
 

കേരള സംസ്ഥാനത്തെ മൂന്ന് മേഖലകളായി തിരിച്ച് എഐസിസി സെക്രട്ടറിമാർ മണ്ഡലങ്ങളിലെത്തി നേരത്തെ സാഹചര്യം വിലയിരുത്തിയിരുന്നു. സംഘടനാപരമായ ദൗർബല്യങ്ങൾ പലയിടത്തും തുടരുന്നുവെന്നാണ് ഇവർ ഹൈക്കമാൻഡിന് നൽകിയ റിപ്പോർട്ടിൽ ഉണ്ടായിരുന്നത്. സംസ്ഥാനത്ത് ശക്തമായ ഭരണവിരുദ്ധ വികാരമുണ്ട്, ഇത് കോൺഗ്രസിന് അനുകൂലവുമാണ്. എന്നാൽ ഇത് വോട്ടാക്കി മാറ്റാൻ കൂട്ടായ നീക്കം വേണം. ഇതിന് ഡിസിസികളിൽ അഴിച്ചുപണി അനിവാര്യമാണെന്നും റിപ്പോർട്ടിൽ വ്യക്തമാക്കിയിരുന്നു. ഇതെല്ലാം പരിഗണിച്ച ശേഷമാണ് എഐസിസി സമ്മേളനത്തിൽ എല്ലാ സംസ്ഥാനങ്ങളിലും സംഘടനാ സംവിധാനം ഉടച്ചുവാർക്കാൻ തീരുമാനമുണ്ടായത്.
 

ഡിസിസി അധ്യക്ഷന്മാരെ നിയമിച്ചാൽ ഒരു വർഷത്തിനുള്ളിൽ ബൂത്ത്, മണ്ഡലം, ബ്ലോക്ക് ഭാരവാഹികളെ യോഗ്യതയുടെ അടിസ്ഥാനത്തിൽ നിശ്ചയിക്കണമെന്നാണ് നിർദ്ദേശിച്ചിട്ടുള്ളത്. 2025 അവസാനത്തോടെ തന്നെ പുനഃസംഘടന പൂർത്തിയാക്കണമെന്നും നിർദ്ദേശത്തിലുണ്ട്. ഓരോ വീട്ടിലും കോൺഗ്രസ് പ്രവർത്തനങ്ങളും, പദ്ധതികളും, ആശയങ്ങളും എത്തിക്കാനുള്ള സംവിധാനം ഇതിലൂടെ കെട്ടിപ്പടുക്കാനാണ് പാർട്ടി ലക്ഷ്യമിടുന്നത്. ജനകീയ മുഖങ്ങളെയും, യുവാക്കളെയും, സ്ത്രീകളെയും ആകർഷിക്കാനുള്ള പദ്ധതികളും രൂപീകരിക്കണമെന്നും നിർദ്ദേശത്തിൽ പറയുന്നു.
 

ജില്ലയിൽ നിലവിലുണ്ടായിരുന്ന ഡിസിസി കമ്മിറ്റി വാർഡ് കമ്മിറ്റികൾ പുനഃസംഘടിപ്പിച്ചതായി പറയുന്നുണ്ടെങ്കിലും കൂടുതലും നോമിനേറ്റ് ചെയ്തവരാണെന്ന പരാതിയുണ്ട്. അടുത്ത തദ്ദേശ തെരഞ്ഞെടുപ്പിൽ സ്ഥാനാർത്ഥികളെ നിർണയിക്കുക അതാത് വാർഡ് കമ്മിറ്റികളായിരിക്കുമെന്ന എഐസിസി നിർദേശം വന്നതോടുകൂടിയാണ് നേതാക്കൾ തങ്ങളുടെ ഇഷ്ടക്കാരുടെ പേരുകൾ എഴുതി ഡിസിസിക്ക് കൈമാറിയതെന്ന ആക്ഷേപമാണ് ഉയർന്നുവരുന്നത്. തുച്ഛമായ വാർഡ് കമ്മിറ്റികൾ മാത്രമാണ് ജില്ലയിൽ ജനാധിപത്യ രീതിയിൽ തെരഞ്ഞെടുക്കപ്പെട്ടിട്ടുള്ളത്. ബാക്കിയുള്ളവരൊക്കെ നോമിനേറ്റഡ് അംഗങ്ങളാണെന്നാണ് ആക്ഷേപം.
 

ജില്ലയിൽ ഡിസിസി അധ്യക്ഷന്റെ കാര്യത്തിൽ ഏറെക്കുറെ തീരുമാനമായിട്ടുണ്ട്. കെ.എസ്.യു. തൊട്ട് യൂത്ത് കോൺഗ്രസ്, ഡിസിസി, കെപിസിസി എന്നിവിടങ്ങളിലൊക്കെ പ്രവർത്തിച്ച് പരിചയമുള്ള നിലവിലെ കെപിസിസി സെക്രട്ടറി കെ. നീലകണ്ഠന്റെ പേരാണ് അവസാന പട്ടികയിൽ ഇടം പിടിച്ചിരിക്കുന്നത്. നേരത്തെ അഡ്വ. ബി.എം. ജമാലിന്റെ പേരും പ്രൊഫ. ഖാദർ മാങ്ങാടിന്റെ പേരും പട്ടികയിൽ ഇടം പിടിച്ചിരുന്നു. അന്തിമ തീരുമാനം ഈ മാസം അവസാനത്തോടെ ഉണ്ടാകുമെന്നാണ് പാർട്ടി കേന്ദ്രങ്ങൾ നൽകുന്ന സൂചന.
 

തദ്ദേശ, നിയമസഭാ തെരഞ്ഞെടുപ്പുകൾ അടുത്തെത്തി നിൽക്കുന്ന സാഹചര്യത്തിൽ ഡിസിസി പുനഃസംഘടന വളരെ ജാഗ്രതയോടെ വേണമെന്ന അഭിപ്രായവും പാർട്ടിക്കുള്ളിലുണ്ട്. എന്നാൽ നിലവിലെ കെപിസിസി നേതൃത്വം എടുക്കുന്ന തീരുമാനങ്ങൾ എല്ലാ കോൺഗ്രസ് പ്രവർത്തകരും അംഗീകരിക്കുമെന്ന വിശ്വാസം പാർട്ടി പ്രവർത്തകർക്കിടയിൽ ഉണ്ട്.

കോൺഗ്രസ് പുനഃസംഘടനയെക്കുറിച്ചുള്ള നിങ്ങളുടെ അഭിപ്രായം പങ്കുവെക്കുക.

 

Article Summary: Congress to reshuffle DCCs; K Neelakandan in Kasaragod president shortlist.

 

 #Congress #DCCReshuffle #KeralaPolitics #Kasaragod #KNeelakandan #ElectionPrep