ഹമീദ് കാവിലിനെതിരായ പാർട്ടി നടപടി പിൻവലിച്ചു; സോഷ്യൽ മീഡിയയിലെ പോസ്റ്റുകളിൽ ജാഗ്രത വേണമെന്ന് നിർദേശം നൽകി

കാസർകോട്: (KasargodVartha) നവമാധ്യമങ്ങളിലൂടെ പാർലമെന്റ് അംഗത്തിനെതിരെ അപകീർത്തികരമായ പരാമർശം നടത്തിയെന്ന പേരിൽ നടപടി നേരിട്ട കാസർകോട് ബ്ലോക്ക് കോൺഗ്രസ് ജനറൽ സെക്രട്ടറി ഹമീദ് കാവിലിനെ പാർട്ടിയിൽ തിരിച്ചെടുത്തു. സസ്പെൻഷൻ നടപടി പിൻവലിച്ചതായും സോഷ്യൽ മീഡിയയിൽ പോസ്റ്റിടുമ്പോൾ ജാഗ്രത പാലിക്കണമെന്ന നിർദേശത്തോടയും മുന്നറിയിപ്പോടെയുമാണ് അദ്ദേഹത്തെ തിരിച്ചെടുത്തതെന്നും ഡിസിസി പ്രസിഡന്റ് അറിയിച്ചു. 

വിവാദം ഇങ്ങനെ

ദേശീയപാതയിലെ അനധികൃത ടോൾ പിരിവിനെ അനുകൂലിക്കുന്ന നിലപാടാണ് രാജ്മോഹൻ ഉണ്ണിത്താൻ എംപി സ്വീകരിക്കുന്നതെന്ന് ആരോപിച്ച് നവമാധ്യമങ്ങളിൽ ഹമീദ് കാവിൽ പോസ്റ്റിട്ടിരുന്നു. എംപിക്കെതിരെ അപകീർത്തികരമായ പരാമർശങ്ങൾ നടത്തിയെന്ന് ചൂണ്ടിക്കാട്ടിയാണ് ബ്ലോക്ക് കോൺഗ്രസ് ജനറൽ സെക്രട്ടറിയെ പാർട്ടിയിൽ നിന്നും സസ്പെൻഡ് ചെയ്തത്. 

എന്നാൽ, ഇത്തരത്തിലുള്ള പ്രവർത്തനങ്ങൾ ആവർത്തിക്കരുതെന്നും മുന്നറിയിപ്പ് നൽകിക്കൊണ്ടാണ് ഡിസിസി പ്രസിഡന്റ് പി.കെ. ഫൈസൽ ഹമീദ് കാവിലിന് ബ്ലോക്ക് കോൺഗ്രസ് പ്രസിഡന്റ് മുഖേന കത്ത്  നൽകിയിരിക്കുന്നത്.

മൊഗ്രാൽപുത്തൂരിൽ ഐക്യത്തിന്റെ കാഹളം 

ഹമീദ് കാവിലിനെതിരായ നടപടി പിൻവലിച്ചതോടെ മൊഗ്രാൽപുത്തൂർ മണ്ഡലം കോൺഗ്രസിൽ ഇപ്പോൾ ഐക്യത്തിന്റെ കാഹളമാണ് ഉയരുന്നത്. നിയമസഭാ തിരഞ്ഞെടുപ്പിൽ യുഡിഎഫിന് വേണ്ടി ഒറ്റക്കെട്ടായി പ്രവർത്തിക്കാനാണ് എല്ലാ വിഭാഗവും സന്നദ്ധമായിരിക്കുന്നത്.  മുൻപ് നടന്ന ത്രിതല പഞ്ചായത്ത് തിരഞ്ഞെടുപ്പ് സമയത്ത് യുഡിഎഫ് സ്ഥാനാർഥിയെയും കോൺഗ്രസ് മണ്ഡലം ഭാരവാഹികളെയും മർദ്ദിച്ചവർക്കെതിരെ നടപടി കേവലം താക്കീതിൽ ഒതുക്കിയതിലും അസംതൃപ്തി ഉണ്ടായിരുന്നു. ഇതെല്ലാമാണ് ഇപ്പോൾ പരിഹരിച്ചിരിക്കുന്നത്. 

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുക്കൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിൽ ഷെയർ ചെയ്യുമല്ലോ. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിൽ കമന്റായി രേഖപ്പെടുത്താൻ മറക്കരുത്.

Article Summary: Kasaragod DCC revoked the suspension of Block Congress GS Hameed Kavil with a warning, despite ongoing internal friction in the Mogral Puthur unit.

#KasaragodNews #CongressKerala #HameedKavil #RajmohanUnnithan #DCCKasaragod #PKFaisal #KeralaPolitics2026 #BreakingNews