പെരിയ കേസിൽ കെ മണികണ്ഠൻ രാജിവെച്ച ഒഴിവിൽ കാഞ്ഞങ്ങാട് ബ്ലോക്ക് പഞ്ചായത്ത് പ്രസിഡന്റായി സി പി എം നേതാവ് എം കെ വിജയനെ തിരഞ്ഞെടുത്തു

കാഞ്ഞങ്ങാട്: (KasargodVartha) പെരിയ കേസിൽ ശിക്ഷിക്കപ്പെട്ടതിനെത്തുടർന്ന് കാഞ്ഞങ്ങാട് ബ്ലോക്ക് പഞ്ചായത്ത് പ്രസിഡണ്ടായിരുന്ന കെ. മണികണ്ഠൻ രാജിവെച്ച ഒഴിവിൽ, സി.പി.എം. നേതാവ് എം.കെ. വിജയൻ പ്രസിഡണ്ടായി തിരഞ്ഞെടുക്കപ്പെട്ടു.

ഉദുമ മാങ്ങാട് സ്വദേശിയായ വിജയൻ, ബ്ലോക്ക് പഞ്ചായത്ത് ഉദുമ ഡിവിഷനിൽ നിന്നുള്ള അംഗമാണ്. നിലവിൽ ബ്ലോക്ക് പഞ്ചായത്ത് സ്ഥിരം സമിതി ചെയർമാനായിരുന്നു അദ്ദേഹം. സി.പി.എം. ഉദുമ ഏരിയാ കമ്മിറ്റി അംഗം കൂടിയാണ് എം.കെ. വിജയൻ. മാങ്ങാട്ടെ നാരായണിയുടെയും പരേതനായ കണ്ണന്റെയും മകനാണ് അദ്ദേഹം. ഉദുമ കർഷക ക്ഷേമ സഹകരണ സംഘം ജീവനക്കാരി എൻ.കെ. രജിഷയാണ് ഭാര്യ. ആർദ്ര, ആരാധ്യ എന്നിവർ മക്കളാണ്.

പ്രസിഡന്റ് തിരഞ്ഞെടുപ്പിൽ യു.ഡി.എഫ്. സ്ഥാനാർത്ഥിയായി കോൺഗ്രസിലെ അഡ്വ. എം.കെ. ബാബുരാജാണ് മത്സരിച്ചത്. 13 അംഗ ബ്ലോക്ക് കമ്മിറ്റിയിൽ കെ. മണികണ്ഠന്റെ രാജിക്ക് ശേഷം നിലവിൽ 12 അംഗങ്ങളാണുള്ളത്. ഇതിൽ എൽ.ഡി.എഫിന് 8 അംഗങ്ങളും യു.ഡി.എഫിന് 4 അംഗങ്ങളുമാണുള്ളത്. തിരഞ്ഞെടുപ്പിൽ എം.കെ. വിജയന് എട്ടും ബാബുരാജിന് നാലും വോട്ടുകൾ ലഭിച്ചു.

തിങ്കളാഴ്ച രാവിലെ 11 മണിക്കാണ് തിരഞ്ഞെടുപ്പ് നടന്നത്. കാഞ്ഞങ്ങാട് ആർ.ടി.ഒ. ബിജു ജോസഫ് ആയിരുന്നു ഭരണാധികാരി.

പെരിയ ഇരട്ടക്കൊലക്കേസിൽ കോടതി ശിക്ഷിച്ചതിനെത്തുടർന്ന് യു.ഡി.എഫ്. അംഗം അഡ്വ. എം.കെ. ബാബുരാജ് തിരഞ്ഞെടുപ്പ് കമ്മീഷനെ സമീപിച്ചിരുന്നു. മണികണ്ഠന്റെ അംഗത്വം റദ്ദാക്കണമെന്ന് ആവശ്യപ്പെട്ടാണ് അദ്ദേഹം ഹർജി നൽകിയത്. വാദങ്ങൾ പൂർത്തിയായി തീരുമാനം വരാനിരിക്കെയാണ് സി.പി.എം. നേതാവായ കെ. മണികണ്ഠൻ പഞ്ചായത്ത് അംഗത്വവും ബ്ലോക്ക് പഞ്ചായത്ത് പ്രസിഡന്റ് സ്ഥാനവും രാജിവെച്ചത്.

കാഞ്ഞങ്ങാട് ബ്ലോക്ക് പഞ്ചായത്തിലെ പുതിയ പ്രസിഡന്റിന്റെ തിരഞ്ഞെടുപ്പിനെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: M.K. Vijayan elected Kanhangad Block Panchayat President after K. Manikandan's resignation.

#Kanhangad #BlockPanchayat #MKVijayan #CPMKerala #KeralaPolitics #LocalElection