നിയമവിരുദ്ധ ടോൾ പിരിവ്: ബിജെപിയുടെ മൗനം സംശയാസ്പദമെന്ന് അബ്ദുൽ റഹ്‌മാൻ

കാസർകോട്: (KasargodVartha) ദേശീയപാത 66-ൽ തലപ്പാടിക്കും കാസർകോടിനുമിടയിൽ മാനദണ്ഡങ്ങൾ ലംഘിച്ച് കുമ്പളയിൽ ടോൾ പ്ലാസ സ്ഥാപിക്കാനുള്ള തീരുമാനം ജില്ലയിലെ ബി.ജെ.പി നേതാക്കളുടെ അറിവോടെയും പിന്തുണയോടെയുമാണെന്ന് മുസ്ലിം ലീഗ് ജില്ലാ ജനറൽ സെക്രട്ടറി എ. അബ്ദുൽ റഹ്‌മാൻ ആരോപിച്ചു.

കേന്ദ്ര ഉപരിതല ഗതാഗത മന്ത്രാലയത്തിൻ്റെ മാനദണ്ഡങ്ങൾ പ്രകാരം 60 കിലോമീറ്റർ കഴിഞ്ഞാലേ ടോൾ പിരിക്കാൻ പാടുള്ളൂ. എന്നാൽ, കാസർകോട് കുമ്പളയിൽ ടോൾ കേന്ദ്രം ആരംഭിക്കാനുള്ള അധികൃതരുടെ നീക്കത്തിനെതിരെ വ്യാപകമായ പ്രതിഷേധം ഉയരുന്നുണ്ട്.

ഇതിനെതിരെ രൂപീകരിച്ച സർവ്വകക്ഷി ആക്ഷൻ കമ്മിറ്റിയിൽ ബി.ജെ.പി നേതാക്കൾ സഹകരിക്കുന്നില്ല. ജില്ലയിലെ എം.പി, എം.എൽ.എമാർ, ജനപ്രതിനിധികൾ, മറ്റ് രാഷ്ട്രീയ പാർട്ടി പ്രതിനിധികൾ എന്നിവർ ജനവിരുദ്ധ ടോൾ ബൂത്തിനെതിരെ രംഗത്ത് വന്നിട്ടും ബി.ജെ.പി മൗനം പാലിക്കുന്നത് സംശയങ്ങൾക്ക് ഇടയാക്കുന്നു. ദേശീയപാത അധികൃതർ തീരുമാനം ഉപേക്ഷിക്കാത്തതിന് ബി.ജെ.പി നേതാക്കളുടെ സമ്മർദ്ദമാണ് കാരണമെന്ന് അബ്ദുൽ റഹ്‌മാൻ ആരോപിച്ചു.

വിവിധ കാര്യങ്ങളിൽ വാഗ്ദാനങ്ങൾ നൽകുന്ന ബി.ജെ.പി ജില്ലാ നേതൃത്വം ഈ വിഷയത്തിൽ മൗനം പാലിക്കുന്നത് സംശയങ്ങൾ വർദ്ധിപ്പിക്കുന്നു. കാസർകോട് ജില്ലയിൽ നിന്ന് ദിവസവും ആയിരക്കണക്കിന് ആളുകൾ ചികിത്സ, വിദ്യാഭ്യാസം, കച്ചവടം എന്നിവയ്ക്കായി ആശ്രയിക്കുന്ന മംഗലാപുരത്തേക്ക് പോകാൻ രണ്ടിടങ്ങളിൽ ടോൾ നൽകേണ്ടി വരുന്ന ദുരവസ്ഥയിലാണ് ജില്ലയിലെ ജനങ്ങൾ.

ഇത് അംഗീകരിക്കാനോ അനുവദിക്കാനോ കഴിയില്ല. ഈ വിഷയത്തിൽ ബി.ജെ.പി നിലപാട് വ്യക്തമാക്കണമെന്നും ജനങ്ങളെ കൊള്ളയടിക്കാനുള്ള തീരുമാനം പുനഃപരിശോധിക്കാൻ തയ്യാറാകണമെന്നും അബ്ദുൽ റഹ്‌മാൻ ആവശ്യപ്പെട്ടു. ഇതിനെതിരെ ഏതറ്റം വരെ പോകാനും മുസ്ലിം ലീഗ് മുൻപന്തിയിലുണ്ടാകുമെന്നും അദ്ദേഹം പറഞ്ഞു.

ഈ വാർത്തയെക്കുറിച്ച് നിങ്ങളുടെ അഭിപ്രായം രേഖപ്പെടുത്തുക. സുഹൃത്തുക്കളുമായി പങ്കുവെക്കുക.

Summary: Abdul Rahman alleges that the decision to establish a toll plaza in Kumbala is supported by BJP leaders. He criticizes the BJP's silence on the issue, stating that it raises suspicions.

#IllegalToll, #BJP, #Kasargod, #MuslimLeague, #NationalHighway66, #Protest.