മസാല ബോണ്ട് കേസിൽ ഇഡിക്ക് കനത്ത തിരിച്ചടി; മുഖ്യമന്ത്രിക്ക് അയച്ച നോട്ടിസ് ഹൈകോടതി സ്റ്റേ ചെയ്തു

കൊച്ചി: (KasargodVartha) കിഫ്ബി മസാല ബോണ്ട് ഇടപാടിൽ മുഖ്യമന്ത്രി പിണറായി വിജയന് എൻഫോഴ്‌‌സ്‌മെന്റ് ഡയറക്ടറേറ്റ് അയച്ച കാരണം കാണിക്കൽ നോട്ടിസ് ഹൈകോടതി സ്റ്റേ ചെയ്തു. മുഖ്യമന്ത്രിയെ കൂടാതെ മുൻ മന്ത്രി തോമസ് ഐസക്കിനും കിഫ്ബി സിഇഒ കെ എം അബ്രഹാമിനും അയച്ച നോട്ടിസുകളും കോടതി സ്റ്റേ ചെയ്തിട്ടുണ്ട്. കിഫ്ബിക്കെതിരായ തുടർ നടപടികൾ സ്റ്റേ ചെയ്ത സിംഗിൾ ബെഞ്ച് ഉത്തരവിനെതിരെ എൻഫോഴ്‌‌സ്‌മെന്റ് ഡയറക്ടറേറ്റ് ഹൈക്കോടതി ഡിവിഷൻ ബെഞ്ചിനെ സമീപിച്ചിരിക്കുകയാണ്.

ഇഡി നടപടി നിയമവിരുദ്ധവും രാഷ്ട്രീയ പ്രേരിതവുമാണെന്ന് മുഖ്യമന്ത്രി കോടതിയിൽ നൽകിയ ഹർജിയിൽ വ്യക്തമാക്കിയിരുന്നു. സംസ്ഥാനത്തിന്റെ അടിസ്ഥാന സൗകര്യ വികസനത്തിന് വേണ്ടി ഭൂമി ഏറ്റെടുക്കുന്നത് റിയൽ എസ്റ്റേറ്റ് ഇടപാടായോ നിരോധിത ഭൂമി വാങ്ങലായോ കണക്കാക്കാൻ സാധിക്കില്ലെന്നും ഹർജിയിൽ ചൂണ്ടിക്കാട്ടി. വികസന പ്രവർത്തനങ്ങൾക്ക് ഭൂമി അത്യാവശ്യമാണെന്നും ആർബിഐ മാർഗനിർദേശങ്ങൾ കിഫ്ബി ലംഘിച്ചിട്ടില്ലെന്നും മുഖ്യമന്ത്രി ഹൈകോടതിയിൽ വിശദീകരിച്ചു.

അതേസമയം, മസാല ബോണ്ട് വഴി ശേഖരിച്ച പണം അടിസ്ഥാന വികസന പദ്ധതികൾക്ക് വിനിയോഗിച്ചത് ചട്ടലംഘനമാണെന്ന് ചൂണ്ടിക്കാട്ടിയാണ് ഇഡി കാരണം കാണിക്കൽ നോട്ടിസ് അയച്ചത്. മുഖ്യമന്ത്രിക്കും തോമസ് ഐസക്കിനും കെ എം എബ്രഹാമിനും പുറമെ കിഫ്ബിക്കും ഇഡി നോട്ടിസ് നൽകിയിരുന്നു. മൂന്ന് വർഷത്തിലേറെ നീണ്ട അന്വേഷണത്തിന് ഒടുവിൽ നവംബർ അവസാന വാരമാണ് കേന്ദ്ര ഏജൻസി ഈ നടപടികളിലേക്ക് കടന്നത്.

അതിനിടെ, തിരഞ്ഞെടുപ്പ് അടുത്തിരിക്കെ രാഷ്ട്രീയ ലക്ഷ്യങ്ങളോടെയാണ് ഇഡി നീക്കം നടത്തുന്നതെന്ന് സിപിഎം ആരോപിച്ചു. രാഷ്ട്രീയ പ്രേരിതമായ ഈ നടപടി നിയമപരമായി നേരിടുമെന്ന് സർക്കാർ നേരത്തെ വ്യക്തമാക്കിയിരുന്നു. വിദേശത്ത് നിന്ന് പണം സമാഹരിക്കുന്ന മസാല ബോണ്ട് ഇടപാടിൽ ഫെമ (വിദേശ വിനിമയ മാനേജ്‌മെന്റ് ആക്ട്) ചട്ടങ്ങൾ ലംഘിക്കപ്പെട്ടുവെന്നാണ് ഇഡിയുടെ പ്രധാന ആരോപണം. എന്നാൽ ഹൈകോടതിയുടെ പുതിയ ഉത്തരവ് സർക്കാരിന് വലിയ ആശ്വാസമാണ് നൽകിയിരിക്കുന്നത്.

മസാല ബോണ്ട് കേസിൽ സർക്കാരിന് വലിയ ആശ്വാസമായ വാർത്ത ഷെയർ ചെയ്യൂ. നിങ്ങളുടെ അഭിപ്രായം താഴെ കമന്റ് ചെയ്യൂ

Article Summary: High Court stays ED notice to CM Pinarayi Vijayan in Masala Bond case.

#PinarayiVijayan #KIIFB #MasalaBond #HighCourt #EDNotice #KeralaPolitics