വരവിൽ കവിഞ്ഞ സ്വത്ത് സമ്പാദന പരാതി: ഈസ്റ്റ് എളേരി മുൻ പഞ്ചായത്ത് പ്രസിഡന്റിനെ പ്രോസിക്യൂട്ട് ചെയ്യാൻ സർക്കാർ അനുമതി; നിയമപരമായി നേരിടുമെന്ന് ജെയിംസ് പന്തമാക്കൽ

-കുഞ്ഞികണ്ണൻ മുട്ടത്ത്

നീലേശ്വരം: (KasargodVartha) വരവിൽ കവിഞ്ഞ സ്വത്ത് സമ്പാദിച്ചെന്ന വിജിലൻസ് അന്വേഷണത്തിലെ കണ്ടെത്തലുകളുടെ അടിസ്ഥാനത്തിൽ ഈസ്റ്റ് എളേരി ഗ്രാമപഞ്ചായത്തിൻ്റെ മുൻ അംഗവും പ്രസിഡൻ്റും വൈസ് പ്രസിഡൻ്റുമായിരുന്ന ജെയിംസ് പന്തമാക്കലിനെതിരെ (പി എം ജെയിംസ്) പ്രോസിക്യൂഷൻ നടപടികൾ സ്വീകരിക്കാൻ സംസ്ഥാന സർക്കാർ അനുമതി നൽകി. അഴിമതി നിരോധന നിയമപ്രകാരമാണ് പ്രോസിക്യൂഷന് അനുമതി നൽകിയിട്ടുള്ളത്.

ഇത് സംബന്ധിച്ച് തദ്ദേശ സ്വയംഭരണ വകുപ്പ് 2026 സെപ്റ്റംബർ 9-ന് ജി ഒ (ആർ ടി) നമ്പർ 1700/2026/എൽഎസ്ജിഡി ഉത്തരവ് പുറപ്പെടുവിച്ചു. കോഴിക്കോട് വിജിലൻസ് ആൻഡ് ആൻ്റി കറപ്ഷൻ ബ്യൂറോ സ്പെഷ്യൽ സെല്ലിലെ വിസി 02/2018/എസ്സികെ കേസിലെ അന്വേഷണ രേഖകളുടെ അടിസ്ഥാനത്തിലാണ് സർക്കാരിൻ്റെ ഉത്തരവ്.

വരവിനേക്കാൾ 80 ശതമാനം അധിക സമ്പാദ്യം

വിജിലൻസ് അന്വേഷണ രേഖകൾ പ്രകാരം, ഈസ്റ്റ് എളേരി ഗ്രാമപഞ്ചായത്തിൽ വാർഡ് അംഗം, പഞ്ചായത്ത് പ്രസിഡൻ്റ്, വൈസ് പ്രസിഡൻ്റ് എന്നീ ചുമതലകൾ വഹിച്ചിരുന്ന ജെയിംസ് പന്തമാക്കൽ വരുമാനവുമായി പൊരുത്തപ്പെടാത്ത രീതിയിൽ സ്വത്ത് സമ്പാദിച്ചതായാണ് കണ്ടെത്തൽ. 2007 ജനുവരി 1 മുതൽ 2018 ജൂലൈ 5 വരെയുള്ള കാലയളവിലാണ് വിജിലൻസ് കണക്കെടുപ്പ് നടത്തിയത്.

ഈ കാലയളവിൽ ജെയിംസ് പന്തമാക്കൽ 78,97,232 രൂപയുടെ സ്വത്തുക്കൾ സമ്പാദിച്ചതായും 1,34,07,736 രൂപ വിവിധ ആവശ്യങ്ങൾക്കായി ചെലവഴിച്ചതായും അന്വേഷണത്തിൽ കണ്ടെത്തിയതായി സർക്കാർ ഉത്തരവിൽ പറയുന്നു. ഇതോടെ ആകെ സ്വത്ത്-ചെലവ് 2,13,04,968 രൂപയായി കണക്കാക്കി.

അതേസമയം, അന്വേഷണത്തിൽ കണക്കാക്കിയ ജെയിംസിൻ്റെ നിയമാനുസൃതമായ വരുമാനം 1,18,06,300 രൂപ മാത്രമാണെന്നാണ് ഉത്തരവിൽ വ്യക്തമാക്കുന്നത്. ഇതനുസരിച്ച് 94,98,668 രൂപയുടെ സ്വത്തും സാമ്പത്തിക വിഭവങ്ങളും വരുമാനത്തിൽ അധികമായി കണ്ടെത്തിയതായി വിജിലൻസ് രേഖകൾ വ്യക്തമാക്കുന്നു. നിയമാനുസൃതമായ വരുമാനത്തേക്കാൾ 80.45 ശതമാനം അധികമാണ് ഈ തുകയെന്നും സർക്കാർ ഉത്തരവിലുണ്ട്.

സ്വന്തം പേരിലും കുടുംബാംഗങ്ങളുടെ പേരിലുമുള്ള സ്വത്തുക്കളും സാമ്പത്തിക വിഭവങ്ങളും ഉൾപ്പെടെയാണ് വിജിലൻസ് കണക്കെടുപ്പ് നടത്തിയിരിക്കുന്നത്. വരവിൽ കവിഞ്ഞ സ്വത്തുക്കൾ സംബന്ധിച്ച് തൃപ്തികരമായ യാതൊരു വിശദീകരണവും നൽകാൻ കഴിഞ്ഞില്ലെന്നും, വിവരങ്ങൾ യഥാസമയം വെളിപ്പെടുത്തിയില്ലെന്നും അന്വേഷണ രേഖകളിൽ വ്യക്തമാക്കിയിട്ടുണ്ട്.

സർക്കാർ നടപടിയും ഉത്തരവുകളും

ഇത് വലിയൊരു ക്രിമിനൽ ദുർനടപ്പായി കണക്കാക്കുന്നതായും ഉത്തരവിൽ പറയുന്നു. ജെയിംസ് പന്തമാക്കലിൻ്റെ നടപടികൾ അഴിമതി നിരോധന നിയമം, 1988-ലെ 13(2), 13(1)(ഇ) വകുപ്പുകൾ പ്രകാരം ശിക്ഷാർഹമായ കുറ്റമാണെന്നും സർക്കാർ ഉത്തരവിൽ ചൂണ്ടിക്കാട്ടുന്നു. രേഖകളും ആരോപണങ്ങളും പരിശോധിച്ച ശേഷമാണ് നടപടിക്ക് അനുമതി നൽകുന്നതെന്ന് സർക്കാർ വ്യക്തമാക്കിയിട്ടുണ്ട്.

തുടർന്ന് അഴിമതി നിരോധന നിയമത്തിലെ 19(1)(ബി) വകുപ്പ് പ്രകാരം ജെയിംസ് പി എമ്മിനെതിരെ പ്രോസിക്യൂഷൻ നടപടികൾ സ്വീകരിക്കുന്നതിന് ആവശ്യമായ അനുമതി സർക്കാർ നൽകി. കേസുമായി ബന്ധപ്പെട്ട മറ്റ് നിയമവകുപ്പുകൾ പ്രകാരമുള്ള കുറ്റങ്ങൾക്കും നടപടികൾ സ്വീകരിക്കാനും യോഗ്യമായ കോടതിയിൽ കേസ് പരിഗണനയ്ക്ക് കൊണ്ടുവരാനും ഉത്തരവിൽ അനുമതി നൽകിയിട്ടുണ്ട്.

ഗവർണറുടെ ഉത്തരവനുസരിച്ച് തദ്ദേശ സ്വയംഭരണ വകുപ്പ് സ്പെഷ്യൽ സെക്രട്ടറി ഷാനവാസ് എസ് ഐഎഎസ് ആണ് ഈ ഉത്തരവ് പുറപ്പെടുവിച്ചത്. ഉത്തരവിൻ്റെ പകർപ്പ് വിജിലൻസ് ആൻഡ് ആൻ്റി കറപ്ഷൻ ബ്യൂറോ ഡയറക്ടർ, കോഴിക്കോട് സ്പെഷ്യൽ സെൽ പോലീസ് സൂപ്രണ്ട്, തദ്ദേശ സ്വയംഭരണ വകുപ്പ് പ്രിൻസിപ്പൽ ഡയറക്ടർ, കോഴിക്കോട് വിജിലൻസ് പബ്ലിക് പ്രോസിക്യൂട്ടർ, ഈസ്റ്റ് എളേരി ഗ്രാമപഞ്ചായത്ത് സെക്രട്ടറി എന്നിവർക്ക് തുടർനടപടികൾക്കായി കൈമാറിയിട്ടുണ്ട്.

രാഷ്ട്രീയ വേട്ടയാടലെന്ന് ജെയിംസ് പന്തമാക്കൽ

അതേസമയം തനിക്കെതിരെയുള്ളത് ഗൂഢാലോചനയാണെന്നും, രാഷ്ട്രീയ എതിരാളികളാണ് തന്നെ വേട്ടയാടുന്നതെന്നും ജെയിംസ് പന്തമാക്കൽ പ്രതികരിച്ചു. അനധികൃതമായി താൻ ഒരു രൂപ പോലും സമ്പാദിച്ചിട്ടില്ലെന്നും വിജിലൻസ് അന്വേഷണത്തെ നിയമപരമായി തന്നെ നേരിടുമെന്നും ജെയിംസ് പന്തമാക്കൽ 'കാസർകോട് വാർത്ത'യോട് പറഞ്ഞു.

തനിക്ക് ഏജൻസി വഴി 21-ഓളം വാഹനങ്ങൾ വാടകയ്ക്ക് നൽകുന്ന ബിസിനസ് ഉണ്ടായിരുന്നുവെന്നും ഇതിൽ കമ്മീഷൻ ആയി കിട്ടിയ പണം തന്നെ ഒരു ദിവസം ഒരു ലക്ഷം രൂപ വരെ കിട്ടിയിരുന്നുവെന്നും അദ്ദേഹം അവകാശപ്പെട്ടു. ഇതെല്ലാമാണ് അനധികൃത സമ്പാദ്യമെന്ന് വിജിലൻസ് തെറ്റായി വ്യാഖ്യാനിച്ചത്. ഈ പരാതിക്ക് പിന്നിൽ ഒരു വനിതാ മുൻ ജനപ്രതിനിധിയുടെ റിട്ടയേർഡ് സർക്കാർ ഉദ്യോഗസ്ഥനായ ഭർത്താവും ചില ഉദ്യോഗസ്ഥ ലോബികളുമാണെന്നും ജെയിംസ് പന്തമാക്കൽ ആരോപിച്ചു.

കൂടുതല്‍ വിവരങ്ങള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റില്‍ കമൻ്റായി രേഖപ്പെടുത്തുക.

Article Summary: Govt permits prosecution of ex-panchayat president James over excess assets.

#KasargodVartha #EastEleri #VigilanceCase #KeralaPolitics #KasaragodNews #MalayalamNews #RenuNews