Governor | പടിയിറങ്ങുന്നത് പ്രതിപക്ഷത്തിന്റെ റോൾ ഏറ്റെടുത്ത ഗവർണർ; ആരിഫ് മുഹമ്മദ് ഖാന്റെ 5 വർഷം സംഭവബഹുലം; പകരമെത്തുന്നത് കറകളഞ്ഞ ആർഎസ്എസുകാരൻ

തിരുവനന്തപുരം: (KasargodVartha) കേരള ഗവർണർ ആരിഫ് മുഹമ്മദ് ഖാൻ തന്റെ അഞ്ചുവർഷത്തെ കാലാവധി പൂർത്തിയാക്കി രാജ്ഭവനിൽ നിന്ന് പടിയിറങ്ങുന്നത് സംഭവബഹുലമായ അധ്യായങ്ങൾക്ക് ശേഷമാണ്. ഈ കാലഘട്ടം, സംസ്ഥാനത്തെ ഇടത് മുന്നണി സർകാരും ഗവർണറും തമ്മിൽ പല വിഷയങ്ങളിലും ശക്തമായ തർക്കങ്ങൾ നിറഞ്ഞതായിരുന്നു. പുനഃസംഘടനയുടെ ഭാഗമായി, ബിഹാർ ഗവർണർ രാജേന്ദ്ര വിശ്വനാഥ് ആർലേക്കറാണ് കേരളത്തിന്റെ പുതിയ ഗവർണറായി എത്തുന്നത്.  

ആരിഫ് മുഹമ്മദ് ഖാൻ 2018 സെപ്റ്റംബർ അഞ്ചിന് കേരള ഗവർണറായി സ്ഥാനമേറ്റത് മുതൽ, അദ്ദേഹത്തിന്റെ ഭരണരീതി ശ്രദ്ധേയമായിരുന്നു. ഔദ്യോഗിക കാലയളവിൽ, അദ്ദേഹം പലപ്പോഴും വെല്ലുവിളികൾ നിറഞ്ഞ നിലപാടുകൾ സ്വീകരിച്ചു. ഇത് കേരളത്തിന്റെ രാഷ്ട്രീയ ചരിത്രത്തിൽ അപൂർവമായ കാഴ്ചയായിരുന്നു. അദ്ദേഹത്തിന്റെ വാക്കുകളും പ്രവർത്തികളും പലപ്പോഴും വിവാദങ്ങൾക്ക് തിരികൊളുത്തി. 

ഗവർണറുടെ രാഷ്ട്രീയ നീക്കങ്ങൾ കേരള രാഷ്ട്രീയ ചരിത്രത്തിൽ പുതിയ അധ്യായം കുറിക്കുന്നവയായിരുന്നു. നയപ്രഖ്യാപന പ്രസംഗത്തിൽ പങ്കെടുക്കാതിരുന്നതും, മന്ത്രി കെ എൻ ബാലഗോപാലിനെതിരെ നടപടിയാവശ്യപ്പെട്ട് മുഖ്യമന്ത്രിക്ക് കത്തയച്ചതുമെല്ലാം മുൻപൊരിക്കലും കാണാത്ത രാഷ്ട്രീയ നാടകീയതയ്ക്ക് തുടക്കമിട്ടു. കണ്ണൂർ സർവകലാശാലയിലെ വിവാദങ്ങളുമായി ബന്ധപെട്ടുണ്ടായ വാക് തർക്കങ്ങൾ ശ്രദ്ധേയമായിരുന്നു. 

ഉന്നതവിദ്യാഭ്യാസ രംഗത്തെ രാഷ്ട്രീയ കൈകടത്തലിനെതിരെ ഗവർണർ ശക്തമായ നിലപാടെടുത്തു. തുടർന്ന് പല വിഷയങ്ങളിലും അദ്ദേഹം സർകാരിന്റെ നടപടികളെ ചോദ്യം ചെയ്തു. സർവകലാശാലകളിലെ വൈസ് ചാൻസലർമാരുടെ നിയമനവും സെർച് കമിറ്റികളുടെ രൂപീകരണവും സർകാരും ഗവർണറും തമ്മിലുള്ള ഭിന്നതയുടെ പ്രധാന കാരണങ്ങളായി മാറി. കൂടാതെ നിയമസഭ പാസാക്കിയ ചില നിയമനിർമ്മാണങ്ങളെ തടയുകയും, ചിലത് രാഷ്ട്രപതിയുടെ പരിഗണനയ്ക്കായി അയക്കുകയും ചെയ്‌തു. 

ഈ സാഹചര്യത്തിൽ, സംസ്ഥാന സർകാരിന്  പലപ്പോഴും സുപ്രീം കോടതിയെയും ഹൈകോടതിയെയും സമീപിക്കേണ്ടി വന്നു. 2018 മുതൽ, ഉന്നത വിദ്യാഭ്യാസ മേഖലയിലെ സ്വയംഭരണാവകാശം (autonomy) സംബന്ധിച്ച തർക്കങ്ങൾ ഗവർണറെയും സർകാരിനെയും കൂടുതൽ അകറ്റി. ഈ വിഷയത്തിൽ ഗവർണറും സർകാരും തമ്മിൽ രൂക്ഷമായ വാദപ്രതിവാദങ്ങൾ നടന്നു. ഇതിന്റെ ഫലമായി, ഇടതുപക്ഷ യുവജന സംഘടനകളും വിദ്യാർഥി  സംഘടനകളും ഗവർണർക്കെതിരെ പ്രതിഷേധങ്ങൾ സംഘടിപ്പിച്ചു. ഈ പ്രതിഷേധങ്ങൾ പലപ്പോഴും ശക്തമായ രീതിയിലേക്ക് എത്തിച്ചേർന്നു.

ഗവർണറും സംസ്ഥാന സർകാരും തമ്മിലുള്ള ബന്ധം കലുഷിതമായപ്പോൾ പ്രതിപക്ഷമായ യുഡിഎഫും ആരിഫ് മുഹമ്മദ് ഖാനുമായി പല വിഷയങ്ങളിലും സൗഹാർദപരമായ സമീപനമല്ല സ്വീകരിച്ചത് എന്നതും ശ്രദ്ധേയമാണ്. പല സമയങ്ങളിലും ആരിഫ് മുഹമ്മദ് ഖാൻ വ്യത്യസ്ത വിഷയങ്ങളിൽ പ്രതിപക്ഷത്തിന്റെ റോൾ ഏറ്റെടുത്ത് സർകാരിനെതിരെ പോരിനിറങ്ങുന്നതാണ് കണ്ടത്.

മുഖ്യമന്ത്രി പിണറായി വിജയൻ രാഷ്ട്രപതിയ്ക്ക് ഗവർണറുടെ കാലാവധി അവസാനിപ്പിക്കാനുള്ള അഭ്യർത്ഥനയുമായി കത്തയച്ചിട്ട് കൃത്യം ഒരു വർഷത്തിനുശേഷമാണ് ഇപ്പോഴത്തെ മാറ്റം. കേരളത്തിലെ രാജ്ഭവനിൽ നിന്നും ആരിഫ് മുഹമ്മദ് ഖാന്റെ മടക്കം അഞ്ചു വർഷത്തെ അവിസ്മരണീയ സംഭവങ്ങളുടെ പരിസമാപ്തി കൂടിയാണ്.

പകരമെത്തുന്ന രാജേന്ദ്ര വിശ്വനാഥ് മുതിർന്ന ബിജെപി നേതാവും കറകളഞ്ഞ ആര്‍എസ്എസുകാരനുമാണ്.
ബിഹാറിന് മുൻപ് ഹിമാചൽ പ്രദേശിലും ഗവർണർ സ്ഥാനം വഹിച്ചിട്ടുണ്ട്. ഗോവയിൽ കാബിനറ്റ് മന്ത്രിയായും നിയമസഭാ സ്പീകറായും പ്രവർത്തിച്ച അദ്ദേഹത്തിന് ഭരണപരമായ കാര്യങ്ങളിൽ നല്ല അനുഭവസമ്പത്തുണ്ട്.

1954 ഏപ്രിൽ 23ന് ഗോവയിൽ ജനിച്ച ആർലേക്കർ, കൊമേഴ്‌സിൽ ബിരുദം നേടിയിട്ടുണ്ട്. ചെറുപ്പം മുതലേ ആർഎസ്എസുമായി ബന്ധമുണ്ടായിരുന്ന അദ്ദേഹം 1989ൽ ബിജെപിയിൽ ചേർന്നു. ഗോവയിൽ പാർടിയുടെ വളർച്ചയിൽ വലിയ പങ്കുവഹിച്ച നേതാവാണ് ആർലേക്കർ. അദ്ദേഹവും കേരളത്തിൽ ആരിഫ് മുഹമ്മദ് ഖാന്റെ പാത സ്വീകരിക്കുമോയെന്ന് കണ്ടറിയേണ്ട കാര്യമാണ്.

#KeralaPolitics #ArifMohammedKhan #RajendraArlekar #RajBhavan #Governance