സിപിഎമ്മിന് വൻ വോട്ട് ചോർച്ച; മഞ്ചേശ്വരത്തും തൃക്കരിപ്പൂരിലും തിരിച്ചടി; ഫലം പുറത്തുവന്നതിന് പിന്നാലെ ചർച്ചകൾ ചൂടുപിടിക്കുന്നു

കാസർകോട്: (KasargodVartha) നിയമസഭാ തിരഞ്ഞെടുപ്പിൽ ജില്ലയിൽ സിപിഎമ്മിനുണ്ടായ വലിയ വോട്ട് ചോർച്ച പാർട്ടിയെ അക്ഷരാർഥത്തിൽ ഞെട്ടിച്ചു. ഇത് രാഷ്ട്രീയ രംഗത്ത് ചൂടേറിയ ചർച്ചയായി മാറിയിരിക്കുകയാണ്. പ്രത്യേകിച്ച് ത്രികോണ മത്സരം നടന്ന മഞ്ചേശ്വരത്തും സിപിഎമ്മിൻ്റെ ശക്തികേന്ദ്രമായി കരുതപ്പെടുന്ന തൃക്കരിപ്പൂരിലും വോട്ടുകൾ എവിടേക്ക് മാറിയെന്ന ചോദ്യമാണ് പാർട്ടി നേതൃത്വത്തെ പ്രതിരോധത്തിലാക്കുന്നത്.

മഞ്ചേശ്വരത്ത് കഴിഞ്ഞ രണ്ട് തിരഞ്ഞെടുപ്പുകളിലും 40,000-ത്തിലേറെ വോട്ടുകൾ നേടിയ എൽഡിഎഫിന് ഇത്തവണ ലഭിച്ചത് വെറും 21,212 വോട്ടുകൾ മാത്രമാണ്. സിപിഎം ജില്ലാ സെക്രട്ടറിയേറ്റ് അംഗവും മണ്ഡലത്തിൽ നിന്നുള്ള നേതാവുമായ കെ ആർ ജയാനന്ദ തന്നെ മത്സരിച്ചിട്ടും പാർട്ടിയുടെ അടിസ്ഥാന വോട്ടുകൾ പോലും നിലനിർത്താൻ സാധിക്കാത്തത് നേതൃത്വത്തെ ഞെട്ടിച്ചിരിക്കുകയാണ്.

വോട്ടുകൾ കൂടിയിട്ടും 20,000 വോട്ടുകളുടെ കുറവാണ് മഞ്ചേശ്വരം മണ്ഡലത്തിൽ ഉണ്ടായത്. ഈ വോട്ടുകളിലെ വലിയൊരു പങ്ക് യുഡിഎഫ് സ്ഥാനാർഥി എ കെ എം അഷ്റഫിൻ്റെ ഭൂരിപക്ഷം വർധിപ്പിക്കാൻ കാരണമായതായും വിലയിരുത്തപ്പെടുന്നു.

വോട്ടുകൾ സ്വാഭാവികമായി ചോർന്നതോ, അല്ലെങ്കിൽ മനഃപൂർവം നേതാക്കൾ ഇടപെട്ട് മറിച്ചതോ എന്നതാണ് പ്രധാന ചോദ്യം.

സിപിഎമ്മിന് സ്വാധീനമുള്ള പ്രദേശങ്ങളിൽ പോലും എൽഡിഎഫ് സ്ഥാനാർഥിക്ക് വോട്ട് കുറഞ്ഞത് നേതൃത്വത്തെ കൂടുതൽ ആശങ്കയിലാക്കിയിരിക്കുകയാണ്. മുൻ തിരഞ്ഞെടുപ്പുകളിലെ കണക്കുകൾ ഈ തിരിച്ചടിയുടെ ഗൗരവം വ്യക്തമാക്കുന്നു.

10 വർഷം മുൻപ് 2016-ൽ സി എച്ച് കുഞ്ഞമ്പു 42,565 വോട്ടും, 2021-ൽ വി വി രമേശൻ 40,639 വോട്ടുകൾ നേടുകയും, തദ്ദേശ തിരഞ്ഞെടുപ്പിൽ പോലും 33,928 വോട്ടുകൾ എൽഡിഎഫിന് ലഭിക്കുകയും ചെയ്ത സാഹചര്യത്തിലാണ് ഈ വോട്ട് ചോർച്ച ഉണ്ടായതെന്നത് പാർട്ടിയെ പ്രതിസന്ധിയിലാക്കുന്നു.

ഇതുമായി താരതമ്യം ചെയ്യുമ്പോൾ ഇത്തവണത്തെ കണക്ക് വലിയ ഇടിവാണ് സൂചിപ്പിക്കുന്നത്.

ബിജെപി ഉയർത്തുന്ന പ്രധാന ആരോപണം സിപിഎം വോട്ടുകൾ കൂട്ടത്തോടെ യുഡിഎഫിലേക്ക് മറിച്ചുവെന്നതാണ്. സ്ഥാനാർഥിയുടെ സ്വന്തം വാർഡിൽ പോലും വെറും 19 വോട്ടുകൾ മാത്രമാണ് ലഭിച്ചതെന്ന കണക്ക് പാർട്ടിക്കുള്ളിലും അസ്വസ്ഥത വർധിപ്പിച്ചിട്ടുണ്ട്.

അതേസമയം, ബിജെപിക്കും പ്രതീക്ഷിച്ച മുന്നേറ്റം നേടാനായില്ല. മുൻ സംസ്ഥാന അധ്യക്ഷൻ കെ സുരേന്ദ്രനെ നാലാം തവണയും മത്സരിപ്പിച്ചിട്ടും 2021-ലെ 65,013 വോട്ടുകളിൽ നിന്ന് വെറും 2,683 വോട്ടുകളുടെ വർധനവോടെ 67,696 വോട്ടുകൾ മാത്രമാണ് നേടാനായത്.

മണ്ഡലം പിടിക്കാമെന്ന പ്രതീക്ഷയിൽ ഇറങ്ങിയ ബിജെപിക്ക് ഇത് വലിയ തിരിച്ചടിയായി.

എസ്ഐആർ (Special Intensive Revision) പരിശോധനയും ബിജെപിക്ക് തിരിച്ചടിയായെന്ന് പാർട്ടി വിലയിരുത്തുന്നു.

മണ്ഡലത്തിൽ 15,000-ത്തിലേറെ വോട്ടുകൾ പരിശോധനയിൽ ഒഴിവാക്കിയതായും, പ്രത്യേകിച്ച് കർണാടകയിൽ താമസിക്കുന്നവരും ഇവിടെ വോട്ട് നിലനിർത്തിയവരുമായ വോട്ടർമാരുടെ പേരുകൾ നീക്കിയതും തിരിച്ചടിയായെന്നും ബിജെപി നേതൃത്വം ചൂണ്ടിക്കാട്ടുന്നു.

മണ്ഡലത്തിൽ നോട്ടയ്ക്ക് 455 വോട്ടുകളും ലഭിച്ചു.

തൃക്കരിപ്പൂരിലെ പാർട്ടി കോട്ടകളിലും തിരിച്ചടി

മഞ്ചേശ്വരത്ത് മാത്രമല്ല, സിപിഎമ്മിൻ്റെ ശക്തികേന്ദ്രമായ തൃക്കരിപ്പൂരിലും എൽഡിഎഫിന് തിരിച്ചടി നേരിട്ടു. നീലേശ്വരം നഗരസഭ ഉൾപ്പെടെ എൽഡിഎഫ് വലിയ ലീഡ് പ്രതീക്ഷിച്ച മേഖലകളിൽ പോലും വോട്ട് കുറഞ്ഞു. കയ്യൂർ-ചീമേനി പഞ്ചായത്തിൽ മുന്നേറ്റം ഉണ്ടായെങ്കിലും പ്രതീക്ഷിച്ച തോതിൽ നേട്ടമുണ്ടാക്കാനായില്ല.

ചില വാർഡുകളിൽ വോട്ട് ചോർച്ച ഉണ്ടായെന്ന വിലയിരുത്തലുണ്ട്. ചെറുവത്തൂർ, പിലിക്കോട് പ്രദേശങ്ങളിലും എൽഡിഎഫ് പ്രതീക്ഷിച്ച പ്രകടനം കാഴ്ചവെക്കാനായില്ല. സ്ഥാനാർഥിയുടെ സ്വന്തം പഞ്ചായത്തായ തൃക്കരിപ്പൂരിൽ കഴിഞ്ഞ തവണ ലഭിച്ച 10,000 വോട്ടുകൾ ഇത്തവണ 7,000 ആയി ചുരുങ്ങിയതും ശ്രദ്ധേയമാണ്.

വോട്ട് ചോർച്ച യുഡിഎഫിലേക്ക് മാറിയതാണോ, അല്ലെങ്കിൽ അണികളിൽ വോട്ടെടുപ്പിനോടുള്ള വിമുഖതയാണോ കാരണം എന്നതിനെക്കുറിച്ച് സിപിഎം ഉൾപ്പെടെയുള്ള മുന്നണി നേതൃത്വം വിശദമായ പരിശോധനയ്ക്ക് തയ്യാറെടുക്കുകയാണ്. വരും ദിവസങ്ങളിൽ ഇതുസംബന്ധിച്ചുള്ള ആഭ്യന്തര വിലയിരുത്തലുകളും രാഷ്ട്രീയ ആരോപണങ്ങളും കൂടുതൽ സജീവമാകാനാണ് സാധ്യത.

പുതിയ വാര്‍ത്തകള്‍ക്കായി ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജില്‍ വാർത്തയ്ക്ക് താഴെ കമൻ്റായി രേഖപ്പെടുത്തുക. ഈ രാഷ്ട്രീയ വാർത്ത വാട്സ്ആപ്പ് ഗ്രൂപ്പുകളില്‍ ഷെയർ ചെയ്യൂ.

Article Summary: The CPM faced a massive vote leak in Kasaragod district, particularly in Manjeshwaram and Trikaripur constituencies, leaving the party leadership in a state of shock and triggering political debates.

#CPMKerala #KasaragodNews #ElectionResults2026 #Manjeshwaram #Trikaripur #KeralaPolitics