'മന്ത്രിക്കെതിരായ പ്രതിഷേധങ്ങളിൽ പോലീസ് ഇരട്ടനീതി സ്വീകരിക്കുന്നു'; ബിജെപി നേതാക്കൾക്കെതിരെ നടപടിയില്ലെന്ന് എം രാജഗോപാലൻ

കാസർകോട്: (KasargodVartha) മന്ത്രി ഒ ജെ ജനീഷിനെതിരായ പ്രതിഷേധങ്ങളുടെ പേരിൽ ഡിവൈഎഫ്ഐ പ്രവർത്തകരെ അറസ്റ്റ് ചെയ്ത് റിമാൻഡ് ചെയ്യുകയും ബിജെപി പ്രവർത്തകർക്കെതിരെ നടപടി സ്വീകരിക്കാതിരിക്കുകയും ചെയ്യുന്ന പോലീസ് നടപടി ഇരട്ടനീതിയാണെന്ന് സിപിഎം കാസർകോട് ജില്ലാ സെക്രട്ടറി എം രാജഗോപാലൻ. കാസർകോട്ട് വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം.

തിരുവനന്തപുരത്ത് എസ്എഫ്ഐ പ്രവർത്തകരായ വിദ്യാർഥികളെ ആക്രമിക്കാൻ യൂത്ത് കോൺഗ്രസ് പ്രവർത്തകർക്ക് നേതൃത്വം നൽകിയ മന്ത്രിക്കെതിരെ ഉയർന്ന പ്രതിഷേധങ്ങളുടെ ഭാഗമായാണ് കാസർകോട് ജില്ലയിലും പ്രതിഷേധങ്ങൾ നടന്നതെന്ന് അദ്ദേഹം പറഞ്ഞു. ജനാധിപത്യവിരുദ്ധ നടപടികൾക്കെതിരെ പ്രതിഷേധിക്കാനുള്ള അവകാശം നിഷേധിക്കുന്ന തരത്തിലാണ് പോലീസ് ഇടപെടുന്നത്. മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരായ പ്രതിഷേധങ്ങളിൽ നിന്ന് ശ്രദ്ധതിരിക്കാനാണ് മന്ത്രി ജനീഷിനെതിരെ പ്രതിഷേധം സംഘടിപ്പിച്ചതെന്ന യുഡിഎഫ് ആരോപണവും അദ്ദേഹം നിഷേധിച്ചു.

ഡിവൈഎഫ്ഐക്ക് ജാമ്യമില്ലാ വകുപ്പ്; ബിജെപി നേതാക്കൾക്ക് സംരക്ഷണം

മന്ത്രിക്കെതിരെ പ്രതിഷേധിച്ച ഡിവൈഎഫ്ഐ പ്രവർത്തകർക്കെതിരെ ജാമ്യമില്ലാ വകുപ്പുകൾ ഉൾപ്പെടെ ചുമത്തി കേസെടുക്കുകയും നിരവധി പേരെ റിമാൻഡ് ചെയ്യുകയും ചെയ്തു. എന്നാൽ മന്ത്രിമാരെ വഴിയിൽ തടഞ്ഞ ബിജെപി പ്രവർത്തകർക്കെതിരെ സമാനമായ നടപടികൾ സ്വീകരിച്ചിട്ടില്ല. കാഞ്ഞങ്ങാട് പുതിയകോട്ടയിൽ മന്ത്രിയുടെ വാഹനത്തിന് മുന്നിൽ ബിജെപി ജില്ലാ പ്രസിഡൻ്റും ജനറൽ സെക്രട്ടറിയും ഉൾപ്പെടെയുള്ളവർ പ്രതിഷേധിക്കുകയും പോലീസുമായി മൽപ്പിടിത്തമുണ്ടാക്കുകയും ചെയ്തിട്ടും കാര്യമായ അറസ്റ്റോ കേസോ ഉണ്ടായില്ലെന്ന് രാജഗോപാലൻ ആരോപിച്ചു. മന്ത്രിക്കോ യുഡിഎഫ് നേതാക്കൾക്കോ ബിജെപി പ്രവർത്തകർക്കെതിരെ പരാതിയില്ലെന്നും അദ്ദേഹം ചൂണ്ടിക്കാട്ടി.

കാഞ്ഞങ്ങാട്ട് ഡിവൈഎഫ്ഐ പ്രവർത്തകരെ കൂട്ടത്തോടെ അറസ്റ്റ് ചെയ്ത് ജയിലിലടയ്ക്കുകയും പൊതുമുതൽ നശിപ്പിക്കൽ ഉൾപ്പെടെയുള്ള വകുപ്പുകൾ ചുമത്തി കേസെടുക്കുകയും ചെയ്തു. തൃക്കരിപ്പൂർ നടക്കാവിൽ നടന്ന പ്രതിഷേധത്തിൻ്റെ പേരിൽ എട്ട് ഡിവൈഎഫ്ഐ പ്രവർത്തകരെയും നീലേശ്വരത്ത് ആറ് പേരെയും റിമാൻഡ് ചെയ്തു. ബേഡകത്തും പ്രവർത്തകർക്കെതിരെ കേസെടുത്തിട്ടുണ്ട്. നടക്കാവിൽ പ്രതിഷേധം നടത്തിയ ഡിവൈഎഫ്ഐ പ്രവർത്തകരെ ആക്രമിക്കാൻ ഒരു സംഘം മുസ്‌ലിം ലീഗ് പ്രവർത്തകർ മാരകായുധങ്ങളുമായി എത്തിയെന്നും, സംഘർഷത്തിന് ശ്രമിച്ചവർക്കെതിരെ പോലീസ് നടപടി സ്വീകരിച്ചില്ലെന്നും അദ്ദേഹം ആരോപിച്ചു.

വി ഡി സതീശൻ–ബിജെപി ധാരണ; സബിനെതിരായ പ്രചാരണം തെറ്റ്

സംസ്ഥാനത്ത് പത്തോളം മന്ത്രിമാരെ ബിജെപി പ്രവർത്തകർ വഴിയിൽ തടഞ്ഞ സംഭവങ്ങളുണ്ടായിട്ടും കാര്യമായ കേസുകളോ അറസ്റ്റുകളോ ഉണ്ടായിട്ടില്ല. ഇതിലൂടെ വി ഡി സതീശൻ–ബിജെപി ധാരണ കൂടുതൽ ശക്തമാകുന്നതിൻ്റെ സൂചനകളാണ് പുറത്തുവരുന്നതെന്ന് അദ്ദേഹം ആരോപിച്ചു.

നീലേശ്വരത്ത് പ്രതിഷേധത്തിൽ പങ്കെടുത്തതിൻ്റെ പേരിൽ റിമാൻഡിലായ ഡിവൈഎഫ്ഐ ഭാരവാഹി സബിൻ സത്യനെതിരെ മന്ത്രി ജനീഷ് നടത്തിയ ആരോപണങ്ങളും രാജഗോപാലൻ നിഷേധിച്ചു. സഹകരണ സംഘത്തിൽ ഹാജർ രേഖപ്പെടുത്തിയ ശേഷമാണ് സബിൻ സമരത്തിൽ പങ്കെടുത്തതെന്നും, നേരത്തെ ചായോത്ത് സ്കൂളിൽ നടന്ന സംഭവത്തിൻ്റെ പേരിൽ പ്രതിയായി ജയിലിൽ കഴിഞ്ഞിരുന്നുവെന്നുമുള്ള മന്ത്രി ജനീഷിൻ്റെ സാമൂഹിക മാധ്യമ പ്രചാരണം വസ്തുതാവിരുദ്ധമാണ്. സബിനെ നേരിട്ട് അറിയുക പോലുമില്ലാത്ത മന്ത്രി ഇത്തരം ആരോപണങ്ങൾ ഉന്നയിക്കുന്നത് പദവിക്ക് ചേർന്ന നടപടിയല്ല.

ഡോക്ടർക്കെതിരായ നടപടി രാഷ്ട്രീയ പകപോക്കൽ

മന്ത്രിക്കെതിരായ പ്രതിഷേധത്തിൽ പങ്കെടുത്തതിൻ്റെ പേരിൽ കാഞ്ഞങ്ങാട്ടെ ഡോക്ടർ സിദ്ധാർഥ് രവീന്ദ്രനെതിരെ പോലീസ് വീടുകളിൽ പരിശോധന നടത്തുന്നതായും ആശുപത്രിയിലെ താൽക്കാലിക ജോലിയിൽനിന്ന് പുറത്താക്കിയതായും രാജഗോപാലൻ ആരോപിച്ചു. ഒരു യുവ ഡോക്ടർക്കെതിരെ ഇത്ര വേഗത്തിൽ നടപടി സ്വീകരിച്ച സർക്കാർ, ജില്ലയിലെ സർക്കാർ ആശുപത്രികളിൽ ആവശ്യത്തിന് ഡോക്ടർമാരെ നിയമിക്കാനോ മരുന്നുകൾ എത്തിക്കാനോ മാസങ്ങളായിട്ടും നടപടി സ്വീകരിക്കുന്നില്ലെന്ന് അദ്ദേഹം കുറ്റപ്പെടുത്തി.

ന്യായമായ ആവശ്യങ്ങൾ ഉന്നയിച്ചുള്ള പ്രതിഷേധങ്ങളെയും സമരങ്ങളെയും അടിച്ചമർത്താനുള്ള യുഡിഎഫ് സർക്കാരിൻ്റെ ശ്രമങ്ങൾ ചെറുക്കുമെന്നും എം രാജഗോപാലൻ വ്യക്തമാക്കി.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: CPM Kasaragod District Secretary M Rajagopalan alleges police double standards against DYFI workers and protecting BJP leaders.

#CPMKerala #KasaragodNews #DYFI #BJP #UDF #KeralaPolitics #MalayalamNews #RenuNews