വനിതാ സംവരണവും മണ്ഡല പുനർനിർണ്ണയവും; പ്രതിപക്ഷ നിലപാടുകൾക്കെതിരെ കാസർകോട് വ്യാപക പ്രചാരണത്തിന് ഇറങ്ങാൻ ബിജെപിയും മഹിളാ മോർച്ചയും

കാസർകോട്: (KasargodVartha) 2026 ഏപ്രിൽ 16, 17 തീയതികളിൽ പാർലമെന്റിൽ അവതരിപ്പിച്ച വനിതാ സംവരണവും മണ്ഡല പുനർനിർണ്ണയവുമായി ബന്ധപ്പെട്ട പ്രധാന ബില്ലുകൾക്ക് എതിരെ നിലപാടെടുത്ത പ്രതിപക്ഷ പാർട്ടികൾക്കെതിരെ കാസർകോട് വ്യാപക പ്രചാരണം നടത്താൻ ബിജെപി. കോൺഗ്രസ്, സമാജ്‌വാദി പാർട്ടി, ടിഎംസി, ഡിഎംകെ, ഇടതു പാർട്ടികൾ എന്നിവർക്കെതിരെ ബിജെപി കാസർകോട് ജില്ലാ നേതൃത്വവും മഹിളാ മോർച്ചയും വ്യാപകമായ പ്രചാരണം നടത്തുമെന്ന് നേതാക്കൾ ബിജെപി ജില്ലാ കമ്മിറ്റി ഓഫീസില്‍ നടന്ന വാർത്താ സമ്മേളനത്തിൽ അറിയിച്ചു.

പ്രതിപക്ഷത്തിന്റേത് സ്ത്രീവിരുദ്ധ മനോഭാവം

സ്ത്രീകളോടുള്ള വഞ്ചനയും സ്ത്രീവിരുദ്ധ മനോഭാവവുമാണ് പ്രതിപക്ഷത്തിന്റെ നിലപാട് വെളിപ്പെടുത്തുന്നതെന്ന് ബിജെപി നേതാക്കൾ ആരോപിച്ചു. സ്വതന്ത്ര ഭാരതത്തിന്റെ ചരിത്രത്തിൽ നിർണായകമായ ഈ ദിവസങ്ങളിൽ പാർലമെന്റിനകത്തും പുറത്തും പ്രതിപക്ഷ നേതാക്കളിൽ നിന്ന് രാജ്യവിരുദ്ധവും സ്ത്രീവിരുദ്ധവുമായ പരാമർശങ്ങൾ ഉണ്ടായതായി നേതാക്കൾ കുറ്റപ്പെടുത്തി.

കോൺഗ്രസ് നേതാക്കളായ രാഹുൽ ഗാന്ധിയും പ്രിയങ്ക ഗാന്ധിയും വനിതാ സംവരണ ബില്ലിനെ വിമർശിച്ചതും, മറ്റ് വനിതാ നേതാക്കളായ കനിമൊഴിയും മമതാ ബാനർജിയും സ്വീകരിച്ച നിലപാടുകളും ഇതിന് ഉദാഹരണമാണെന്ന് നേതാക്കൾ പറഞ്ഞു. മതത്തിന്റെ അടിസ്ഥാനത്തിലുള്ള സംവരണാവശ്യങ്ങൾ ഭരണഘടനാ വിരുദ്ധമാണ്. ഷാ ബാനു കേസ്, മുത്തലാഖ് എന്നീ വിഷയങ്ങളിൽ പ്രതിപക്ഷം എടുത്ത നിലപാടുകളും ഇരട്ടത്താപ്പാണെന്ന് അവർ വിമർശിച്ചു.

മണ്ഡല പുനർനിർണ്ണയവും സംവരണവും

ഏപ്രിൽ 16-ന് കേന്ദ്ര സർക്കാർ ലോക്സഭയിൽ ഭരണഘടനാ (131-ാം ഭേദഗതി) ബിൽ 2026, മണ്ഡല പുനർനിർണ്ണയ ബിൽ 2026, കേന്ദ്രഭരണ പ്രദേശ നിയമ ഭേദഗതി ബിൽ എന്നിവ അവതരിപ്പിച്ചിരുന്നു. നിലവിലെ നാരി ശക്തി വന്ദൻ നിയമപ്രകാരം 2026 സെൻസസിനും തുടർന്ന് മണ്ഡല പുനർനിർണ്ണയത്തിനും ശേഷമേ വനിതാ സംവരണം നടപ്പാക്കാനാകൂ എന്നായിരുന്നു കേന്ദ്ര സർക്കാരിന്റെയും ബിജെപിയുടെയും നിലപാടെന്ന് നേതാകൾ വിശദീകരിച്ചു.

എന്നാൽ, ഈ പ്രക്രിയ വളരെ വേഗത്തിലാക്കി 2029-ലെ പൊതുതിരഞ്ഞെടുപ്പിൽ തന്നെ 33 ശതമാനം വനിതാ സംവരണം ഉറപ്പാക്കുകയാണ് പുതിയ ബില്ലുകളുടെ ലക്ഷ്യം. സ്ത്രീകൾക്ക് രാഷ്ട്രീയത്തിൽ പങ്കാളിത്തം നൽകുന്നത് അവകാശമാണെന്നാണ് പ്രധാനമന്ത്രി നരേന്ദ്ര മോദിയുടെ നിലപാടെന്നും അവർ കൂട്ടിച്ചേർത്തു.

കേരളത്തിന് 30 ലോക് സഭാ സീറ്റുകൾ ലഭിക്കും

ജനസംഖ്യാ വർദ്ധനവിന്റെ പശ്ചാത്തലത്തിൽ, ലോക്സഭാ സീറ്റുകളുടെ എണ്ണം 550-ൽ നിന്ന് 850 ആയി ഉയർത്താനും നിർദ്ദേശമുണ്ടായിരുന്നു. ജനസംഖ്യാ ആനുപാതിക വിപുലീകരണ രീതി പ്രകാരം എല്ലാ സംസ്ഥാനങ്ങളിലും ഏകദേശം 50 ശതമാനം സീറ്റുകൾ വർദ്ധിപ്പിക്കാനായിരുന്നു തീരുമാനം. ദക്ഷിണേന്ത്യൻ സംസ്ഥാനങ്ങളുടെ പ്രാതിനിധ്യം കുറയുമെന്ന് പ്രതിപക്ഷം ഉയർത്തുന്ന ആശങ്ക അടിസ്ഥാനരഹിതമാണെന്നും നേതാക്കൾ വ്യക്തമാക്കി. പുതിയ രീതി പ്രകാരം, നിലവിലെ 23.76 ശതമാനത്തിൽ നിന്ന് 33 ശതമാനമായി പ്രാതിനിധ്യം ഉയരുമെന്നും, കേരളത്തിൽ ലോക്സഭാ സീറ്റുകൾ 20-ൽ നിന്ന് 30 ആയി വർദ്ധിക്കുമെന്നുമാണ് ബിജെപി നേതൃത്വം വിലയിരുത്തുന്നത്.

മറ്റ് പാർട്ടികൾക്ക് വനിതാ നേതാക്കളില്ല

സ്ത്രീസമത്വം അവകാശപ്പെടുന്ന കേരളത്തിൽ ഇതുവരെ ഒരു വനിതാ മുഖ്യമന്ത്രി പോലുമില്ലെന്നത് കോൺഗ്രസ്-സിപിഎം നിലപാടുകളുടെ വ്യക്തമായ തെളിവാണെന്നും നേതാക്കൾ വിമർശിച്ചു. കാസർകോട് നിന്ന് ഒരു വനിതയെ പോലും എംപിയോ എംഎൽഎ സ്ഥാനത്തേക്കോ മത്സരിപ്പിക്കാൻ ഇതുവരെ മറ്റ് പാർട്ടികൾക്കായിട്ടില്ല. പാർട്ടികളുടെ ജില്ലാ പ്രസിഡണ്ട്, സെക്രട്ടറി സ്ഥാനങ്ങളിലേക്ക് പോലും മറ്റ് കക്ഷികൾക്ക് വനിതകളെ ആക്കാൻ കഴിഞ്ഞിട്ടില്ലെന്നും ബിജെപി ജില്ലാ പ്രസിഡണ്ട് എം എൽ അശ്വിനി പറഞ്ഞു.

പ്രതിപക്ഷത്തിന്റെ ഇരട്ടത്താപ്പും നിലപാടുകളും ജനങ്ങൾക്ക് മുന്നിൽ തുറന്നുകാട്ടാൻ വിവിധ പരിപാടികൾ സംഘടിപ്പിക്കുമെന്നും നേതാക്കൾ അറിയിച്ചു. വാർത്താ സമ്മേളനത്തിൽ ബിജെപി സംസ്ഥാന കമ്മിറ്റി അംഗം സവിത ടീച്ചർ, ജില്ലാ പ്രസിഡണ്ട് എം എൽ അശ്വിനി, ജില്ലാ വൈസ് പ്രസിഡണ്ട് എം ജനനി, കുമ്പടാജെ പഞ്ചായത്ത് പ്രസിഡണ്ട് യശോദ എൻ, മഹിളാമോർച്ച ജില്ലാ നേതാക്കളായ പ്രേമലത എസ്, അനിത നായിക്, പുഷ്പ ഗോപാലൻ, വീണ അരുൺ കുമാർ ഷെട്ടി, മഹിളാമോർച്ച ജില്ലാ പ്രസിഡണ്ട് കെ എസ് രമണി എന്നിവർ പങ്കെടുത്തു.

വനിതാ സംവരണ ബില്ലിനെക്കുറിച്ചുള്ള ബിജെപിയുടെ ഈ നിലപാടുകൾ നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. ദേശീയ-പ്രാദേശിക രാഷ്ട്രീയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വിഷയത്തിലുള്ള നിങ്ങളുടെ അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താനും മറക്കരുത്. പുതിയ അപ്‌ഡേറ്റുകൾ ലഭിക്കാൻ ഫേസ്ബുക്ക് പേജ് ഫോളോ ചെയ്യുക.

Article Summary: The BJP Kasaragod district leadership and Mahila Morcha have announced a massive campaign against opposition parties, including Congress, SP, TMC, DMK, and the Left, for opposing the Women's Reservation and Delimitation Bills presented in Parliament on April 16 and 17, 2026

#BJPKasaragod #WomensReservationBill #DelimitationBill #KeralaPolitics #KasaragodNews #MahilaMorcha #MalayalamNews