Allegation | കാസർകോട് വിദ്യാനഗറിൽ നിർമിച്ച നീന്തൽക്കുളത്തിൽ അപാകതയെന്ന് ബിജെപി; അന്വേഷണം ആവശ്യപ്പെട്ട് അഡ്വ. കെ ശ്രീകാന്ത്

കാസർകോട്: (KasargodVartha) വിദ്യാനഗർ സ്റ്റേഡിയത്തിന് സമീപം നിർമ്മിച്ച സെമി ഒളിമ്പിക്സ് നീന്തൽക്കുളത്തിന്റെ നിർമ്മാണത്തിലെ അപാകതകളെക്കുറിച്ച് ഉയർന്നുവന്ന ആരോപണങ്ങളിൽ അന്വേഷണം നടത്തണമെന്നും കുറ്റക്കാർക്കെതിരെ ശക്തമായ നടപടി സ്വീകരിക്കണമെന്നും ബിജെപി സംസ്ഥാന സെക്രട്ടറി അഡ്വ. കെ. ശ്രീകാന്ത് ആവശ്യപ്പെട്ടു. 

കേന്ദ്രസർക്കാർ സ്ഥാപനമായ എച്ച്എഎല്ലിന്റെ ഒന്നേമുക്കാൽ കോടി രൂപയുടെ സാമ്പത്തിക സഹായത്തോടെ നിർമ്മിച്ച നീന്തൽക്കുളം, നിർമ്മാണത്തിലെ അപാകതകൾ മൂലം ഉപയോഗശൂന്യമായി കിടക്കുകയാണ്. ഈ വിഷയത്തെ ഗൗരവമായി കാണണമെന്നും അദ്ദേഹം ആവശ്യപ്പെട്ടു.

വിദ്യാർത്ഥികളിൽ നിന്ന് ഫീസ് വാങ്ങുന്നതിന് രസീത് നൽകാതെ വലിയ അഴിമതിയാണ് നടത്തുന്നത് എന്ന ആരോപണവും ഉയർന്നിട്ടുണ്ട്. ഈ ആരോപണത്തെക്കുറിച്ച് പ്രത്യേക അന്വേഷണം നടത്തണമെന്നും  ആരിൽ നിന്ന് എത്ര രൂപയാണ് പിരിച്ചെടുത്തതെന്ന് അധികൃതർ വ്യക്തമാക്കണമെന്നും അദ്ദേഹം ആവശ്യപ്പെട്ടു.

എച്ച്എഎൽ സൗജന്യമായി നിർമ്മിച്ചു നൽകിയ കുളത്തിൽ വിദ്യാർത്ഥികൾക്ക് പരിശീലനം നൽകുന്നതിന് വലിയ തുക ഫീസ് ഈടാക്കുന്നത് നീതികരിക്കാനാവില്ല. വിദ്യാർത്ഥികൾക്ക് സൗജന്യമായി നീന്തൽ പരിശീലനം നൽകണമെന്നും ശ്രീകാന്ത് വ്യക്തമാക്കി.

#Kasargod #SwimmingPool #Corruption #BJP #HLL #Investigation