ധർമ്മസ്ഥലക്കെതിരെ വ്യാജ ആരോപണം: ഗൂഢാലോചനയിൽ മനാഫിന് പങ്ക്, അറസ്റ്റ് ചെയ്യണം - ബിജെപി

കാസർകോട്: (KasargodVartha) ധർമ്മസ്ഥല ക്ഷേത്രത്തിനെതിരെ വ്യാജ ആരോപണങ്ങൾ ഉന്നയിച്ച് അപകീർത്തിപ്പെടുത്താൻ ശ്രമിച്ച സംഭവത്തിൽ യൂട്യൂബർ മനാഫിനെ അറസ്റ്റ് ചെയ്യണമെന്ന് ബിജെപി മേഖല പ്രസിഡന്റ് അഡ്വ. കെ. ശ്രീകാന്ത് ആവശ്യപ്പെട്ടു. ഈ ഗൂഢാലോചനയെക്കുറിച്ച് കേരളത്തിൽ അന്വേഷണം നടത്തണമെന്നും ബിജെപി ജില്ലാ കമ്മിറ്റി ഓഫീസിൽ വിളിച്ചുചേർത്ത വാർത്താ സമ്മേളനത്തിൽ ആവശ്യപ്പെട്ടു. 

വ്യാജ പരാതി ഉണ്ടാക്കാൻ 'അനന്യ ഭട്ട്' എന്ന പേരിലുള്ള പെൺകുട്ടി തന്റെ മകളാണെന്നും ബലാത്സംഗത്തിനിരയായ എംബിബിഎസ് വിദ്യാർത്ഥിനിയാണെന്നും സുജാത ഭട്ടിനെക്കൊണ്ട് പറയിപ്പിച്ചതിനു പിന്നിലെ ഗൂഢാലോചന അന്വേഷണ വിധേയമാക്കണം. വ്യാജ പരാതി ചമച്ചതിന് പിന്നിലുള്ള എല്ലാവരെയും നിയമത്തിനു മുന്നിൽ കൊണ്ടുവന്ന് മാതൃകാപരമായി ശിക്ഷിക്കണം.

അടിസ്ഥാനരഹിതമായ ഗുരുതര ആരോപണങ്ങൾ ഉന്നയിച്ച് കൃത്രിമ തെളിവുകൾ സൃഷ്ടിച്ച് അപപ്രചാരണം നടത്തിയതാണെന്ന് ബോധ്യപ്പെട്ട കോൺഗ്രസ് സർക്കാർ, ജനവികാരം ശക്തമാണെന്ന് തിരിച്ചറിഞ്ഞ് മുഖം രക്ഷിക്കാൻ മാത്രമാണ് അന്വേഷണം നടത്താൻ തയ്യാറായത്. 

വർഷങ്ങൾക്കുമുമ്പ് വാഹന അപകടത്തിൽ മരിച്ച ജോയിയുടെ മകൻ അനീഷ് ജോയിയെ കേരളത്തിലെത്തിക്കുകയും തളിപ്പറമ്പ് പോലീസ് സ്റ്റേഷനിൽ വ്യാജ പരാതി നൽകിക്കുകയുമാണ് ചെയ്തത്. ഹൈന്ദവ ക്ഷേത്രത്തെയും വിശ്വാസത്തെയും തകർക്കാനുള്ള ഗൂഢാലോചനയുടെ ഭാഗമാണിത്.

ധർമ്മസ്ഥലക്കെതിരെ കള്ളപ്രചാരണം നടത്തുന്നത് ഹൈന്ദവ വിശ്വാസങ്ങളെ തകർത്ത് കലാപമുണ്ടാക്കാനുള്ള ശ്രമത്തിന്റെ ഭാഗമാണ്. ഈ ഗൂഢാലോചനയിൽ മനാഫ്, സമീർ തുടങ്ങിയവർക്ക് വ്യക്തമായ പങ്കുണ്ട്. ഈ കാര്യങ്ങളെല്ലാം സമഗ്രമായി അന്വേഷിക്കണമെന്ന് ബിജെപി ആവശ്യപ്പെട്ടു. 

റിട്ട. ഐഎഎസ് ഉദ്യോഗസ്ഥനും കോൺഗ്രസ് എംപിയുമായ ശശികാന്ത് സെന്തിൽ, 'മാസ്ക് മാൻ' എന്നറിയപ്പെടുന്ന സി.എൻ. ചിന്നയ്യ എന്നിവർ ചേർന്നുണ്ടാക്കിയ അന്തർ സംസ്ഥാന ഗൂഢാലോചനയാണ് ധർമ്മസ്ഥലയിലെ വ്യാജ സ്ത്രീ പീഡന, കൊലപാതക ആരോപണങ്ങൾക്ക് പിന്നിൽ. അനന്യ ഭട്ടിന്റെ തിരോധാനത്തിൽ ധർമ്മസ്ഥല ഭരണസമിതിയിലെ കുടുംബാംഗങ്ങൾക്ക് പങ്കുണ്ടെന്ന് ആരോപിച്ചതിലും, ഇതിന്റെ പേരിൽ ധർമ്മസ്ഥല ക്ഷേത്രത്തിന് നേരെ കല്ലെറിയണമെന്ന് ആഹ്വാനം ചെയ്തതിലും, സുജാത ഭട്ടിനു പിന്നിൽ മനാഫും സമീറും ഉണ്ടെന്നും ശ്രീകാന്ത് ആരോപിച്ചു.

ധർമ്മസ്ഥല മഹാക്ഷേത്രം ആത്മീയ, ദൈവിക കാര്യങ്ങൾക്കു മാത്രമല്ല പ്രസിദ്ധമായിരിക്കുന്നത്. ആയിരക്കണക്കിന് സ്ത്രീകളുടെ ഉന്നമനത്തിനായി സ്വയംസഹായ സംഘങ്ങൾ പ്രവർത്തിക്കുകയും പെൺകുട്ടികളുടെ വിവാഹം, ക്ഷേത്രങ്ങളുടെ പുനരുദ്ധാരണം ഉൾപ്പെടെയുള്ള സഹായങ്ങൾ നൽകുകയും ചെയ്യുന്നുണ്ട്. 

സാമൂഹിക, സാംസ്കാരിക, വിദ്യാഭ്യാസ രംഗങ്ങളിൽ നിരവധി പദ്ധതികൾ നടപ്പാക്കിക്കൊണ്ട് സാധാരണക്കാർക്ക് സഹായം നൽകുന്ന ധർമ്മസ്ഥലയെ തകർക്കാനുള്ള നീക്കമാണ് ഇതിനു പിന്നിൽ. വ്യാജ തെളിവുകൾ സൃഷ്ടിച്ച് അടിസ്ഥാനരഹിതമായ ആരോപണങ്ങൾ ഉന്നയിച്ച് കോടതിയെയും പൊതുസമൂഹത്തെയും തെറ്റിദ്ധരിപ്പിക്കാനാണ് ഇവർ ശ്രമിച്ചത്. 

ഇതിന്റെ മറവിൽ ധർമ്മസ്ഥല ക്ഷേത്രത്തെയും ക്ഷേത്ര ഭരണസമിതിയെയും തകർക്കാനുള്ള നീക്കമാണ് പല സോഷ്യൽ മീഡിയ പ്ലാറ്റ്‌ഫോമുകളിലൂടെയും നടത്തിയത്. ഇത്തരം സോഷ്യൽ മീഡിയ ഹാൻഡിലുകൾ പൂട്ടണം. കള്ളപ്രചാരണം നടത്തിയവർക്കെതിരെ ശക്തമായ നടപടി സ്വീകരിക്കണമെന്നും ബിജെപി ആവശ്യപ്പെട്ടു.

വാർത്താസമ്മേളനത്തിൽ ബിജെപി കാസർകോട് ജില്ലാ പ്രസിഡന്റ് എം.എൽ. അശ്വിനി, മേഖല ജനറൽ സെക്രട്ടറി സുധാമ ഗോസ എന്നിവരും പങ്കെടുത്തു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: BJP demands arrest of YouTuber Manaf for conspiracy against Dharmasthala Temple.

#Dharmasthala #Manaf #BJP #KeralaPolitics #TempleNews #Controversy