ആരിക്കാടി ടോൾ: കേന്ദ്ര മന്ത്രി നിതിൻ ഗഡ്കരിക്ക് പരാതി നൽകിയതായി ബിജെപി; മഞ്ചേശ്വരം എംഎൽഎയുടേത് കള്ളപ്രചരണമെന്നും കണ്ണുകെട്ട് സമരത്തിനില്ലെന്നും എംഎൽ അശ്വിനി

കുമ്പള: (KasargodVartha) ദേശീയ പാത അതോറിറ്റി കുമ്പള ആരിക്കാടിയിൽ നിർമ്മിച്ച ടോൾ പ്ലാസയുമായി ബന്ധപ്പെട്ട് മഞ്ചേശ്വരം എംഎൽഎ എ.കെ.എം. അഷ്‌റഫും സിപിഎം നേതാക്കളും ബിജെപിക്കെതിരെ കള്ളപ്രചരണം നടത്തുകയാണെന്ന് ബിജെപി കാസർകോട് ജില്ലാ പ്രസിഡന്റ് എം.എൽ. അശ്വിനി ആരോപിച്ചു. ആരിക്കാടി ടോൾ വിഷയത്തിൽ ബിജെപിക്ക് വ്യക്തമായ നിലപാടുണ്ടെന്നും തലപ്പാടി ടോൾ പ്ലാസയിൽ നിന്നും നിഷ്‌കർഷിച്ചിരിക്കുന്ന പരിധിക്കുള്ളിൽ മറ്റൊരു ടോൾ പ്ലാസ ആരിക്കാടിയിൽ സ്ഥാപിക്കുന്നതിനെ പാർട്ടി അംഗീകരിക്കുന്നില്ലെന്നും അശ്വിനി വ്യക്തമാക്കി.

ഈ വിഷയം ചൂണ്ടിക്കാട്ടി കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരിക്ക് ബിജെപി നേരിട്ട് പരാതി നൽകിയിട്ടുണ്ട്. മഞ്ചേശ്വരത്ത് ഇണ്ടി മുന്നണി നടത്തുന്നത് വെറും രാഷ്ട്രീയ നാടകമാണ്. ദേശീയപാതാ നിർമ്മാണ സമയത്ത് ആവശ്യമായ ഇടപെടലുകൾ നടത്താൻ കഴിയാതിരുന്നതിലുള്ള ജാള്യത മറക്കാനുള്ള ശ്രമമാണ് എംഎൽഎ എ.കെ.എം. അഷ്‌റഫ് ഇപ്പോൾ നടത്തുന്നത്. മണ്ഡലത്തിലെ വികസന കാര്യങ്ങളിൽ എംഎൽഎ പൂർണ്ണ പരാജയമാണെന്നും അശ്വിനി കുറ്റപ്പെടുത്തി.

‘എംഎൽഎയുടെ കഴിവുകേട്’

മണ്ഡലത്തിലെ നിരവധി പ്രധാന കേന്ദ്രങ്ങളിൽ ജനങ്ങൾക്ക് അത്യാവശ്യമായ ഫുട് ഓവർ ബ്രിഡ്ജുകൾ, അണ്ടർപാസുകൾ എന്നിവ സ്ഥാപിക്കാൻ കഴിയാത്തത് എംഎൽഎയുടെ കഴിവുകേടാണ്. നിർമ്മാണ ഘട്ടത്തിൽ ഇതിനായി സമ്മർദ്ദം ചെലുത്തുന്നതിൽ എംഎൽഎ പരാജയപ്പെട്ടു. സ്വന്തം വീഴ്ചകൾ മറച്ചുവെക്കാനാണ് ഇപ്പോൾ ബിജെപിക്കെതിരെ അടിസ്ഥാനരഹിതമായ ആരോപണങ്ങൾ ഉന്നയിക്കുന്നത്.

കരാർ കമ്പനിയുടെ മെല്ലെപ്പോക്ക്; കണ്ണുകെട്ട് സമരങ്ങൾക്ക് ബിജെപി ഇല്ല

ചെർക്കള മുതൽ നീലേശ്വരം വരെയുള്ള രണ്ടാം റീച്ചിൽ സ്ഥാപിക്കേണ്ടിയിരുന്ന ടോൾ പ്ലാസയാണ് ഇപ്പോൾ ആരിക്കാടിയിൽ എത്തിയിരിക്കുന്നത്. കരാർ കമ്പനിയുടെ നിർമ്മാണ പ്രവൃത്തിയിലുണ്ടായ മെല്ലെപ്പോക്ക് കാരണമാണ് ടോൾ പ്ലാസ ഇവിടെ സ്ഥാപിക്കാൻ ഇടയാക്കിയത്. ഇത് ബിജെപി ഒരിക്കലും അംഗീകരിക്കില്ല. ജനവിരുദ്ധമായ ഈ നീക്കത്തിനെതിരെ ബിജെപി ശക്തമായ സമരങ്ങൾ സംഘടിപ്പിക്കും. എന്നാൽ ജനങ്ങളെ കബളിപ്പിക്കുന്ന കണ്ണുകെട്ട് സമരങ്ങൾക്ക് ബിജെപി തയ്യാറല്ലെന്നും എം.എൽ. അശ്വിനി കൂട്ടിച്ചേർത്തു

ആരിക്കാടി ടോൾ വിഷയത്തിൽ നിങ്ങളുടെ അഭിപ്രായം താഴെ രേഖപ്പെടുത്തൂ. ഈ വാർത്ത നിങ്ങളുടെ സുഹൃത്തുക്കളിലേക്ക് ഷെയർ ചെയ്യൂ. 

Article Summary: BJP alleges politics by Manjeshwar MLA on Arikady toll issue; submits complaint to Nitin Gadkari.

#ArikadyToll #KasargodNews #BJP #ManjeshwarMLA #NationalHighway #KeralaPolitics